Isa ka Sulundan nga Sundon sing Suod
1 Si Jesus isa ka himpit nga sulundan para sa iya mga disipulo. Bisan pa nga indi naton malab-ot ang iya talaksan sang pagkahimpit, ginalaygayan kita nga “sundon sing suod ang iya mga tikang.” (1 Ped. 2:21) Kaangay ni Jesus, dapat naton ipaambit sing makugi ang kamatuoran sa iban.
2 Si Jesus indi lamang isa ka manugbantala; sia isa ka labing maayo nga manunudlo. “Ang kadam-an natingala sing daku sa iya paagi sang pagpanudlo.” (Mat. 7:28) Ngaa epektibo sia katama? Tan-awon naton sing maayo ang iya “paagi sang pagpanudlo.”
3 Kon Paano Naton Masunod si Jesus: Ang motibo ni Jesus amo ang padunggan si Jehova kag himayaon ang Iya ngalan. (Juan 17:4, 26) Sa aton man pagpanudlo, ang motibo naton amo dapat ang pagpadungog kay Jehova kag indi ang pagganyat sing igtalupangod sa aton kaugalingon.
4 Ang tanan nga gintudlo ni Jesus napasad sa Pulong sang Dios kag pirme niya ginpatuhuyan ang inspirado nga mga Kasulatan. (Mat. 4:4, 7; 19:4; 22:31) Luyag naton itudlo ang aton mga tagpalamati sa Biblia; busa ginapakita naton sa ila nga ang ginabantala kag ginatudlo naton napasad sa labing mataas nga awtoridad.
5 Naggamit si Jesus sing praktikal kag simple nga mga argumento. Halimbawa, sa pagpaathag kon paano naton matigayon ang kapatawaran sang Dios, ginpalig-on niya kita nga mangin mapinatawaron sa iban. (Mat. 6:14, 15) Dapat naton tinguhaan nga ipaathag ang mensahe sang Ginharian sa simple kag praktikal nga mga tinaga.
6 Naggamit si Jesus sing mga ilustrasyon kag mga pamangkot sa pagpukaw sang panghunahuna sang iban. (Mat. 13:34, 35; 22:20-22) Ang mga ilustrasyon nahanungod sa adlaw-adlaw nga mga butang makabulig sa mga tawo sa paghangop sang masibod nga mga doktrina sang Biblia. Dapat kita magbangon sing mga pamangkot nga nagapalig-on sa aton mga tagpalamati nga hunahunaon ang ila nabatian. Ang mga pamangkot nga nagatuytoy sa sabat makabulig sa ila nga matigayon ang husto nga mga konklusion.
7 Naghinguyang si Jesus sing tion agod ipaathag ang mabudlay nga mga butang sa sinsero nga mga tawo nga nagpangabay sing dugang nga impormasyon. (Mat. 13:36) Dapat man kita mangin mabuligon kon may nagapamangkot sing hanuot. Kon indi naton nahibaluan ang mga sabat, mahimo kita makapanalawsaw kag makabalik agod masabat ang mga pamangkot sa ulihi nga tion.
8 Naggamit si Jesus sing praktikal nga mga halimbawa sa pagtudlo. Ang isa ka halimbawa sini amo ang paghinaw niya sa tiil sang iya mga disipulo. (Juan 13:2-16) Kon magpakita kita sing mapainubuson nga espiritu, yadtong ginatudluan mapahulag sa pag-aplikar sang ila natun-an.
9 Ginpukaw ni Jesus ang tagipusuon sang tawo kag ang iya gugma sa pagkamatarong. Luyag man naton lab-uton ang mga tagipusuon. Ginatinguhaan naton nga pukawon ang duna nga handum sang tanan nga magsimba kag magkabuhi upod sa iban sing mahidaiton.
10 Sa Disiembre, itanyag naton ang libro nga Ang Pinakabantog nga Tawo nga Nagkabuhi. Ang pag-ilog naton sa mga kinaiya sang pagtudlo ni Jesus mahimo nga magapahulag sa hanuot nga mga tawo nga magpamati samtang ginapaathag naton ang gintudlo niya.—Mat. 10:40.