Personal nga Pagtuon​—Isa ka Butang nga Kabalak-an

¹ Anong mga butang ang dapat kabalak-an sing daku? Dapat kita magkabalaka nahanungod sa pagtukod kag sa paghupot sing suod nga kaangtanan kay Jehova. Daku ang mahimo sang personal nga pagtuon sa pagpalambo sina nga pagkasuod. Karon, diutay lamang sa aton ang nagahinguyang sing madamo nga panag-on sang tion sa personal nga pagtuon. Apang, kon wala kita nagabasa sang Pulong sang Dios sing tayuyon, mahimo kita mangin maluya katama sa pagbato sa espiritu sang kalibutan kag sa undanon nga mga kailigbon sini.

² Magtigayon sing Kahidlaw sa Pulong: Sang una naton nga natun-an ang nahanungod sa mga katuyuan sang Dios, mahimo nga nalangkag kita sa pagtigayon sing dugang nga ihibalo. Apang, sa sulod sang isa ka panag-on sang tion, ang aton pagkagutom sa espirituwal nga pagkaon mahimo nga nabuhinan. Ayhan kinahanglan ang “magtigayon sing kahidlaw” sa espirituwal nga pagkaon. (1 Ped. 2:2) Paano naton mapalambo ina nga kahidlaw?

³ Ang baho sang isa ka paborito nga pagkaon magapukaw sang aton gana. Ang malip-ot nga mga panag-on sang pagtuon mahimo makaapektar sa aton sa kaanggid nga paagi sa espirituwal. Ang pagtigayon sing pila ka espirituwal nga mga butang mahimo magpukaw sang aton gana para sa mas madalom nga mga kamatuoran.

⁴ Magpalambo sing Rutina nga Labing Maayo Para sa Imo: Ang iban nagapain sang bug-os nga gab-i para sa personal nga pagtuon, samtang ang iban nagapakamaayo sang mas malip-ot kag mas masunson nga mga panag-on sang pagtuon. Kon nasapwan mo nga makakonsentrar ka sing mas maayo sa aga, ayhan mamat-od ka sa pagtuon antes sang pamahaw. Kon mas alisto ka sa gab-i, ayhan magatuon ka antes magtulog. Ang importante nga butang amo ang mangin regular kag magpabilin sa rutina nga nagakaigo gid sa imo mga kinahanglanon.

⁵ Kon ginapalig-on sa paghimo sing dugang pa nga personal nga pagtuon, ayhan maabtik kita sa pagsiling nga puno na ang aton iskedyul. Apang, dapat kita magmangin bunayag sa pagbinagbinag kon paano naton ginahinguyang ang aton tion. Madamo nga inoras bala ang ginagamit kada adlaw sa pagtan-aw sing telebisyon? Ang bunayag nga pag-usisa sa aton iskedyul mahimo magapakita sing tion kada adlaw nga sarang magamit sa personal nga pagtuon.​—Efe. 5:​15, 16.

⁶ Ang pagtuon sa Pulong sang Dios nagakabagay sang aton bug-os nga igtalupangod. Kon nahuyog kita sa pagtuon samtang nagakaon, nagapamati sing radyo, ukon nagatan-aw sing telebisyon, mahimo nga indi kita makakonsentrar sa kon ano ang ginatinguhaan naton nga matun-an. (1 Tim. 4:15) Gani kinahanglan nga dulaon ang mga tublag.​—Tan-awa ang School Guideboook, pahina 33-4.

⁷ Ang adlaw-adlaw nga pagtuon sa laygay sang Biblia importante bangod amo ina ang paagi nga nagabaton kita sing laygay gikan kay Jehova. Himusli ang tanan nga kahigayunan, bisan kon daw ano kalip-ot, sa pagbasa, pagrepaso, ukon sa pagpamalandong sa espirituwal nga mga butang.​—Deut. 6:​6-8; Col. 1:​9, 10.