Pamangkot

◼ Ano ang dapat huptan sa hunahuna may kaangtanan sa pagbasa sang mga parapo sa mga miting?

Ang kalabanan nga tion nga ginatigana para sa Pagtinuon sa Lalantawan kag sa Pagtinuon sa Libro sang Kongregasyon ginagamit sa pagbasa sang mga parapo. Nagakahulugan ini nga ang utod nga lalaki nga gintangdo sa pagbasa may mabug-at nga responsabilidad subong manunudlo. Dapat sia magbasa sa paagi nga ‘mahatagan sing kahulugan’ ang materyal agod indi lamang nga mahangpan ini sang mga tagpalamati kundi mapahulag man sa pagpanghikot. (Neh. 8:​8) Hanti, ang nagabasa dapat maghanda sing maayo sang iya asaynment. (1 Tim. 4:​13; tan-awa ang study 6 sang School Guidebook.) Yari ang pila ka kinahanglanon para sa makahulugan nga pagbasa sa publiko.

Gamita ang Nagakaigo nga Litok sa mga Tinaga: Hibalua sing una kon anong mga tinaga ang dapat padakuon agod mapaalinton ang nagakaigo nga paghangop.

Mitlanga sing Husto ang mga Tinaga: Ang husto nga pagmitlang kag matigda nga paghambal kinahanglan agod mahangpan sang tumalambong ang mga ekspresyon sa publikasyon. Tan-awa ang indi pamilyar nga mga tinaga sa diksionaryo.

Maghambal sing Mabaskog kag Mapagsik: Ang paghambal sing mapagsik nagapukaw sing interes, nagatandog sang balatyagon, kag nagapahulag sa tagpalamati.

Mangin Mainit kag Daw Nagasugilanon Lamang: Ang pagkanatural ginaupdan sang pagkatayuyon sa paghambal. Sa kalalangan sang paghanda kag pag-ensayo, ang nagabasa mahimo mangin relaks, kag ang resulta mangin makagalanyat sa baylo nga makatuluyo kag makatalaka.​—Hab. 2:2.

Basaha Kon Ano ang Naimprinta nga Materyal: Ang mga footnote subong man ang impormasyon sa mga parenthesis ukon mga bracket kinaandan na nga ginabasa sing mabaskog kon ginapaathag sini ang naimprinta nga mga tinaga. Ang wala lamang nalakip amo ang mga reperensia nga nagahatag lamang sang ginhalinan nga materyal. Ang footnote dapat basahon kon may kaangtanan ini sa parapo, ginapakilala ini paagi sa pagsiling: “Ang footnote mabasa . . . ” Pagkatapos ini mabasa, padayuna ang pagbasa sa nabilin nga bahin sang parapo.

Kon ginahimo sing maayo ang publiko nga pagbasa, isa ini sa mga paagi nga ‘matudluan naton ang iban nga tumanon ang tanan nga butang nga ginsugo’ sang aton Dakung Manunudlo.​—Mat. 28:20.