Panikasugi nga ang mga Tawo Mamati sing Maayo

¹ Ang madamo nga mga tawo nga masugilanon naton sa aton pamalaybalay nga ministeryo wala nagahunahuna sang espirituwal nga mga butang. Ayhan masako sila sa ila kaugalingon nga mga problema. Agod masugdan ang isa ka paghambalanay, sa masami labing maayo nga hambalan ang mga butang nga makawiwili sa madamo sa sinang lugar. Mahimo magamit ang mga pamangkot sa pagpukaw sing interes. Ang punto-de-vista nga mga pamangkot nga wala nagapaakig sa mga tawo amo ang labing epektibo.

² Mahimo sila mamati paagi sa paggamit sing introduksion kaangay sini:

◼ Maayong aga. Ako si _____. Dira lang ako sa malapit nagapuyo. Madamo sang nasugilanon ko karon nga aga ang nabalaka sa [sambita ang ulihi nga balita ukon butang nga ginakabalak-an sa lugar]. Sa banta mo gintuyo bala sang Dios ang kalibutan nga mangin amo sini?” Pasabta sia. Sa sining punto mahimo magamit ang tract nga Kabuhi sa Mahidaiton nga Bag-ong Kalibutan. Ipaathag sa malip-ot ang laragway sa pahina 1 kag ang impormasyon sa parapo 1-3 kon ginatugot sang tion. Kon makuha na ang interes, ang libro nga Mabuhi sing Dayon mahimo matanyag. Mahimo mo ipatalupangod ang Salmo 37:​9, 10 subong sang ginabalikwat sa pahina 157 kag basahon ini gikan sa libro. Ginagamit ang larawan sa pahina 156-7, ipaathag ang matarong nga mga kahimtangan nga magaluntad sa duta kon ang kalautan madula na.

³ Mangin handa pirme sa pagtanyag sing Ang Lalantawan kag Magmata! Ang mga tawo bisan diin nabalaka sa pagkalusod sa moral. Samtang imo ginabasa ang Septiembre 8 nga Awake!, pilia ang pila ka punto nga sa banta mo magapukaw sa interes sang mga tawo sa inyo teritoryo. Magpamulong sing positibo nahanungod sa mga benepisyo sang pagsunod sa laygay sang Pulong sang Dios. Sa ulihi nga bahin sang bulan, kon nagatanyag sang Septiembre 22 nga Awake!, ipatalupangod ang artikulo nga nagapadaku sang laygay sang Biblia nahanungod sa mga butang nga nagaapektar sa aton. Ang bag-o kag pati man ang nagligad nga mga guwa sang Ang Lalantawan kag Magmata! mahimo magamit bisan san-o dugang sa pinasahi nga mga adlaw nga gintalana para sa pagtanyag sing mga magasin.

⁴ Dumduma nga ang aton tulumuron amo ang pagpukaw sing interes sa mensahe sang Ginharian. Agod mahimo ini dapat anay naton kuhaon ang igtalupangod sang tagbalay kag pukawon ang iya panghunahuna. Magapahulag ini sa mga tulad-karnero nga katawhan nga mamati sing dugang pa nahanungod sa katuyuan ni Jehova para sa katawhan.​—Sal. 85:8.