Ang Paghatag nga Nagapadungog kay Jehova

¹ Sa Hulubaton 3:9, si Hari Solomon nagsiling: “Padunggi ang GINOO sang imo mga pagkabutang kag sang nahauna nga mga bunga sang tanan mo nga patubas.” Sa Israel sang una, ginpatuman sang Kasuguan nga painon ang ikapulo sang ila patubas para sa pagpadungog kay Jehova. Kamusta naman sa mga Cristiano? Ginasabat ini ni apostol Pablo sa 2 Corinto 9:7, “Maghimo ang kada isa suno sa ginpamat-od niya sa iya tagipusuon, indi sing paganot ukon ginapilit, kay ginahigugma sang Dios ang nagahatag sing malipayon.”

² Ang “nagahatag sing malipayon” amo ang nagahatag sing kinabubut-on, ‘indi sing ginapilit.’ Ang nagapahulag sa iya sa paghatag amo ang iya handum nga padunggan si Jehova kag agod apresyahon ang tanan nga ginhimo Niya para sa aton. Bisan pa wala ginapilit sa paghatag, ang isa ka dedikado nga Cristiano nagabatyag nga isa ka obligasyon nga ipakita ang iya tudok nga gugma kag apresasyon kay Jehova kag sa mga kauturan. (1 Juan 4:11) Madamo sa aton mga kauturan ang nagpakita sini nga kaalwan paagi sa pagsakdag sa programa sa pagtukod sang mga Kingdom Hall, kag nakabulig nga mahuman ang ginatos ka Kingdom Hall sa Pilipinas.

³ Ginpatuman ang Halad: Ginpatuman sang Mosaikong Kasuguan nga ang tanan nga Israelinhon, manggaranon man ukon imol, regular nga maghatag sing mga halad kay Jehova, bisan pa nga indi pareho ang balor sang halad depende sa ikasarang sang isa. Ginpakita ni Jesus nga dapat “ipanghiwala” man sang isa ka Cristiano “ang iya kaugalingon” kag maghalad agod padunggan si Jehova. (Mat. 16:24) Nalakip sa sini ang pagsakripisyo sang personal nga mga kasulhayan kag materyal nga mga pagkabutang agod gamiton ang ikasarang sang isa sa pag-alagad kag pagbulig sa iban. Si Pablo naglaygay: “Indi pagkalimti . . . ang pagpaambit sing mga butang sa iban, kay nahamuot gid ang Dios sa sini nga mga halad.”​—Heb. 13:16.

⁴ Paano kita ‘makahatag sing malipayon’ may kaangtanan sa programa sa pagtukod sang mga Kingdom Hall? Binagbinagon naton kon paano ini himuon sang (1) mga kongregasyon nga wala pa sa programa sa pagtukod sang mga Kingdom Hall, (2) mga kongregasyon nga may ginabayaran pa nga hulam, kag (3) mga kongregasyon nga napatukuran na sang Kingdom Hall sa bag-o nga programa.

⁵ Mga Kongregasyon nga Wala Pa sa Programa sa Pagtukod sang mga Kingdom Hall: Mahimo nga ang inyo kongregasyon may kaugalingon nga Kingdom Hall nga wala pa sa programa sa pagtukod sang mga Kingdom Hall. Kon amo sini, paano kamo makasakdag sa programa? Sining karon lang, may ginpahibalo nga instruksion nga mag-aman sing napain nga kahon-alamutan nga namarkahan “Kingdom Hall Construction Worldwide.” Ang mga amot sa sini nga kahon pagagamiton sa pagtukod sang mga Kingdom Hall sa iban nga kongregasyon, indi lang sa aton. Nahisanto ini sa pinamulong ni Pablo: “Nga ginatuon ang mata, indi lamang sa inyo personal nga kaayuhan, kundi sa personal nga kaayuhan man sang iban.”​—Fil. 2:4.

⁶ Magluwas sa ginahulog nga amot sang tagsa ka indibiduwal sa sini nga kahon, ang iban nga kongregasyon, lakip ang iban nga nagabayad pa sang ila hulam, ang namat-od paagi sa resolusyon nga magpadala sing ginkasugtan nga kantidad kada bulan halin sa pundo sang kongregasyon. Kon amo sini, ang ginkasugtan nga kantidad kada bulan idugang sa unod sang kahon nga “Kingdom Hall Construction Worldwide” kon ipadala na ini sa sanga talatapan.

⁷ Mga Kongregasyon nga may Ginabayaran Pa nga Hulam: Ginapakita sang aton rekord nga sobra sa 700 ka kongregasyon sa Pilipinas ang may ginabayaran pa nga hulam. Paano ini nga mga kongregasyon makasakdag sa programa sa pagtukod sang mga Kingdom Hall? Ang isa ka paagi amo ang mangin mahunahunaon sa pagpadala sa sanga talatapan sang eksakto nga kantidad nga ginkasugtan sang kongregasyon kada bulan. Ginapakita sang aton rekord nga, sa promedyo, ang mga may hulam nga kongregasyon nagapadala sing wala kalab-ot sa katunga sang kantidad nga ginsaad nila nga ipadala kada bulan. Gani, kon magpadala sila sing eksakto nga kantidad, magadoble ini sang pundo nga magamit sa pagtukod sang mga Kingdom Hall sa mga kongregasyon nga nagakinahanglan sini. Ihulog sang mga manugbantala nga luyag maghatag para sa sini nga katuyuan ang ila amot sa kahon nga namarkahan “Local Congregation Expenses.” Nian sa katapusan sang bulan, ipadala sang mga gulang sa sanga talatapan ang eksakto nga kantidad bilang bayad sa hulam.

⁸ Mga Kongregasyon nga Napatukuran Na sang Kingdom Hall sa Bag-o nga Programa: Kapin na sa 600 ka kongregasyon ang nagatipon sa mga Kingdom Hall nga gintukod sa bag-o nga programa. Ang tagsa sa sini nga mga kongregasyon naghimo sing resolusyon nga magpadala sing napat-od nga kantidad kada bulan bilang ila kinabubut-on nga amot. Ano ang nagpahulag sa ila nga maghatag sini nga amot? Ini bangod nahibaluan nila nga madamo nga mga kauturan ang nagsakripisyo agod makaamot sa pundo sang Kingdom Hall Construction agod mapatukuran sila sang bag-o nga Kingdom Hall. Karon nga may bag-o na sila nga tilipunan, luyag nila nga buligan ang iban nga mapatukuran man. Sa paghimo sini, ginasunod nila ining inspirado nga laygay: “Padayon nga pangitaon sang kada isa, indi ang iya kaugalingon nga kaayuhan, kundi ang iya sang iban nga tawo.”​—1 Cor. 10:24.

⁹ Ginahatagan sing komendasyon ang madamo nga kongregasyon nga nagapadala sing eksakto nga kantidad kada bulan, kag ang iban sobra pa gani. Apang may yara nga kulang ang ginapadala, ayhan bangod kulang man ang ginahatag sang iban nga manugbantala sangsa ila ginsaad. Bisan pa nga ang kada isa amo ang namat-od “sa iya tagipusuon” kon pila ang iya ihatag, isa ini ka saad kay Jehova kag bahin sang aton halad sa iya. (2 Cor. 9:7) Gani bahin sang aton pagsimba ang matutom nga paghatag sini nga kantidad kag dapat ini ipain para sa sini gid lang nga katuyuan. Amo ini ang ginpalig-on ni apostol Pablo sa 1 Corinto 16:2: “Sa kada una nga adlaw sang semana ang kada isa sa inyo sa iya balay magpain sang bisan pila nga matipon suno sa iya kabuganaan.” Madamo nga kauturan ang namat-od nga “magpain” sang ila ginsaad nga amot paagi sa pagsulod sini sa sobre agod indi ini magamit sa iban nga katuyuan.

¹⁰ Nagdugang na ang manugbantala sang madamo nga kongregasyon sugod sang naghimo sila sing una nga resolusyon para iamot sa ila ginagamit nga Kingdom Hall. Bangod sini, ginapanugda sang Nagadumala nga Hubon, nga kada tuig, dapat repasuhon sang mga gulang ang resolusyon kag tan-awon kon bala puede ini madugangan. Isa ka maayo nga kahigayunan nga himuon ini sa Enero 2009. Pangabaya ang mga manugbantala nga isulat sa papel ang ginabatyag nila nga masarangan nila nga ihatag kada bulan bilang pag-apresyar sa ila Kingdom Hall. Wala sing ngalan nga isulat sa papel. Nian ipahibalo sang mga gulang ang bag-o nga resolusyon agod kasugtan sang kongregasyon. Kon nahimo na ang bag-o nga resolusyon, dapat nga padal-an sang mga gulang ang sanga sang bag-o nga kopya agod maislan ang daan.

¹¹ Nahibaluan namon nga madamo sa inyo ang nagailog sa unang-siglo nga mga kongregasyon sa Macedonia nga bisan pa sang ila “tuman nga kaimulon nagdugang ang . . . ila kaalwan. Kay suno sa ila gid nga ikasarang, huo, nagapamatuod ako, labaw pa ini sa ila gid nga ikasarang, samtang kinabubut-on nga nagpadayon sila sa pagpangabay sa amon . . . sang pribilehiyo sa mainayuhon nga paghatag.” (2 Cor. 8:1-4) Kabay nga tanan kita magpakita sing kaangay nga espiritu sang mga taga-Macedonia samtang maalwan kita nga nagahatag nga nagapadungog kay Jehova!