Paghalad sang Aton Kaugalingon sing Kinabubut-on Para sa Tagsa ka Maayong Buhat

¹ Ang isa ka kalibutanon nga publikasyon naghinambit sa mga Saksi ni Jehova, nga nagasiling: “Mabudlay makakita sing mga katapo sang bisan anong iban pa nga grupo nga nagapangabudlay sing lakas sa ila relihion kaangay sang mga Saksi.” Ngaa ang mga Saksi ni Jehova nagapangabudlay gid sing lakas kag nga may kinabubut-on nga espiritu?

² Ang isa ka rason amo nga ginapabulag sila sang balatyagon sang pagkahilingagawon. Si Jesus nakahibalo nga limitado lamang ang iya tion sa pagtapos sang iya hilikuton sa duta. (Juan 9:4) Karon, ang katawhan ni Jehova nakahibalo nga limitado lamang ang ila tion sa .paghimo sang ila hilikuton. Busa, padayon nila nga ginahalad ang ila kaugalingon sing kinabubut-on para sa sagrado nga pag-alagad. (Sal. 110:​1-3) Bangod madamo pa nga mga manugpangabudlay ang kinahanglanon sa pagdala sing ani, indi nila dapat buhinan ang ila mga panikasog. (Mat. 9:​37, 38) Hanti, nagapanikasog sila sa pag-ilog kay Jesus, nga nagpahamtang sing himpit nga halimbawa sang kahanda kag kakugi sa iya hilikuton.​—Juan 5:17.

³ Ang isa pa ka rason kon ngaa ang mga Saksi ni Jehova nagapangabudlay sing bug-os kalag amo nga ang ila organisasyon tuhay gikan sa tanan iban pa nga mga grupo. Ang kalibutan nga relihiosong mga organisasyon masami nga nagakinahanglan lamang sing pinakamanubo nga oras kag panikasog gikan sa ila mga sumulunod. Ang ila pagtuluuhan may diutay lamang ukon wala gid sing epekto sa ila adlaw-adlaw nga pagkabuhi. Luyag pa nila nga ang ila mga manugbantay ‘magpamulong sa ila sing mga butang nga maayo,’ nagapasalig sa ila nga ang ila pakulahaw nga panikasog bastante na. (Isa. 30:10) Ginhimo ini sang ila klero paagi sa ‘pagpakalam sang ila mga dulunggan,’ nagapatudok sang espiritu sang pagpatumbaya kag espirituwal nga pagkatamad.​—2 Tim. 4:3.

⁴ Tuhay gid sa katawhan ni Jehova! Ang tanan nga butang sa aton pagsimba nagadalahig sing panikasog kag hilikuton. Kada adlaw kag sa kada butang nga ginahimo naton, ginabuhat naton kon ano ang aton ginapatihan. Samtang ang kamatuoran nagahatag sa aton sing dakung kalipay, nagadalahig ini sing “dakung pagpakigsumpong” agod mahimo naton ang ginapatuman sini. (Ipaanggid ang 1 Tesalonica 2:2.) Ang pag-atipan sa mga responsabilidad sa adlaw-adlaw nga pagkabuhi bastante na agod magpabilin nga masako ang kalabanan nga mga tawo. Apang wala ini nagapugong sa aton nga unahon ang mga interes sang Ginharian.​—Mat. 6:33.

⁵ Ang aton pag-alagad kay Jehova mapuslanon katama kag hilingagawon nga ginapahulag kita nga ‘baklon’, ang tion gikan sa iban nga mga paghimud-os kag gamiton ini para sa espirituwal nga mga butang. (Efe. 5:16) Nakahibalo nga ang aton diosnon nga debosyon kag kinabubut-on nga espiritu nagapahamuot kay Jehova, ginapalig-on kita nga padayunon ang aton lakas nga pagpangabudlay. Ang aton pamat-od amo ang magpadayon sa “pagpangabudlay kag pagpanikasog” tungod sa mga interes sang Ginharian.​—1 Tim. 4:10.

⁶ Ang Debosyon kag ang Espiritu sang Pagsakripisyo sa Kaugalingon: Ang kalabanan nga mga tawo karon nagauna sang materyal nga mga kinahanglanon kag mga interes sangsa tanan pa nga butang. Ginatuon nila ang ila igtalupangod sa kon ano ang ila kaunon, imnon, ukon ipanapot. (Mat. 6:31) Bangod indi kontento sa mga kinahanglanon, ginapahulag sila sang tulumuron nga magkalipay karon sing bug-os sa maayong pagkabuhi kag ‘magtipon sing madamong maayong mga butang sa madamong tinuig, agod makapatawhay sila, makakaon, makainom, kag magkasadya.’ (Luc. 12:19) Ang kinaandan nga nagakadto simbahan nagabatyag nga ang bisan anong personal nga panikasog nga ginapatuman sang iya relihion isa ka pagpasilabot sa iya mga kinamatarong. Bangod natuon ang iya panghunahuna sa iya kaugalingon, ang pagpalambo sing espiritu sang pagsakripisyo sa kaugalingon indi pratikal.

⁷ Tuhay ang pagtamod naton sa sining butang. Ginpakataas sang Pulong sang Dios ang aton panghunahuna agod mahunahuna naton ang mga hunahuna sang Dios sa baylo sang hunahuna sang mga tawo. (Isa. 55:​8, 9) Labaw pa sa undanon nga mga paghimud-os lamang ang aton mga tulumuron sa kabuhi. Ang pagbindikar sa pagkasoberano ni Jehova kag ang pagpakabalaan sa iya ngalan amo ang labing importante nga mga hulusayon sa bug-os nga uniberso. Tama gid kadaku ining mga hulusayon nga, kon ipaanggid, ang tanan nga pungsod “subong nga wala sa atubangan niya.” (Isa. 40:17) Ang bisan ano nga paninguha nga magkabuhi kita sa paagi nga nagasikway sang kabubut-on sang Dios dapat tamdon subong kabuangan.​—1 Cor. 3:19.

⁸ Gani bisan pa ang pila ka materyal nga mga butang kinahanglanon, nahantop naton nga indi gid man ini “ang mas importante nga mga butang.” (Filip. 1:10) Ginasunod naton ang espiritu sang 1 Timoteo 6:8 sa paglatid sang aton paghimud-os sa materyal nga mga butang kag sa paghupot sang aton tagipusuon nga nasentro ‘sa mga butang nga dimakita nga walay katapusan.​—2 Cor. 4:18.

⁹ Kon labi naton nga ginahunahuna ang mga panghunahuna sang Dios, ang paghimud-os naton sa materyal nga mga butang nagadiutay. Kon ginabinagbinag naton ang ginhimo na ni Jehova para sa aton kag ang makatilingala nga mga pagpakamaayo nga ginsaad niya para sa palaabuton, handa kita sa paghimo sing mga sakripisyo nga ginapangabay niya sa aton. (Mar. 10:​29, 30) Utang naton sa iya ang aton kabuhi. Obligado kita nga ihatag ang aton kaugaIingon kay ang tanan nga ginahimo naton sa pag-alagad sa iya ‘amo gid ang dapat naton himuon.’ (Luc. 17:10) Ang bisan ano nga ginapangabay sa aton nga ihatag.kay Jehova, ginahatag naton sing malipayon, nakahibalo nga kita “magaani sing bugana.”​—2 Cor. 9:​6, 7.

¹⁰ Ang Kinabubut-on nga mga Manugpangabudlay Ginakinahanglan Karon: Kutob sa ginsuguran gid sini, ang Cristianong kongregasyon nagsulod sa panag-on sang daku nga hilikuton. Ang maid-id nga panaksi dapat himuon antes sang pagkapukan sang Jerusalem sang 70 C.E. Sadto nga tion ang mga disipulo ni Jesus “masako katama sa pulong.” (Binu. 18:5) Ang madasig nga pag-uswag nagkinahanglan sing paghanas sa dugang pa nga mga ebanghelisador kag lantip nga mga manugbantay. Ang mga lalaki nga may eksperiensia sa pagpakig-angot sa sekular nga mga awtoridad subong man ang sangkol nga mga lalaki nga makasarang sa pagdumala sang pagpangolekta kag pagpanagtag sing materyal nga mga butang ginkinahanglan. (Binu. 6:​1-6; Efe. 4:11) Samtang ang iban nag-alagad sing talalupangdon, ang kalabanan nagpabilin sa likod. Apang tanan sila ‘nanikasog sing lakas,’ bug-os tagipusuon nga nangabudlay sing tingob agod matapos ang hilikuton.​—Luc. 13:24.

¹¹ Bisan pa diutay lamang nga lakas nga hilikuton ang ginkinahanglan sa mga siglo nga nagsunod, ang dakung pagpabaskog sa hilikuton sang Ginharian nagsugod sang naggahom si Jesus sa Ginharian sang 1914. Sang primero, diutay lamang ang nakatalupangod nga ang pagkinahanglan sing mga manugpangabudlay magadaku katama, nga nagakinahanglan sing bulig sang minilyon sa bug-os nga kalibutan.

¹² Sa karon ang organisasyon nadalahig sa nanarisari nga mga proyekto nga halos nagaubos sang aton manggad. Ang hilikuton sang Ginharian nagauswag sa dakung kasangkaron. Ang pagkahilingagawon sang aton tion nagapahulag sa aton sa pagpanikasog kag sa paggamit sang tanan naton nga pagkabutang sa paghimo sang hilikuton. Bangod malapit na katama ang katapusan sang bug-os nga malauton nga sistema sang mga butang, ginapaabot naton ang daku pa nga hilikuton sa mga adlaw sa unahan! Ang tagsa ka dedikadong alagad ni Jehova ginapangabay nga ihalad ang iya kaugalingon sing kinabubut-on sa hilingagawon nga hilikuton sang pagtipon!

¹³ Anong mga Kinahanglan ang Dapat Himuon? Makasiling kita sing matinuuron nga may “bugana nga, himuon sa buluhaton sang Ginuo.” (1 Cor. 15:58) Sa madamong teritoryo ang alanyon luto na, apang ang mga mamumugon diutay lamang. Ginaagda kita sa paghimo sang aton bahin indi lamang sa pagpanaksi sing mas maid-id sa aton bug-os nga teritoryo kundi sa pag-atubang mansa hangkat nga mag-alagad kon diin daku pa ang kinahanglanon.

¹⁴ Dalayawon makita kon paano ang mga Saksi sa tanan nga bahin sang kalibutan nagatanyag sang ila kaugalingon sing kinabubut-on para sa iban pa nga mga hilikuton. Mahimo ini maglakip sang pagboluntaryo sa pagpatindog sing mga duog sang pagsimba, pag-alagad sa mga kombension, pagbulig sa mga panikasog sa pagtabang sa mga tion sang kalamidad, ukon sa pagpaninlo sa lokal nga Kingdom Hall. Dapat naton pirme pat-uron nga ang Kingdom Hall ginabilin nga matinlo kag mahim-ong pagkatapos sang tagsa ka miting. Ang paghimo sang mga hilikuton nga mahimo makabig nga manubo nagapakita sing nagakaigo nga pagtahod sa pinamulong ni Jesus sa Lucas 16:10: “Ang tawo nga matutom sa diutay gid matutom man sa madamo, kag ang tawo nga dimatarong sa diutay gid dimatarong man sa madamo.”

■ Pagsakdag sa mga Hilikuton sang Kongregasyon: Ang kada kongregasyon ginahuman sang indibiduwal nga mga manugbantala sang Ginharian. Ang mga hinimuan sang kongregasyon nasandig sing daku sa kon daw ano kadamo ang kinabubut-on kag masarangan himuon sang kada Saksi. Nasentro ini sa pagbantala sing maayong balita, paghimo sing bag-ong mga disipulo, kag nian pagpalig-on sa ila sa espirituwal. Ang kada isa sa aton mahimo makaamot sa sining hilikuton. Makapahamtang man kita sing mga tulumuron para sa aton kaugalingon sa personal nga pagtuon, pagpakigbahin sa mga miting, kag pagbulig sa iban nga nagakinahanglan sa sulod sang kongregasyon. Ining mga hilikuton nagahatag sing madamong maayong mga kahigayunan para sa aton agod ipakita ang aton kahanda.

■ Pagpanguna sa mga Katungdanan sang Pagdumala: Gintugyan ni Jehova ang pagdumala sang tagsa ka kongregasyon sa gintangdo nga mga gulang sini. (Binu. 20:28) Mga lalaki sila nga nagpanikasog agod makalipikar para sa sining pribilehiyo. (1 Tim. 3:1) Halos ang tagsa ka utod nga lalaki sa kongregasyon mahimo makalipikar para sa daku pa nga mga responsabilidad. Madamong kauturan nga mga lalaki ang nagatubo sa espirituwal. Dapat sila mangin makugi nga mga estudyante sang Biblia kag sang aton mga publikasyon. Mapakita nila ang ila kahanda paagi sa pagpasakop sa gintangdo sang espiritu nga mga gulang, nagailog sang ila pagtuo, kag nagapalambo sang mga kinaiya nga ginakinahanglan para sa mga manugtatap.​—Heb. 13:​7, 17.

■ Pagsulod sa Bug-os Tion nga Pag-alagad: Ang kongregasyon nagapanghikot ilabi na agod ibantala ang maayong balita. (Mat. 24:14) Daw ano nga pagpakamaayo kon ang mga makugi magapabaskog sang ila mga panikasog paagi sa pagpalista subong mga payunir! NagaIakip ini sa masami sing mga pagbalhin sa ila personal nga kabuhi. Yadtong nagapabilin sa sining pribilehiyo sa baylo nga mag-untat pagligad sang isa ukon kapin pa ka tuig bangod sang umalagi nga pagluya sing buot pat-od nga magaagom sing buganang pagpakamaayo ni Jehova. Ang mahigugmaon nga mga gulang kag ang iban pa nga mga hamtong mahimo makabulig sa mga payunir nga magmadinalag-on, nagapalig-on sa ila paagi sa hambal kag buhat. Daw ano kaayo nga espiritu ang ginapakita sang mga pamatan-on nga nagasulod dayon sa hilikuton nga pagpayunir pagkagradwar sa eskwelahan! Amo man sa mga hamtong nga nagaregular payunir sa gilayon nga mabuhinan ang ila sekular nga mga obligasyon. Daw ano nga kaayawan ang mahatag sini sa isa ka dedikadong Cristiano kon nagakooperar sia sa pagpadasig ni Jehova sa hilikuton sang pagtipon!​—Isa. 60:22.

■ Pagpakigbahin sa Pagpatindog, kag sa Pagmentinar sing mga Duog Tilipunan: Ginatos ka modernong mga Kingdom Hall subong man madamong Assembly HaIl ang ginpatindog. Halos ang tanan nga buluhaton ginhimo sang aton mga kauturan nga lalaki kag babayi nga kinabubut-on nga nagboluntaryo sang ila tion kag mga ikasarang. (1 Cron. 28:21) Linibo ka kinabubut-on nga mga manugpangabudlay ang nagahupot sining mga pasilidad sa maayo nga kahimtangan paagi sa paghimo sang bisan anong hilikuton nga mahimo kinahanglanon. (2 Cron. 34:8) Sanglit ining hilikuton isa ka bahin sang sagrado nga pag-alagad, yadtong nagabulig nagatanyag sang ila kaugalingon sing kinabubut-on, nga wala nagapabayad tungod sang ila serbisyo, kon paano nga wala sila nagapabayad agod magbantala sa pamalaybalay, maghatag sing mga pamulongpulong publiko, ukon magbulig sa hilikuton sa asambleya ukon kombension, Ining mga boluntaryo wala sing bayad nga nagahalad sang ila mga serbisyo sa pagplano kag sa pagpatindog sing mga duog sang pagsimba sa kadayawan ni Jehova. Ining matutom nga mga alagad ni Jehova wala gid nagapangita sing paagi nga makaganansia sa materyal ayhan sing direkta ukon indi direkta gikan sa mga serbisyo nga ila ginahimo, kay ang tanan nila nga mga ikasarang kag mga manggad ginadedikar kay Jehova. Ining hilikuton nagakinahanglan sing makugi nga mga manugpangabudlay nga nagabuhat sang ila mga serbisyo sing “bug-os tagipusuon nga kay Jehova.”​—Col. 3:23.

¹⁵ Ano, nian, ang nagahimo sang pagkahanda sang katawhan ni Jehova nga pinasahi? Ini amo ang espiritu sang paghatag. Ang ila maalwan nga paghatag nagaIakip sing labaw pa sa kuwarta ukon materyal nga mga butang​—ila, “ginahalad ang ila kaugalingon sing kinabubut-on.” (Sal. 110:3) Amo ini ang kahulugan sang aton dedikasyon kay Jehova. Ginapadyaan kita sa pinasahi nga paagi. Ginaagom naton ang “daku pa nga kalipay” kag kita “nagaani sing bugana” bangod ang ginahimo naton ginaapresyar sang iban, nga nagahatag man sa aton. (Binu. 20:35; 2 Cor. 9:6; Luc 6:38) Si Jehova “nagahigugma sa manughatag nga malipayon.” (2 Cor. 9:7) Tumbasan niya kita sing isa ka gatos ka pilo, upod ang mga pagpakamaayo nga magapadayon sa walay katubtuban. (Mal. 3:10; Roma 6:23) Gani kon ang mga pribilehiyo sa pag-alagad kay Jehova ginabuksan sa imo, magaboluntaryo ka bala sing kinabubut-on kag magasabat kaangay kay Isaias: “Yari ako! Ipadala ako”?​—Isa. 6:8.