Ngaa Ginahimo Nila Ini?
1 Gintagna sadto anay ang tuhoy kay Cristo nga ang ‘bug-os nga kakugi sa balay ni Jehova magalamon sa iya.’ (Sal. 69:9) Ang kakugi ni Jesus para sa putli nga pagsimba kay Jehova nagpahulag sa iya nga unahon ang ministeryo. (Luc. 4:43; Juan 18:37) Ini nga kakugi makita man karon sa ministeryo sang mga Saksi ni Jehova. Sang nagligad nga tuig sang pag-alagad, may promedyo nga 645,509 sa bug-os nga kalibutan ang nakigbahin sa payunir nga pag-alagad kada bulan. Tuhoy sa aton dedikasyon sa Dios, dapat binagbinagon sing mapangamuyuon sang tagsatagsa sa aton kon bala mahimo kita makaalagad subong auxiliary ukon regular payunir.—Sal. 110:3; Manugw. 12:1; Roma 12:1.
2 Madamo sa sining materyalistiko nga kalibutan ang nabudlayan sa paghangop kon ngaa ang isa dapat mangabudlay sing lakas sa ministeryo nga wala naman sing ginabaton nga bisan anong benepisyo nga kuwarta ukon kabantugan. Ngaa ginahimo nila ini? Nakahibalo ang mga payunir nga nagapakigbahin sila sa hilikuton nga nagaluwas sing kabuhi. Tungod sa ila gugma kay Jehova kag sa ila isigkatawo, nakabatyag sila sing personal nga obligasyon nga magbulig sa pagluwas sa kabuhi. (Roma 1:14-16; 1 Tim. 2:4; 4:16) Ang isa ka mag-asawa nga payunir nagsiling: “Ngaa nagapayunir kami? Makapangatarungan bala kami kay Jehova kon wala kami magpayunir?”
3 Amo sini ang ginsulat sang isa pa ka utod nga babayi tuhoy sa iya pamat-od nga magpayunir: “Naghimo kami sing plano sang akon bana nga mangabuhi kami sa kinitaan lamang sang isa sa amon, nga nagkahulugan sang pagsikway sa tanan nga indi tama ka kinahanglanon. Apang, ginpakamaayo kami sing bugana ni Jehova, nga wala gid magpatumbaya sa amon. . . . Nakita ko ang tunay nga rason sa pagkabuhi—ina amo ang pagbulig sa mga nagakinahanglan nga mahibaluan nga si Jehova indi malayo sa mga nagapangita sa iya.” Ang mga payunir kontento na sa mga kinahanglanon sa kabuhi samtang hanuot sila nga nagatinguha nga matigayon ang espirituwal nga mga bahandi nga magapabilin sing dayon.—1 Tim. 6:8, 18, 19.
4 Kon ginatugot sang imo personal nga mga kahimtangan, ngaa indi mo buylugan ang ginatos ka libo ka payunir sa bug-os nga kalibutan kag agumon ini man nga kalipay?