Paano Ko Mabuyok ang Tagbalay sa Pagpamati?

¹ Sa siudad sang Filipos, “ang isa ka babayi nga ginhingalanan si Lydia, nga manugbaligya sang purpura, . . . nagpamati, kag ang iya tagipusuon ginbuksan ni Jehova sa pagtalupangod sang ginpamulong ni Pablo.” (Binuhatan 16:14) Ano ang ginatudlo sining rekord sa aton? Ang pagpamati amo ang nagadul-ong sa pagtuon sang isa ka tawo sang kamatuoran. Ang aton kadalag-an sa pagpaambit sang mensahe sang Ginharian nasandig una sa kahanda sang tagbalay sa pagpamati. Sa tion nga mabuyok naton sia sa pagpamati, indi na mabudlay nga ipresentar ang aton mensahe. Apang isa ka hangkat ang pagbuyok sa isa sa pagpamati. Ano ang sarang naton himuon?

² Antes makigbahin sa pag-alagad, dapat naton talupangdon ang aton panagway kag ang kagamitan nga pagagamiton naton. Ngaa? Ang mga tawo mas madali mamati sa isa nga nagapresentar sang iya kaugalingon nga may dignidad. Napanaptan bala kita sing matahom apang sing maugdang? Bisan pa nga ang baraghal nga pamayo mahimo nga popular sa kalibutan, ginalikawan naton ining pagkamapatumbayaon bangod mga ministro kita nga nagarepresentar sa Ginharian sang Dios. Ang aton matinlo kag mahipid nga panagway nagadugang sing paborable nga panaksi sa mensahe sang Ginharian nga aton ginabantala.

³ Mangin Mainabyanon kag Matinahuron: Walay sapayan sang nagabalhin nga mga panimuot karon, madamo nga tawo sa gihapon ang nagatahod sa Biblia kag nagapamati sing maayo sa isa ka matinahuron kag mainabyanon nga pagpakigsugilanon sa kon ano ang ginaunod sang Biblia. Ang mainit, matuod nga yuhum magapatawhay sa tagbalay kag magabukas sang dalan para sa isa ka makalilipay nga paghambalanay. Ang aton pagkasinsero kag maayong pamatasan dapat man mabanaag sa aton paghambal kag paggawi, nga nagalakip sa pagpamati naton sing matinahuron sa mga ginasiling sang tagbalay.

⁴ Ang aton katuyuan amo ang pagpaambit sang paglaum sang Biblia sa iban. Nagahunahuna sini, dapat naton pat-uron nga ang aton paghambalanay makagalanyat, indi makapaakig ukon makahalangkat. Indi kinahanglan mag-uyang sing tion sa pagpakigbais sa isa ka tawo nga maathag nga nagapamatok. (2 Tim. 2:​23-25) Mahimo kita makapili gikan sa lainlain makapalig-on kag suno-sa-tion nga mga presentasyon nga gin-aman para sa aton sang Ang Aton Ministeryo sang Ginharian kag sang Reasoning nga libro. Sa pagkamatuod, kinahanglan naton ini handaan sing maayo agod makapamulong kita sa mainit kag makahalaylo nga paagi.​—1 Ped. 3:15.

⁵ Pagkatapos sang aton pagduaw, pila lamang ka tagbalay ang makadumdom kon ano gid ang aton ginsiling. Apang, halos sila tanan makadumdom sang paagi nga ini ginhambal. Indi naton dapat pagpakadiutayon ang gahom sang pagkaayo kag pagkalulo. Sing pat-od may madamong katulad-karnero nga mga tawo sa aton teritoryo nga handa mamati sa kamatuoran kaangay sang ginhimo ni Lydia sang nahaunang siglo. Ang paghatag sing mahalungon nga pagtalupangod sa aton panagway kag paagi sa paghambal makapalig-on sa mga sinsero sa pagpamati sa Pulong sang Dios kag sa pagbaton sini sing kalahamut-an.​—Mar. 4:20.