Walay Untat sa Pagpahayag sang Maayong Balita

¹ Ginakabig sang unang mga Cristiano ang ila ministeryo sing tuman ka serioso. Si Lucas nagreport: “Sa adlaw-adlaw sa templo kag sa balay-balay nagpadayon sila sa walay untat sa pagpanudlo kag sa pagpahayag sang maayong balita nahanungod sa Cristo, si Jesus.” (Binu. 5:42) Wala sing bisan ano, indi bisan paghingabot, ang makapugong sa ila! (Binu. 8:4) Nagpamulong sila sa iban nahanungod sa kamatuoran kada adlaw.

² Kamusta kita? Pamangkuta ang imo kaugalingon: ‘Nabatyagan ko bala ang pagkahilingagawon sang tion? Nahuyog bala ako nga padayon nga ipahayag ang maayong balita sa walay untat?’

³ Modernong-Adlaw nga mga Halimbawa sang Walay Untat nga Pagbantala: Isa ka utod nga babayi, nga biktima sang polio, ang nabutang na lamang sa isa ka iron lung (isa ka makina nga nagapasulod kag nagapaguwa sang hangin sa baga). Indi sia makakadto sa Kingdom Hall ukon makatambong sa asambleya. Apang, sa sulod sang 37-anyos nga yara sia sa iron lung, 17 ka tawo ang nabuligan niya nga makatuon sang kamatuoran! Paano niya ini nahimo? Walay sapayan nga indi sia makapamalaybalay, nakakita sia sing paagi nga makapanaksi sing di-pormal sa kada adlaw sa mga nagapakigsugilanon sa iya.

⁴ Dapat landason sang aton mga kauturan sa Bosnia ang inaway kag kapurauton. Apang, tayuyon sila nga nagapadayon sa pagbantala sa iban. Sa Sarajevo ang mga manugbantala nagapromedyo sing 20 ka oras kada bulan sa pagbantala, kag nagadumala sila sing promedyo nga duha ka pagtuon sa Biblia ang tagsa.

⁵ Ang mga pamatan-on nagapadayag man sing kakugi para sa ministeryo. Isa ka pamilya nga mga Saksi sa Rwanda ang ginsulod sa isa ka kuwarto diin handa na sila nga patyon sang mga soldado. Ang pamilya nangayo sing pahanugot nga makapangamuyo anay. Gintugutan ini, kag ang lamharon nga anak nga babayi, si Deborah, nangamuyo sing mabaskog: “Jehova, sini nga semana nakapahamtang kami ni Papa sing lima ka magasin. Paano namon mabalikan ining mga tawo agod tudluan sila sang kamatuoran kag buligan sila nga makatigayon sing kabuhi?” Bangod sang iya mabakod nga pagtuo kag gugma para sa ministeryo, ang bug-os nga pamilya wala pagpatya.

⁶ Karon, dapat kita magbantay sa mga kahigayunan nga makapanaksi kag mapangita yadtong “matarong nga nahuyog para sa kabuhi nga walay katapusan.” (Binu. 13:48) Depende sa lokal nga mga kahimtangan, ang mga gulang sang kongregasyon nagahimos para sa grupo nga pagpanaksi sa aga, hapon, ukon gab-i. Ang mga artikulo sa Ang Aton Ministeryo, sirkito nga mga asambleya, kag mga distrito nga kombension masunson nga nagahatag sing suno-sa-tion nga mga panugda kag pagpalig-on sa pagpakigbahin sa nanuhaytuhay nga mga paagi sang pagpanaksi sa Ginharian. Dugang sa sini, ginahanas sang mga manugtatap sa sirkito kag distrito ang mga manugbantala sa pagpanaksi sa dalan, nagapakita sa ila kon paano magbantala sa teritoryo nga may negosyo, kag ginatudlo ang iban pa nga mga paagi sa pagpanaksi kon diin may tawo. Ini tanan nagapadaku: Walay untat sa pagpahayag sang maayong balita!

⁷ Ang mga apostoles ni Jesus masidla nga nagpahayag: “Indi kami mahimo makauntat sa pagpamulong nahanungod sa mga butang nga amon nakita kag nabatian.” Paano sila nakapadayon walay sapayan sang tanan nga mga sablag? Nangabay sila sing bulig kay Jehova, kag “napuno sila tanan sang balaan nga espiritu kag nagpamulong sila nga may kasidla sang pulong sang Dios.” (Binu. 4:20, 29, 31) Kon luyag gid naton ipahayag ang maayong balita sa walay untat kag kon panikasugan gid naton nga himuon ini bisan sa adlaw-adlaw, si Jehova magabulig sa aton.