Ang Memoryal​—⁠Isa Gid Ka Importante Nga Okasyon!

¹ Sa Domingo, Marso 23, sa pagtunod sang adlaw, saulugon naton ang Memoryal sang kamatayon ni Cristo. (Luc. 22:19) Isa gid ini ka importante nga okasyon! Paagi sa paghupot sang iya integridad kay Jehova tubtob sa kamatayon, ginpamatud-an ni Jesus nga posible mahuptan sang tawo ang himpit diosnon nga debosyon bisan sa idalom sang daku nga pag-ipit, busa nagasakdag sang pagkamakatarunganon sang pagkasoberano ni Jehova. (Heb. 5:8) Dugang pa, ang kamatayon ni Cristo nag-aman sing himpit tawhanon nga halad nga kinahanglanon agod magawad ang katawhan, nagapaposible para magkabuhi sing dayon ang mga magatuo! (Juan 3:16) Paagi sa pagtambong sa Memoryal, mapakita naton ang aton tinagipusuon nga apresasyon sa gugma ni Jehova kag sa halad ni Jesus para sa aton.

² Ang tanan ginapalig-on nga sundan ang programa sa pagbasa sa Biblia nga gin-iskedyul para sa Marso 18-23, subong sang makita sa 1997 Calendar of Jehovah’s Witnesses. Subong man, ang paghinun-anon sang pamilya sa kapitulo 112-16 sang libro nga Ang Pinakabantog nga Tawo nga Nagkabuhi magabulig sa pagsentro sang aton igtalupangod sa labing importante nga semana sa maragtas sang tawo.

³ Madugangan mo bala ang tion nga ginahinguyang mo sa pag-alagad sa latagon sa panahon sang Memoryal? Nagakaigo para sa kongregasyon nga maghimo sing dugang pa nga hilikuton sa pag-alagad sa latagon sa mga adlaw antes kag pagkatapos sang Memoryal. Madamong manugbantala ang magahimulos sing bug-os sa lima ka talipuspusan sang semana sa Marso agod makaauxiliary payunir. Ngaa indi ka magbuylog sa ila? Kita tanan makapakigbahin sing bug-os sa pagpadaku sang pagkaimportante sang pagtambong sa Memoryal. Bangod magatupa ini sa Domingo, mangin mas mahapos para sa madamo nga makatambong. Pat-ura nga agdahon ang tanan nga estudyante sang Biblia kag ang iban nga mga interesado sa pagbuylog sa aton. Sugiri sila sang ginasiling sang pahina 127, parapo 18, sa Ihibalo nga libro nahanungod sa isa ka adlaw sa tuig nga dapat gid saulugon.

⁴ Ang mga gulang dapat magplano sing abanse agod pat-uron nga ang Kingdom Hall mahipid kag matinlo. Dapat himuon ang mga kahimusan nga may isa nga magahanda sing mga emblema. Ang pagpasa sa mga emblema dapat nga organisado gid. Ang mabuligon nga mga panugda kon paano naton mapakita ang pagtahod para sa Panihapon sang Ginuo ginhatag sa Ang Lalantawan sang Pebrero 15, 1985, pahina 19.

⁵ Handai ining labing importante nga okasyon sa 1997 nga may tudok nga apresasyon tungod sa tanan nga nahimo sang kamatayon ni Jesus para sa aton. Magtambong sa gab-i sang Marso 23, nga ang matuod nga mga Cristiano bisan diin nga lugar matutom nga nagasaulog sing Memoryal.