Ginhatagan sing Madamo—Madamo ang Pangayuon
1 Daw ano ka daku nga kadungganan nga natigayon naton ang kamatuoran! Bangod sang aton dedikasyon kay Jehova, gintulin sa aton ang maayong balita. (1 Tes. 2:4) Nagahatag ini sa aton sing daku pa nga responsabilidad. Si Jesus nagsiling: “Ang kada isa nga ginhatagan sing madamo, madamo ang pangayuon sa iya.”—Luc. 12:48b.
2 Matuod gid yadtong mga pulong! Bangod ginpakamaayo sing ihibalo tuhay sa Pulong sang Dios, sing dalayawon nga paghiliutod, kag sing makatilingala nga paglaum, madamo gid ang ginhatag sa aton. Sing makatarunganon, madamo ang ginapaabot bilang balos.
3 Hupti ang Nagakaigo nga Pagtamod sa mga Kinahanglanon: Naghinakop ang iban nga daku katama ang ginapaabot sa aton. Subong Ulo sang Cristianong kongregasyon, ginapat-od ni Jesucristo “kon ano ang kinahanglanon” agod magpanghikot ini sing nagakaigo. (Efe. 4:15, 16) Ginapasalig niya sa aton nga ang ‘iya gota mahulas kag ang iya lulan mamag-an.’ (Mat. 11:28-30) Mahigugmaon niya nga ginahatagan sing patugsiling yadtong may mga kakulangan. (Luc. 21:1-4) Kon ihatag naton ang aton labing maayo, walay. sapayan sang kadamuon, kita pakamaayuhon.—Col. 3:23, 24.
4 Pamangkuta ang imo kaugalingon, ‘Ang mga interes sang Ginharian amo bala ang una sa akon kabuhi? Ginagamit ko bala ang akon tion kag pagkabutang sa pagdayaw sa ngalan sang Dios kag sa pagbulig sa iban? Natigayon ko bala ang labing daku nga kalipay gikan sa pag-alagad kay Jehova sangsa pagkalipay sa materyal nga mga butang?’ Ang aton bunayag nga mga sabat sa sining mga pamangkot magasugid sang mga motibo sa sulod sang aton tagipusuon.—Luc.6:45.
5 Likawi nga Masulay sa Paghimo sing Malain: Wala pa gid matabo anay nga may amo ka daku nga mga pag-ipit sa pagkamaiyaiyahon, pagkamahamkunon, kag paghigugma sa undanon nga kalipayan. Kada adlaw ginaatubang kita sing mga pagsulay nga magkompromiso. Agod maatubang ini sing madinalag-on, dapat kita mangabay sing bulig kay Jehova. (Mat. 26:41) Paagi sa iya espiritu, sarang niya kita mapabakod. (Isa. 40:29) Ang pagdisiplina sa kaugalingon kag pagpugong sa kaugalingon makabulig man sing daku.—1 Cor. 9:27.
6 Indi bastante nga higugmaon kon ano ang maayo, kundi dapat man naton dumtan kon ano ang malain. (Sal. 97:10) Ginalista sang Hulubaton 6:16-19 ang pito ka butang nga ginadumtan ni Jehova. Sing maathag ang isa nga luyag mangin kalahamut-an kay Jehova dapat man magdumot sina nga mga butang.
7 Nagakaigo nga ipangamuyo ang mga sirkunstansia nga pirme nagatugot sa aton nga may “madamo sing himuon sa buluhaton sang Ginuo.” (1 Cor. 15:58) Nasapwan sang madamo nga ang masako nga iskedyul sa pag-alagad kay Jehova isa ka pangamlig bangod nagahatag ini sing diutay lamang nga tion sa paghingamo sang walay pulos nga mga butang.
8 Nabinagbinag ang tanan, ang ginapangayo ni Jehova sa aton makatarunganon katama. (Miq. 6:8) Gani padayon kita nga “nagapangabudlay sing lakas kag nagapanikasog,” nagasalig nga ang aton padya mangin daku pa sangsa bisan ano nga ginapangayo sa aton.—1 Tim. 4:10.