Magpakita sing Apresasyon sa Balay sang Dios
1 Sadtong panahon sang Biblia ginsugo ni Jehova ang iya katawhan nga magtipon sing tayuyon sa iya balay. (Lev. 23:2) Ining mga pagtinipon naghatag sing tion agod mahambalan kag mapamalandungan nila ang Kasuguan ni Jehova. Ang ila mga painoino napun-an sang mga panghunahuna sang Dios. Ang kahimusan nagpasanyog sang paghiusa kag matinlo nga pagsimba. Ang pagtinipon sa balay sang Dios sa karon importante man.
2 Paano Naton Mapakita nga Ginaapresyar Naton ang mga Miting? Sa pulupanag-on ang kahimtangan sang isa mahimo nga magaupang sa iya sa pagtambong sa miting. Apang ginatugutan mo bala ang magagmay nga mga problema sa pag-upang sa imo tayuyon nga pagtambong sa mga miting? Ang iban mahimo nga indi magatambong kon nagasakit diutay ang ila ulo ukon ginakapoy sila pagkatapos sang isa ka masako nga adlaw. Ang iban napilitan sa pag-amuma sa ditumuluo nga mga himata nga nagduaw. Ang iban nagpalya gani sa mga miting agod matan-aw ang isa ka paborito nga programa sa telebisyon. Ang kadakuon sang apresasyon nga ginpakita sa sining mga kahimtangan malayo gid katama sa tinagipusuon nga handum nga ginpabutyag sang mga anak nga lalaki ni Core: “Ang akon kalag ginahidlaw kag ginapunaw man tungod sa mga luwang ni Jehova.”—Sal. 84:2.
3 Bisan pa bugana ang espirituwal nga pagkaon nga ginaaman sa mga miting, ang iban nabudlayan sa paghatag sing igtalupangod. Ayhan ang iban nagadalamguhanon, nagahunahuna sang mga kabalaka sa sina nga adlaw, ukon nagakadukaan pa gani. Nasapwan sang iban nga ang pagkuha sing nota nagabulig sa ila nga magpabilin nga alisto. Dugang pa, kon nagahanda kita sing abanse, sarang kita ‘makahatag sing labi pa sangsa kinaandan nga igtalupangod.’—Heb. 2:1.
4 Kinahanglan man nga matun-an kag mahangpan sang mga kabataan ang mga panudlo nga ginahatag sa mga miting. Diutay lamang ang matun-an sang mga kabataan kon ang mga ginikanan magahatag sa ila sing mga hampanganan kag mga coloring book agod maghipos sila. May kakulang sing nagakaigo nga disiplina kon ang mga kabataan ginatugutan sa paghampang, paghambal, paghibi, ukon paghimo sang iban pa nga mga butang nga nagatublag sa iban. Ang masunson kag dikinahanglanon nga pagpakadto-pakari sa kasilyas sa panahon sang miting masami nga mabuhinan kon nahibaluan sang bata nga ang isa sa iya mga ginikanan pirme magaupod sa iya.
5 Ang Pag-abot sing Temprano Importante: Sa pulupanag-on, ang dimalikawan nga mga sirkunstansia mahimo nga magapugong sa aton nga makaabot sa miting sing husto sa oras, apang ang kinabatasan nga pag-abot sing ulihi pagkatapos sang nagabukas nga ambahanon kag pangamuyo nagapakita sing indi pagtahod sa mga miting. Dumduma nga ang pag-amba kag pagpangamuyo upod sa aton mga kauturan sa mga miting sa kongregasyon bahin sang aton pagsimba. Ang kinabatasan nga pag-abot sing ulihi masami na nga resulta sang mapigaw nga pagplano sing abanse. Ang pag-abot sing temprano nagapakita nga ginatahod kag ginaapresyar naton ang aton mga miting.
6 Samtang ang adlaw labi nga nagahilapit, ang kinahanglanon nga magtipon sing tingob nangin labi pa ka daku. (Heb. 10:24, 25) Ipakita naton ang aton apresasyon paagi sa pagtambong sing tayuyon, paghanda sing abanse, pag-abot sing temprano, pagpamati sing maayo, kag nian pag-aplikar sang aton natun-an.