1998-99 “Dalanon Sang Dios sa Kabuhi” nga Distrito nga mga Kombension
1 Ang Hulubaton 10:29 nagapahanumdom sa aton nga “ang dalanon ni Jehova isa ka kuta.” Nagakaigo gid ang tema sang kombension sini nga tuig—“Dalanon Sang Dios sa Kabuhi”! Paano gid bala binagbinagon ini nga tema sa bug-os nga tatlo ka adlaw nga programa? Kita tanan malangkagon nga nagahulat kon ano ang ginhanda para sa aton.
2 Ang mga misyonero, international servant, ukon ang iban pa nga nagaalagad sa mga pungsod sa luwas mahimo magatambong sa pila ka kombension sini nga tuig. Mahimo sila interbyuhon sa programa. Ang programa sang kombension magalakip man sang mga report tuhoy sa kon paano ginapakamaayo ni Jehova ang hilikuton sa lainlain nga mga teritoryo.
3 Takus Gid Ini Tambungan: Madamo sang aton kauturan sa Aprika ang nakaeksperiensia sing mga kabudlayan bangod sang inaway kag kagamo sa pila ka bahin sa sinang kontinente. Ginakabig nila ang mga kombension sang katawhan ni Jehova subong kinahanglanon nga bahin sang ila kabuhi. Ang iban kinahanglan nga maglakat sing malayo agod makatambong sa kombension, apang wala sila maghunahuna nga indi ini pagtambungan. Ang 73-anyos nga utod nga lalaki sa Demokratiko nga Republika sang Congo (Zaire anay) naglakat sing mga 450 kilometros agod makatambong sa kombension. Nakalab-ot sia pagkatapos sang 16 ka adlaw nga paglakat, nga nagapalamanog ang mga tiil, apang malipayon nga didto sia. Pagkatapos sang kombension, naglakat sia pauli nga may daku nga kalipay kag napabakod sa espirituwal. Amo ini ang iya ginahimo sa sulod sang mga tinuig!
4 Sa Mozambique gintaklad sang manugtatap sa distrito kag sang iya asawa ang mataas nga bukid kag gintabok nga nagalakat ang malapad kag duludisierto nga duog agod makatambong sa sirkito nga asambleya. Ginlakat nila ang 90 kilometros sa sulod sang 45 ka oras. Napalig-on sing daku ang tanan nga nagtambong sa maayong halimbawa sining mag-asawa. Madamong pamilya ang nanikasog sing subong man agod makatambong. Ang manugtatap sa distrito nagreport nga ang pila ka kauturan, lakip na ang 60 anyos nga utod, naglakat sing 200 kilometros!
5 Nakahimo ka na bala sing mga plano agod makatambong sa kombension sini nga tuig? Ayhan indi kinahanglan nga maglakat ka sing malayo, apang kinahanglan ang panikasog kag sakripisyo agod makatambong ka kag ang imo pamilya. Maghimo sing kahimusan nga matambungan ang bug-os nga programa halin sa umpisa tubtob sa matapos. Madamong estudyante sa Biblia ang nagauswag padulong sa dedikasyon. Ang ila pagtambong sa kombension magabulig sa ila agod makadesisyon sing husto. Gin-agda mo bala ang imo mga estudyante sa Biblia kag ang iban nga mga interesado sa pagtambong upod sa imo?
6 Tatlo-ka-Adlaw nga Programa: Sini nga tuig ang programa ipresentar sa 51 ka kombension sa Pilipinas. Ang petsa kag lokasyon sini ginalista sa ulihi nga bahin sini nga suplemento. Nahibaluan mo na sa karon kon diin nga kombension ginatangdo ang inyo kongregasyon.
7 Pinasahi nga Patalupangod: Importante ilabi na sa mga kombension sa Metro Manila sini nga tuig nga tambungan lamang sang tanan sa sina nga lugar ang kombension diin natangdo ang ila kongregasyon. Magahiwat kita sing anom ka sunodsunod nga kombension sa Assembly Hall sa Quezon City. Limitado lamang ang pulungkuan sa tilipunan, gani yadto lamang ang natangdo sa isa ka partikular nga talipuspusan sang semana ang dapat magtambong, agod indi magginutok. Ang mga sirkito nga natangdo sa kada kombension ginapakita sa Septiembre nga Ang Aton Ministeryo sa Ginharian. Ang imo pagtahod kag kooperasyon sa sining mga kahimusan magapat-od nga ang tanan nga butang himuon sing nagakaigo kag suno sa kahimusan.—1 Cor. 14:33, 40.
8 Sa Biernes kag Sabado, ang programa magasugod sa alas 8:30 s.a. Sa Domingo magasugod ini sa alas 9:00 s.a. Sa Biernes kag Sabado, ang programa matapos sa alas 5:00 s.h., kag sa Domingo, sa alas 4:00 s.h.
9 Samtang nagalakbay kita pakadto kag pauli halin sa kombension, dapat kita mangita sing mga kahigayunan nga makapanaksi sing dipormal. Ang mga nagatrabaho sa gasolinahan, klerk sa balaligyaan, kag serbidor mahimo nga interesado sa mensahe sang Ginharian. Maghanda para sa sini paagi sa pagdala sing mga tract, bag-ong magasin, brosyur, ukon iban pa nga literatura, agod mahimuslan mo ang kahigayunan nga mapanaksihan ang mga tawo nga ayhan indi mapalab-utan sing maayong balita.—2 Tim. 3:17.
10 “Hatagi Sing Igtalupangod Kon Paano Kamo Nagapamati”: Maalamon nga pamatian sang mga delegado sang kombension ang laygay sa Lucas 8:18. Ang tanan ginapalig-on sa pagdala sing Biblia, subong man sing songbook kag kuwaderno. Pamatii sing maayo ang pangunang mga punto gikan sa kada presentasyon, kag maghimo sing malip-ot nga mga nota. Pamangkuta ang imo kaugalingon kon paano mo iaplikar sing personal ang materyal. Sa tagsa ka gab-i sa tion sang kombension, antes ka magtulog, ngaa indi mo repasuhon ang imo nota kag binagbinagon kon daw ano ka suod ikaw nga nagalakat sa dalanon ni Jehova.—Hulu. 4:10-13.
11 Natalupangdan nga sa tion sang sesyon, ang pila nagaguwa sa awditoryom kag nagapungko sa ila mga salakyan, sa amo nawasi nila ang presentasyon sang programa. Ang iban nakita nga nagadayandayan sa mga koridor sa tion nga dapat nagapungko sila sa sulod sang awditoryom kag nagapamati. Ang mga grupo sang mga pamatan-on nakita nga naghalin sa kombension sa tungatunga sang hapon. Ang “matutom kag mainandamon nga ulipon” nagahinguyang sing tion kag panikasog agod makaaman sing maayo nga panudlo, nga ginakinahanglan naton tanan. (Mat. 24:45) Maayo nga pamatian naton ang laygay ni Pablo: “Kinahanglan naton hatagan sing labi pa sangsa kinaandan nga igtalupangod ang mga butang nga nabatian naton, agod indi kita maanod palayo.” (Heb. 2:1) Ang pila sa mga alagad ni Jehova sang una nga panahon nakahimo sing daku nga kasaypanan sa ila kabuhi bangod wala nila pagpamatii sing maayo ang mga pahanumdom ni Jehova. Pat-od gid nga luyag naton likawan ang kaanggid nga sayop.—2 Hari 17:13-15.
12 Pamayo nga Nagapadungog kay Jehova: Sa sining ital-ital nga mga tion, dapat kita maghatag sing labi pa sangsa kinaandan nga igtalupangod agod indi kita maimpluwensiahan sang espiritu sining kalibutan. (1 Cor. 2:12) Ang aton pamayo kag pamustura dapat nga maugdang kag nagapabanaag sang dignidad sang Dios nga aton ginasimba. (1 Tim. 2:9, 10) Indi kinahanglan ang malahalon nga panapton agod malakip sa mga ‘nagapuni sa panudlo sang aton Manluluwas, ang Dios.’ (Tito 2:10) Tan-awa ang maayo nga pamustura sang pamilya sa retrato sa panghapin sang Septiembre 15, 1997, nga guwa sang Ang Lalantawan. Wala gid sing duhaduha kon sin-o ang ila ginarepresentar! Indi pagpakadiutaya ang makusog nga panaksi nga mahatag naton paagi sa pamayo nga nagapadungog kay Jehova.
13 Ang isa ka 16-anyos nga Saksi nagsaysay nga sang nagkadto sila sang iya utod nga lalaki sa restawran isa ka gab-i pagkatapos sang sesyon, nakita nila ang pila ka kauturan nga lalaki kag babayi nga nag-ilis sing dinagakaigo nga panapton. Apang, may maayo nga reaksion ang madamo nga suki sang restawran sang nakita nila ang mga Saksi nga nagapanapot sing mahipid kag sing nagakaigo kag nagasuksok sang ila badge card. Naghatag ini sing kahigayunan agod mapanaksihan ang pila sa mga nagakaon.
14 Paggawi nga Nagapahamuot kay Jehova: Nahibaluan naton nga ang aton Cristianong paggawi mahimo makaapektar sa kon paano ginatamod sang iban ang matuod nga pagsimba. Busa, luyag naton maggawi sa tanan nga tion sa paagi nga takus sa maayong balita kag nagapadungog kay Jehova.—Filip. 1:27.
15 Sang nagligad nga tuig, isa ka distrito nga kombension ang ginhiwat sa nahauna nga tion sa aminhan sang Angola. Sang ikaduha nga adlaw sang kombension, duha ka pulis ang ginpadala sa kombension agod pat-uron ang kahim-ong. Nagtener sila sa bug-os nga adlaw. Pagkatapos sang isa ka adlaw, nagpabutyag sila sing pagdayaw tuhoy sa ila nabatian kag tuhoy sa mahim-ong nga paggawi nga ila nakita. Ang isa sa ila nagkomento: “Ngaa ginpadala pa kami diri? Nahibaluan namon nga ginahuptan sang mga Saksi ni Jehova ang kahim-ong sa ila mga pagtilipon.”
16 Isa ka katapo sang partido politika sa isa ka pungsod sa Aprika ang nagdangop sa Europa sang ang tanan nga katapo sang iya partido ginpatay. Madamo sia sing personal nga mga problema kag napung-awan gid sia. Sang ulihi nagtuon sia sa Biblia. Samtang nagatambong sa iya nahaunang distrito nga kombension, nagdayaw gid sia nga ang mga tawo nga may lainlain nga ginhalinan nagtipon sing tingob nga may paghidait kag paghiusa. Nakumbinsi sia nga nakita niya ang kamatuoran, kag sadto nga kombension namat-od sia nga bugtuon ang tanan nga kaangtanan sa politika. Sang ulihi nabawtismuhan sia, kag karon sia kag ang iya kabataan nagaalagad kay Jehova.
17 Ano ang epekto sang aton paggawi sa mga kombension sini nga tuig sa mga tawo nga mahimo magtambong sa nahauna nga tion? Makita bala nila ang espiritu sang kooperasyon kon nagapangabudlay kita sing tingob subong mga boluntaryo? Magadayaw bala sila sa katinlo sang aton palibot kag sa makita nila nga antes maghalin sa kombension, ginapudyot naton kag sang aton kabataan ang sagbot malapit sa aton pulungkuan? Makita bala nila ang aton maayo nga paggawi samtang nagalakbay kita pakadto kag pauli halin sa aton mga dalayunan kag kombension? Makita bala nila nga ginabantayan sing maayo sang mga ginikanan ang ila kabataan sa tanan nga tion? Pat-uron naton nga ginahimo naton ang aton bug-os nga masarangan agod mahamuot ang tanan nga nagatan-aw sa aton.
18 Pagbayad sa Gastos sa Kombension: Ang tiket agod makasulod kag makatan-aw sing hampang ukon iban pa nga palaguwaon sa istadyum ukon kombension mahimo nga mahal sa sekular nga kalibutan sa karon. Bangod ini sa mahal nga arkila sa metropolitan nga mga lugar. Ang Sosiedad may yara pirme “seats free, no collections” nga pagsulundan sa mga kombension. Kon amo, paano mabayaran ang arkila kag ang iban pa nga gastos sa kombension? Paagi sa maalwan nga amot sang mga nagatambong. Napat-od namon nga magapakita kamo sing espiritu sang pagkaalwan kaangay sa ginpakita sang mga alagad sang Dios sang una subong pag-ilog kay Jehova nga Dios kag kay Jesucristo. (2 Cor. 8:7) Ginahimo ang daku nga paghalong agod pat-uron nga ang tanan nga amot naamligan, narekord, kag nagamit suno sa katuyuan sini.
19 Pulungkuan: Ang instruksion nga ginhatag sa madamo na nga tuig dapat gihapon sundon, nga amo, MAHIMO LAMANG MAGTIGANA SING PULUNGKUAN PARA SA INYO MALAPIT NGA MGA KATAPO SANG PAMILYA KAG SA IBAN NGA NAGALAKBAY KAUPOD NINYO SA INYO SALAKYAN. Makapalig-on nga makita ang daku nga pag-uswag sa sini nga bahin, kag labi sini nga ginapatudok ang mahigugmaon nga palibot sa mga kombension. Sa kalabanan nga kombension, ang pila ka pulungkuan mas kombeniente sangsa iban. Palihug magpakita sing patugsiling, kag ibilin ang mas kombeniente nga mga pulungkuan sa mga tigulang kag sa iban nga ang ila sirkunstansia nagakinahanglan sini. Dumduma nga ang ‘gugma wala nagapangita sang iya kaugalingon nga intereses.’—1 Cor. 13:4, 5; Filip. 2:4.
20 Kamera, Camcorder, kag Audiocassette Recorder: Ang mga kamera kag mga kasangkapan sa pagrekord mahimo magamit sa mga kombension. Apang, ang imo paggamit sini indi dapat makatublag sa iban. Ang paglakatlakat nga nagakuha sing retrato sa tion sang sesyon makatublag sa iban nga nagapanikasog nga makakonsentrar sa programa. Wala sing bisan ano nga sahi sang kasangkapan sa pagrekord ang itakod sa mga sistema sa koryente ukon tunog, kag ini nga kasangkapan dapat nga wala nagabalabag sa pasilyo, alagyan, ukon sa atubangan sang iban.
21 First Aid: Ang First Aid Department para lamang sa mga emerhensia. Palihug magdala kamo sang inyo kaugalingon nga aspirin, bulong nga pangpatunaw, bendahe, sibit, kag kaanggid nga mga butang, kay indi ini matigayon sa kombension. Ang bisan sin-o nga may katalagman nga makuyap ukon maatake, insulin shock, sakit sa tagipusuon, kag iban pa, dapat magdala sang ila kinahanglanon nga bulong. Dapat sila updan sang isa ka miembro sang ila pamilya ukon sang isa ka katapo sang kongregasyon nga nakahangop sang ila kahimtangan kag makahatag sing tabang, kon kinahanglanon. May mga problema nga nag-utwas sa mga kombension sang ang mga indibiduwal nga may malubha nga balatian ginpabay-an nga nagaisahanon kag naglain ang pamatyag. Kon ang iban nga may pinasahi nga kinahanglanon sa panglawas wala sing kaupod nga katapo sang pamilya nga makabulig sa ila, ang mga gulang dapat pahibaluon tuhoy sa kahimtangan kag dapat maghimo sing kinahanglanon nga mga kahimusan sa pagbulig. Wala sing pinasahi nga mga hulot para sa mga may balatian ukon alerdyi sa palibot nga iaman sa mga kombension.
22 Pagkaon sa Kombension: Ang kada isa nga nagatambong dapat magbalon sang iya kaugalingon nga pagkaon sa baylo nga maglakat agod magbakal sing pagkaon sa tion sang malip-ot nga pahuway sa udto. Ang simple nga merienda nga masustansia kag mahapos bitbiton mahimo nga nagakaigo na. Ang suplemento sang Nobiembre 1995 nga Ang Aton Ministeryo sa Ginharian, pahina 27, nagahatag sing pila ka ideya kon ano ang dalhon. Ang kristal nga mga suludlan kag alkoholiko nga ilimnon wala ginatugot sa mga pasilidad sang kombension. Ang mga cooler dapat nga magamay lamang agod indi makabalabag sa alagyan ukon sa pulungkuan sa tupad mo. Ang iban sa tumalambong nakita nga nagakaon kag nagainom sa tion sang programa, apang pagpakita ini sing dipagtahod sa okasyon.
23 Pagnegosyo: Indi nagakaigo para kay bisan sin-o nga utod nga hingalitan ang daku nga kadam-an paagi sa pagbaligya sing mga butang, subong sang panghapin sa libro ukon T-shirt, abaniko, ukon kalendaryo nga may naimprinta nga tema sang kombension. Ang lugar nga ginahiwatan sang kombension mangin isa ka daku nga Kingdom Hall diin wala sing negosyo nga dapat himuon.
24 Nalipay gid kita nga ang 1998-99 nga “Dalanon Sang Dios sa Kabuhi” nga Distrito nga Kombension magasugod sa dili madugay! Nahimo mo na bala ang imo mga kahimusan agod makatambong? Kabay nga may maayo kamo nga paglakbay kag makapauli nga narepreskuhan, determinado sa pagpadayon sa hamili nga pag-alagad kay Jehova kag sa paglakat sa “dalanon sang Dios sa kabuhi” para sa imo walay katapusan nga kabulahanan.
[Kahon sa pahina 6]
Mga Pahanumdom sa Distrito nga Kombension
▪ Dalayunan: Magapadala kami sing suplay sang mga Room Request form sa tagsa ka kongregasyon sa guwa sang Metro Manila. Dapat sulatan sang mga nagakinahanglan sing dalayunan ang porma kag ihatag ini sa sekretaryo sang inyo kongregasyon. Usisaon niya ini kag pirmahan, dayon ipadala ini sa Watch Tower Convention sa isa sang mga direksion sa ubos.
Disiembre 4-6, 1998
Quezon City (1): P. O. Box 2044, 1060 Manila.
Disiembre 11-13, 1998
Quezon City (2): P. O. Box 2044, 1060 Manila.
Disiembre 18-20, 1998
Alaminos, Pangasinan: c/o Ferma’s Auto Supply, Alaminos, 2404 Pangasinan.
Cagayan de Oro City: c/o Kingdom Hall, F. Abellanosa Street, 9000 Cagayan de Oro City.
Ilagan, Isabela: c/o Zosimo G. Linda, Baculod, Ilagan, 3300 Isabela.
Quezon City (3): P. O. Box 2044, 1060 Manila. (Ingles & sign language lamang.)
Disiembre 25-27, 1998
Bacolod City: c/o Kingdom Hall, Earth-Mercury Streets, Henrietta Village, 6100 Bacolod City.
Baguio City (Tagalog): c/o Kingdom Hall, 28 Rimando Road, 2600 Baguio City.
Batangas City: c/o Danilo Victoria, 37 Pastor Road, 4200 Batangas City.
Bayombong, Nueva Vizcaya: c/o Artemio Bunuan, Market Site, Bayombong, 3700 Nueva Vizcaya.
Binalonan, Pangasinan: c/o Manantan Technical School, Urdaneta, 2428 Pangasinan.
Cabantian, Davao City: c/o Cesar’s Portrait, City Hall Drive, San Pedro Street, 8000 Davao City.
Cavite City: c/o Kingdom Hall, 495 Padre Pio Street, Caridad, 4100 Cavite City.
Cebu City: c/o Parcon’s Machine Shop, Bagumbayan Street, 6000 Cebu City.
Dumaguete City: c/o Alexander C. Echon, 110-A Springville, Tubod, 6200 Dumaguete City.
Kabacan, North Cotabato: c/o Eliseo Mapanao, 1245 USM Avenue, Kabacan, 9407 North Cotabato.
Kidapawan, North Cotabato: c/o Adolfo Adriatico, Sr., Kingdom Hall, Juan dela Cruz Street, Kidapawan, 9400 North Cotabato.
Koronadal, South Cotabato: c/o Filomeno Jalandoon, Kingdom Hall, 126 De Pedro Street, Koronadal, 9506 South Cotabato.
Laoag City: c/o Kingdom Hall, 46 Rizal Street, 2900 Laoag City.
Lingayen, Pangasinan: c/o Rufo Macaraeg, Tonton, Lingayen, 2401 Pangasinan.
Lucena City: c/o Kingdom Hall, 1 Granja Street, 4301 Lucena City.
Musuan, Bukidnon: c/o Henry Laoyan, Laoyan Compound, Valencia, 8709 Bukidnon.
Pili, Camarines Sur: c/o Bautista Marketing, Pili, 4418 Camarines Sur.
Puerto Princesa City: c/o Kingdom Hall, Malvar Street, 5300 Puerto Princesa City.
Quezon City (4): P. O. Box 2044, 1060 Manila.
San Fernando, Pampanga: c/o Percasio Dizon, 850 Juliana Subdivision, San Fernando, 2000 Pampanga.
Sta Cruz, Laguna: c/o Kingdom Hall, Highway, Bubukal, Sta Cruz, 4009 Laguna.
Surigao City: c/o Alfredo Alutaya, 735 Navarro Street, 8400 Surigao City.
Tacloban City: c/o Gideon Buhion, 185 M. H. del Pilar Street, 6500 Tacloban City.
Tandag, Surigao Sur: c/o Toribio Bernardino, Dawis, Tandag, 8300 Surigao Sur.
Toril, Davao City: c/o Cayetano Hormillada, 187 Agton Street, Toril, 8000 Davao City.
Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.
Zamboanga City: c/o Teopisto Santillan, Sr., Paragon Footwear, Mayor Jaldon Street, 7000 Zamboanga City.
Enero 1-3, 1999
Aguso, Tarlac City: c/o Joaquin Manaloto, Aguso, Tarlac, 2300 Tarlac.
Aparri, Cagayan: c/o Stewart Camarao, Montana Trading, Rizal Street, Centro, Aparri, 3515 Cagayan.
Baguio City (Iloko): c/o Kingdom Hall, 28 Rimando Road, 2600 Baguio City.
Bauang, La Union: c/o Romeo Acosta, Calumbaya, Bauang, 2501 La Union.
Baybay, Leyte: c/o Kingdom Hall, M. Quezon and M. del Pilar Streets, Baybay, 6521 Leyte.
Butuan City: c/o Reynie Tumbaga, Kingdom Hall, Jose Rosales Street, 8600 Butuan City.
Cabanatuan City: c/o Rogelio Cuevo, 366 Purok Rosal, Dicarma, 3100 Cabanatuan City.
Digos, Davao Sur: c/o Kingdom Hall, Lim Extension, Digos, 8002 Davao Sur.
Dipolog City: c/o Jose Machutes, Jr., New Airport Drive, Minaog, 7100 Dipolog City.
General Santos City: c/o Kingdom Hall, 8 Siniguelas Street, 9500 General Santos City.
Iloilo City: Kingdom Hall, Jereos Street, La Paz, 5000 Iloilo City.
Kalibo, Aklan: c/o Kingdom Hall, New Buswang, Kalibo, 5600 Aklan.
Masbate, Masbate: c/o Yolando Alburo, 56-K Tara Street, Masbate, 5400 Masbate.
Mati, Davao Oriental: c/o Norberto Morales, 2851 Ravelo Compound, Matiao, Mati, 8200 Davao Oriental.
Quezon City (5): P. O. Box 2044, 1060 Manila.
Tagbilaran City: c/o Felix Acma, 55 Airport Road, 6300 Tagbilaran City.
Tagum City: c/o Gil Cadelina, 1034 Rizal Street, 8100 Tagum City.
Enero 8-10, 1999
Quezon City (6): P. O. Box 2044, 1060 Manila.
▪ Bautismo: Ang mga kandidato sa bawtismo dapat nga yara na sa ila mga pulungkuan sa gintigana nga seksion antes magsugod ang programa sa Sabado sang aga. Ang kada isa nga magapabawtismo dapat magdala sing maugdang nga bathing suit (ukon balas-on) kag tualya. Dapat pat-uron sang mga gulang sang kongregasyon nga nagarepaso sang mga pamangkot sa Aton Ministeryo nga libro upod sa mga kandidato sa bawtismo nga nahangpan sang kada isa ining mga punto. Ang bawtismo subong simbulo sang dedikasyon isa ka suod kag personal nga butang sa ulot sang indibiduwal kag ni Jehova. Busa, indi nagakaigo para sa mga kandidato sa bawtismo nga maghaksanay ukon mag-uyatay sing kamot samtang ginabawtismuhan.
▪ Badge Cards: Isuksok palihug ang 1998 badge card sa tanan nga tion samtang yara sa siudad nga ginahiwatan sing kombension kag samtang nagalakbay pakadto kag pauli halin diri. Ang mga badge card kag holder dapat kuhaon sa inyo kongregasyon, kay indi ini matigayon sa kombension. Indi pagkalimti nga dalhon ang inyo bag-ong Advance Medical Directive/Release card.
▪ Pagboluntaryo: Makapain ka bala sing pila ka tion sa kombension agod makabulig sa isa sang mga departamento? Kon makabulig kamo, magreport palihug sa Volunteer Service Department sa kombension. Ang kabataan nga ubos sa 16 anyos ang edad mahimo man makabulig paagi sa pagpangabudlay sa idalom sang pag-atipan sang ginikanan ukon sang iban pa nga masaligan nga hamtong.
▪ Paandam: Pat-ura nga pirme sirado ang inyo salakyan, kag indi gid magbilin sing bisan anong makita nga butang nga magasulay sa isa sa pagpangawat. Ang mga kawatan kag pickpocketer nagahugod sang ila igtalupangod sa dalagku nga pagtilipon. Indi maalamon nga magbilin sing malahalon nga mga butang sa inyo pulungkuan. Indi kamo makasiguro nga ang tanan sa inyo palibot isa ka Cristiano. Ngaa maghatag sing pagsulay? May mga report nga ginatinguhaan kuno sang iban nga mga tagaguwa nga buyukon ang kabataan sa pagguwa. BANTAYI PIRME ANG INYO KABATAAN.