“Ibantala sing Bug-os ang Pulong sang Dios”

¹ Kon hanuot mo nga ginapasalamatan ang maayo nga butang nga nabaton mo, wala mo bala ini ginapakita sa imo panimuot kag mga ginahimo? Siempre huo! Bahin sa pagkaayo kag mahigugmaon nga kaayo nga ginapakita ni Jehova sa katawhan, talupangda kon ano ang reaksion ni apostol Pablo. Sia nagtu-aw: “Salamat sa Dios tungod sang iya di-malaragway nga walay bayad nga dulot”! Ano ang ginalakip sining “walay bayad nga dulot”? Ang tanan nga “labaw nga di-bagay nga kaayo sang Dios” nga ginpakita sa aton, ang labing daku sa sini amo ang pagdulot sa iya mismo Anak subong gawad para sa aton mga sala.​—⁠2 Cor. 9:​14, 15; Juan 3:⁠16.

² Ang pagpasalamat bala ni Pablo sa hambal lamang? Indi gid! Sa madamong paagi ginpakita niya ang iya tudok nga pagpasalamat. Nabalaka gid sia sa espirituwal nga kaayuhan sang iya mga masigka-Cristiano kag luyag niya himuon ang masarangan niya agod buligan sila nga makabenepisyo sing bug-os gikan sa mahigugmaon nga kaayo sang Dios. Tuhoy sa ila, si Pablo nagsiling: “Subong nga may malum-ok nga pagpalangga sa inyo, nahamuot kami sa pagpaambit sa inyo, indi lamang sang maayong balita sang Dios, kundi man sang amon kaugalingon nga mga kalag, bangod nga nangin mahal gid kamo sa amon.” (1 Tes. 2:8) Magluwas sa pagbulig sa mga bahin na sang kongregasyon nga matigayon ang ila kaluwasan, si Pablo walay kakapoy nga nagbantala sing maayong balita, naglakbay sing linibo ka kilometro sa duta kag dagat agod pangitaon ang “husto nga napahamtang para sa kabuhi nga walay katapusan.” (Binu. 13:48) Ang tudok nga pagpasalamat ni Pablo tungod sa tanan nga ginhimo ni Jehova sa iya nagpahulag sa iya nga “ibantala sing bug-os ang pulong sang Dios.”​—⁠Col. 1:25.

³ Ang aton bala pagpasalamat tungod sa tanan nga ginhimo ni Jehova sa aton wala nagapahulag sa aton nga buligan sa espirituwal nga paagi ang mga nagakinahanglan sing bulig sa aton kongregasyon? (Gal. 6:10) Kag wala bala kita ginapahulag nga makigbahin sing bug-os sa pagbantala sing maayong balita sang Ginharian sa aton bug-os nga teritoryo?​—⁠Mat. 24:14.

⁴ Isa ka Kahigayunan Agod Mapakita ang Pagpasalamat: Kada tuig ang Memoryal sang kamatayon ni Cristo nagahatag sa aton sing pinasahi nga kahigayunan agod mapakita ang pagpasalamat sa tanan nga ginhimo ni Jehova kag ni Jesus sa aton. Indi ini isa lamang ka miting ukon isa lamang ka pagdumdom sa isa ka hitabo. Si Jesus nagsiling: “Padayon ninyo nga himuon ini sa handumanan nakon.” (Luc. 22:19) Ang Memoryal sang kamatayon ni Cristo isa ka okasyon agod pamalandungan kon ano gid nga persona si Jesus. Tion ini agod kilalahon nga buhi kag aktibo sia karon, kag ginhatagan sia sing gahom kag pagkahari bangod sang iya matutom nga dalanon sang kabuhi kag pagsakripisyo. Ini nga selebrasyon isa man ka kahigayunan agod mapakita ang aton pagpasakop sa pagkaulo ni Cristo samtang ginatuytuyan niya ang mga hilikuton sang Cristianong kongregasyon. (Col. 1:17-20) Ang tanan nga katawhan sang Dios dapat matinahuron nga magtambong sa Memoryal sang kamatayon ni Cristo. Saulugon ini karon nga tuig sa tapos sang pagtunod sang adlaw sa Huebes, Marso 28, 2002.

⁵ Bangod sang makugi nga panikasog antes sang pagsaulog sa Memoryal sang nagligad nga tuig, may yara kita pinakamataas nga tumalambong nga 424,306 sa sanga sang Pilipinas. Pila ang magatambong sini nga tuig? Nasandig ini sing daku sa aton ‘pagpangabudlay sing lakas kag pagpanikasog,’ nga ginabuligan ang madamo nga makatambong.​—⁠1 Tim. 4:10.

⁶ Magluwas sa pagtambong sa Panihapon sang Ginuo, madugangan man naton ang aton hilikuton sa pag-alagad sa latagon. Pat-od gid nga linibo ka kauturan ang magaauxiliary payunir sa isa ukon kapin pa ka bulan. Kada tuig sa sulod sang nagligad nga lima ka tuig, may yara kita promedyo nga 41,618 ka auxiliary payunir sa panahon sang Memoryal, ang Marso tubtob Mayo. Sang 2001 ang nagpayunir 33,802, nga kubos sa promedyo. Mahimos mo bala ang imo hilikuton agod maagom ang pribilehiyo nga makaauxiliary payunir karon nga tuig? Isa ini ka maayong paagi agod ipakita ang imo hanuot nga pagpasalamat tungod sa mahigugmaon nga dulot sang Dios nga paghalad kay Cristo. Makasalig ikaw nga pakamaayuhon ka ni Jehova, subong sang ginapakita sang masunod nga mga eksperiensia.

⁷ Ang isa ka utod nga babayi nga may bug-os tion nga sekular nga trabaho nagsulat tuhoy sa iya pag-auxiliary payunir sang nagligad nga Marso: “Ginpalig-on sang Pebrero 2001 nga Ang Aton Ministeryo sa Ginharian ang tanan, kon ginatugot sang ila kahimtangan, nga mag-auxiliary payunir sa panahon sang Memoryal. Sanglit ang Marso may lima ka Sabado, nagakabagay gid ini sa akon iskedyul. Gani namat-od ako nga isumiter ang akon aplikasyon.” Sa pamuno sang bulan, nagtalana sia sing tulumuron nga makasugod sing pagtuon sa Biblia sa puluy-an. Nagmadinalag-on bala sia? Huo, sa iya ika-52 nga oras sang pagpanaksi sadto nga bulan! Ang iya konklusion? “May yara makalilipay nga mga pagpakamaayo kon manikasog kita sing labi pa.”

⁸ Paano nakabenepisyo ang isa ka pamilya nga nagpayunir sing dungan? Ginkabig sang nagpayunir nga isa ka pamilya nga may apat ka katapo ang nagligad nga Abril subong isa ka bulan nga indi gid malipatan. Ang iloy nagsiling: “May positibo gid kami nga panimuot kada adlaw, kay nahiusa kami sa ministeryo! Ang paghambalanay tuhoy sa amon adlaw-adlaw nga hilikuton sa pag-alagad sa tion sang panihapon makalilipay gid.” Ang anak nga lalaki nagsiling: “Nalipay ako sa pag-upod kay Dad sa pag-alagad sa latagon sa sulod sang isa ka semana, kon san-o kinaandan na nga nagatrabaho sia.” Ang amay nagdugang: “Subong ulo sang pamilya, nalipay ako nga nangabudlay kami sing magkaupod sa labing importante nga hilikuton sa panahon naton.” Makapayunir bala ang imo pamilya? Ngaa indi ini paghambalan upod sa imo pamilya kag tan-awon kon bala makaauxiliary payunir ang inyo bug-os nga panimalay sa sining panahon sang Memoryal?

⁹ Mahimo Bala Naton ang Marso nga Aton Pinakamaayo Gid nga Bulan? Ang suplemento sang Marso 2000 nga Ang Aton Ministeryo sa Ginharian nagpamangkot: “Sarang Bala Naton Mahimo ang Abril 2000 nga Aton Pinakamaayo Gid nga Bulan?” Ano ang nangin sabat? Nalabawan naton ang aton nagligad nga kataason sang mga manugbantala kag tumalambong sa Memoryal, kag 19,704 ang nag-auxiliary payunir sadto nga bulan. Nagdugang man ang kadamuon sang oras, napahamtang nga magasin, kag pagduaw liwat, kag ang aton pagtuon sa Biblia naglab-ot sa 100,156. Nadumduman mo bala ang kapagsik sa inyo kongregasyon bangod sang madamong espirituwal nga hilikuton sadtong pinasahi nga bulan? Matupungan ukon malabawan pa bala naton ini karon nga tuig? Paagi sa nahiusa nga panikasog sang tanan, ang Marso 2002 mahimo mangin “Ang Aton Pinakamaayo Gid nga Bulan.” Ngaa Marso?

¹⁰ May duha ka rason kon ngaa ang Marso isa ka pinasahi nga bulan sa pagpanghikot. Una, ang Memoryal saulugon malapit na sa katapusan sang Marso, nga nagahatag sa aton sing nagakaigo nga tion sa nauna nga bahin sang bulan agod maagda ang madamo sa pagtambong. Ikaduha, karon nga tuig ang Marso may yara lima ka Sabado kag Domingo, nga nagapahapos para sa mga nagatrabaho ukon sa mga nagaeskwela nga mag-auxiliary payunir. Ngaa indi ka karon maglingkod kag maghimo sing praktikal nga iskedyul, nga ginagamit ang kalendaryo nga gin-aman sa sining suplemento? Ang pag-auxiliary payunir mahimo nga mas mahapos sangsa ginahunahuna mo. Halimbawa, paagi sa pag-iskedyul sing 8 ka oras sa pag-alagad sa latagon sa tagsa sang lima ka talipuspusan sang semana, 10 ka oras na lamang ang kinahanglan nga iskedyulon mo sa nabilin nga bahin sang bulan agod malab-ot ang kinahanglanon nga 50 ka oras.

¹¹ Ano ang mahimo sang mga gulang agod buligan ang tanan sa kongregasyon nga “ibantala sing bug-os ang pulong sang Dios”? Palig-una ang kapagsik paagi sa mga bahin sa miting kag personal nga pagpakigsugilanon. Ang mga manugtatap sang Pagtinuon Sang Kongregasyon sa Libro kag ang ila mga kabulig mahimo manguna nga sugilanunon ang kada isa nga natangdo sa ila grupo kag maghatag sing personal nga bulig. Ang pila ka pulong sang pagpalig-on ukon pila ka praktikal nga mga panugda mahimo nga amo lang ang kinahanglan. (Hulu. 25:11) Makita sang madamo nga paagi sa diutay lamang nga pagbag-o sa ila iskedyul, may pribilehiyo sila nga mag-auxiliary payunir. Sa madamo nga kongregasyon, ang kalabanan, kon indi man tanan, sang mga gulang kag mga ministeryal nga alagad kag ang ila mga asawa nagpahamtang sing maayo nga halimbawa paagi sa pag-auxiliary payunir sing dungan sa panahon sang Memoryal. Nagpalig-on ini sa madamo nga manugbantala nga magbuylog sa ila. Bangod sang mga limitasyon sa panglawason ukon iban pa nga mga kahimtangan, ang iban nga mga manugbantala mahimo nga indi makapayunir, apang sarang sila mapalig-on sa pagpakita sang ila pagpasalamat paagi sa paghimo sang masarangan nila sa ministeryo upod sa iban nga mga katapo sa kongregasyon.

¹² Ang kadalag-an nagadepende sa maayo nga pagplano sang mga gulang. Ang mga miting sa pag-alagad sa latagon dapat iskedyulon sa kombeniente nga mga tion sa bug-os nga semana. Kon mahimo, ang manugtatap sa pag-alagad magatangdo sing abanse sang kalipikado nga mga utod nga lalaki sa pagdumala sa tanan nga miting sa pag-alagad. Kinahanglan ang maayo nga paghanda agod ining mga miting indi magsobra sa 10 tubtob 15 ka minuto, lakip na ang pag-organisar sa mga grupo, pagtangdo sing teritoryo, kag pangamuyo. (Tan-awa ang “Pamangkot” sa Septiembre 2001 nga Ang Aton Ministeryo sa Ginharian.) Ang iskedyul sang hilikuton para sa bulan dapat ipaathag sing maayo sa kongregasyon kag ibutang sa bulletin board.

¹³ Dapat pat-uron nga may bastante nga teritoryo. Makigsapol ang manugtatap sa pag-alagad sa utod nga nagauyat sing mga teritoryo agod maghimo sing mga kahimusan nga mapangabudlayan ang mga teritoryo nga talagsa lang ginatuptupan. Dapat padakuon ang pagpangabudlay sa mga not-at-home (mga balay nga wala sing tawo sa tion sang pagbantala), pagpanaksi sa mga dalan kag sa mga balaligyaan, kag pagpanaksi sa gab-i. Kon nagakaigo, ang iban nga mga manugbantala mahimo buligan sa pagpanaksi sa telepono.

¹⁴ Buligi Sila sa Pag-alagad Liwat: May yara bala sa teritoryo sang inyo kongregasyon nga indi na aktibo sa pagbantala sing maayong balita? Bahin gihapon sila sang kongregasyon kag nagakinahanglan sing bulig. (Sal. 119:176) Bangod malapit na matapos ang katapusan sining daan nga kalibutan kag ang bag-ong kalibutan yara lamang sa unahan, may rason gid kita agod manikasog nga buligan ang nangin mga di-aktibo. (Roma 13:​11, 12) Diri sa Pilipinas sang nagligad nga lima ka tuig, kapin sa 3,150 ka tawo kada tuig ang nabuligan kag nangin aktibo liwat. Ano ang mahimo naton agod buligan ang madamo pa nga mapasag-uli ang ila anay gugma kag pagsalig?​—⁠Heb. 3:12-14.

¹⁵ Luyag binagbinagon sang hubon sang mga gulang kon paano nila mabuligan ang nangin mga di-aktibo sang nagligad nga pila ka tuig. (Mat. 18:12-14) Dapat usisaon sang sekretaryo ang mga Congregation’s Publisher Record card kag tandaan ang tanan nga nangin di-aktibo. Dapat himuon ang pinasahi nga panikasog paagi sa kahimusan nga pagbantay agod makahatag sing bulig. Mahimo duawon sang isa ka gulang ang isa ka manugbantala bangod kilalahay kag updanay anay sila, ukon mahimo pangabayon ang bulig sang iban nga mga manugbantala. Mahimo nga sila anay ang nagtuon sa sining di-aktibo na karon kag malipay sa kahigayunan nga makabulig sa sining tion sang kinahanglanon. Ginalauman nga madamo sining nangin di-aktibo ang mapahulag sa pagbantala liwat sing pulong sang Dios. Kon kalipikado sila, wala na sing maayo pa nga tion nga magsugod sila sangsa panahon sang Memoryal!​—⁠Tan-awa ang “Pamangkot” sa Nobiembre 2000 nga Ang Aton Ministeryo sa Ginharian para sa dugang nga mga detalye.

¹⁶ Kalipikado Bala ang Iban sa Pagbantala? Padayon nga ginapakamaayo ni Jehova ang iya katawhan paagi sa pagpasulod sa “kalahamut-an nga mga butang sang tanan nga pungsod.” (Hag. 2:7) Kada tuig linibo ang nangin kalipikado subong di-bawtismado nga mga manugbantala. Sin-o sila? Ang mga kabataan sang mga Saksi ni Jehova kag ang nagauswag nga mga estudyante sang Biblia. Paano naton mahibaluan kon bala kalipikado sila nga mangin mga manugbantala sing maayong balita?

¹⁷ Mga Kabataan sang mga Saksi ni Jehova: Madamong kabataan ang tinuig na nga nagaupod sa ila mga ginikanan sa pagpamalaybalay, bisan nga wala pa sila nagaalagad subong di-bawtismado nga mga manugbantala. Ang Marso mahimo nga amo ang maayong tion agod magsugod sila. Paano mo mahibaluan kon bala kalipikado ang imo anak? Ang pahina 100 sang Organisado sa Pagtuman sa Aton Ministeryo nagasiling nga “kon ang bata huaran sa iya paggawi kag personal nga makapabutyag sang iya pagtuo paagi sa pagpakighambal sa iban nahanungod sa maayong balita, nga ginapahulag sang tagipusuon nga himuon ina.” Kon nagahunahuna ka nga ang imo anak kalipikado, makighambal sa isa sang mga gulang sa Komite sa Pag-alagad Sang Kongregasyon.

¹⁸ Kalipikado nga mga Estudyante sang Biblia: Sa tapos ang isa ka estudyante sang Biblia makakuha sing ihibalo kag makatambong sa mga miting sa madugaydugay nga tion, mahimo luyag niya nga mangin manugbantala sang Ginharian. Kon nagadumala ka sing pagtuon upod sa sining estudyante, binagbinaga ining mga pamangkot: Nagauswag bala sia, suno sa iya edad kag ikasarang? Napaambit na bala niya sing di-pormal ang iya pagtuo sa iban? Nagasuklob bala sia sing “bag-o nga personalidad”? (Col. 3:10) Nasunod bala niya ang mga kalipikasyon para sa di-bawtismado nga mga manugbantala, nga ginbalay sa pahina 97-9 sa Aton Ministeryo nga libro? Kon amo, dapat mo pakig-angutan ang Komite sa Pag-alagad Sang Kongregasyon agod mahimo ang kahimusan nga ang duha ka gulang makigsapol sa imo kag sa estudyante. Kon kalipikado sia, pahibaluon sia sang duha ka gulang nga makasugod na sia sa pagministeryo sa publiko.

¹⁹ Kamusta Naman ang Abril kag Mayo? Ini man mangin pinasahi nga mga bulan para sa dugang nga hilikuton sa ministeryo sa latagon. Madamo sang nagaauxiliary payunir sa Marso ang mahimo nga magpayunir liwat sa Abril kag/ukon Mayo. Sa Abril kag Mayo, hatagan naton sing prioridad ang paggamit sa Lalantawan kag Magmata! nga mga magasin sa ministeryo. May mapuslanon gid ini nga epekto sa kabuhi sang mga nagabasa sini! Daku ang nahimo sining mga magasin agod matigayon ang makalilipay nga pag-uswag sa bug-os nga kalibutan. Himuon ang pinasahi nga panikasog agod matanyag ang mga magasin sa Abril kag Mayo sa madamo nga tawo. Magplano karon nga makigbahin sing bug-os.

²⁰ Bangod sang naplano nga dugang nga hilikuton sa pagbantala, kinahanglan mo bala dugangan ang kadamuon sang mga magasin nga ginakuha mo paagi sa kongregasyon? Sa bug-os nga tuig sang pag-alagad, itanyag naton Ang Lalantawan kag Magmata! kada Sabado, ang aton gintalana nga Adlaw Sang Magasin. Apang, sanglit madamo ang magaauxiliary payunir kag duha ka bulan nga itanyag naton ang mga magasin, mahimo kinahanglan nga dugangan ang imo order nga magasin sa kongregasyon. Kon amo, palihug pahibalua gilayon ang alagad sang magasin sa inyo kongregasyon. Sa amo man nga tion, dapat pat-uron sang alagad sang literatura nga may yara madamo nga suplay sang Luyag Mo Bala Dugangan ang Imo Ihibalo sa Biblia? para magamit sang tanan.

²¹ Madamo ang nagapasalamat tungod sa artikulo sa Ang Aton Ministeryo sa Ginharian nga natig-uluhan “Kon Ano ang Imo Isiling Tuhoy sa mga Magasin.” Ginahimuslan mo bala ini nga aman paagi sa pagtuon sa huwaran nga mga presentasyon sa magasin? Ngaa indi mo paggamiton ang isa ka bahin sang inyo pamilya nga pagtuon sa Biblia kada semana agod ensayuhon ining mga presentasyon?

²² Himusli sing Bug-os Ining Panahon sang Memoryal: Kaangay ni apostol Pablo, ipakita naton kay Jehova kon daw ano ang pagpasalamat naton sa “iya di-malaragway nga walay bayad nga dulot” paagi sa aton pagpakigbahin sing bug-os sa espirituwal nga mga hilikuton nga ginaplano para sa sining panahon sang Memoryal. Nagalakip ini sang (1) pagtambong sa pinakaimportante nga okasyon sang tuig, ang pagsaulog sa Panihapon sang Ginuo sa Huebes, Marso 28, 2002; (2) pagbulig nga mapasag-uli sang diaktibo ang ila “nahauna nga gugma” (Bug. 2:⁠4; Roma 12:11); (3) pagbulig sa aton mga kabataan kag sa mga estudyante sa Biblia nga mangin kalipikado subong di-bawtismado nga mga manugbantala; kag (4) pagpakigbahin sing bug-os sa hilikuton nga pag-ebanghelyo, nagaauxiliary payunir pa gani sa Marso, Abril, kag Mayo kon ginatugot sang imo kahimtangan.​—⁠2 Tim. 4:5.

²³ Ginapangamuyo namon sing hugot nga kita tanan magapakigbahin sing bug-os sa pagbantala sing maayong balita sang Ginharian sa sining panahon sang Memoryal, sa amo ginapakita ang aton daku gid nga apresasyon sa tanan nga ginhimo ni Jehova para sa aton.

[Kahon sa pahina 6]

Personal nga Iskedyul sa Pag-alagad sa Latagon Para sa Marso 2002

Domingo Lunes Martes Mierkoles Huebes Biernes Sabado

1 2

Adlaw Sang Magasin

3 4 5 6 7 8 9

Adlaw Sang Magasin

10 11 12 13 14 15 16

Adlaw Sang Magasin

17 18 19 20 20 22 23

Adlaw Sang Magasin

24 25 26 27 28 29 30

MEMORYAL

SA TAPOS SANG

PAGTUNOD SANG ADLAW

Adlaw Sang Magasin

31

Makaiskedyul ka bala sing kabug-usan nga 50 ka oras sa pag-auxiliary payunir sa Marso