“Si Jehova Ang Akon Kabulig”
1 Sang ginsugo ni Jesus ang iya unang mga disipulo, nagsiling sia sa ila: “Yari karon! Ginapadala ko kamo subong mga karnero sa tunga sang mga lobo.” (Mat. 10:16) Ginbangdan bala ina sang ila pagpangalag-ag kag pag-isol? Wala. May panimuot sila nga kaangay sa ginpabutyag sang ulihi ni apostol Pablo sang nagsiling sia sa mga masigka-Cristiano: “Magpakaisog kag magsiling: ‘Si Jehova ang akon kabulig; indi ako mahadlok. Ano bala ang mahimo himuon sang tawo sa akon?’ ” (Heb. 13:6) Nalipay sila nga maisipan nga takus nga pakahuy-an tungod sa ngalan ni Jesus, kag nagpadayon sila sa walay langan nga nagatudlo kag nagabantala sing maayong balita.—Binu. 5:41, 42.
2 Sa karon ang bug-os kalibutan nga hilikuton sa pagbantala yara na sa katapusan nga mga hut-ong sini. Subong sa gintagna ni Jesus, mangin sentro kita sing pagdumot sang tanan nga mga pungsod. (Mat. 24:9) Ang aton pagbantala nga hilikuton ginapamatukan kag ginayaguta, kag sa iban nga mga bahin sang duta, ginadumilian pa gani ini. Kon wala kita sing pagtuo, mahimo kita magbatyag sing kahadlok. Apang, ang paghibalo nga si Jehova amo ang aton Kabulig nagapapagsik sa aton kag nagapabakod sa aton nga magbatas.
3 Ang kaisog amo ang kinaiya sang kabakod, kasidla, kaisganan. Kabaliskaran ini sang kahadlok, pagkamahuluy-on, pagkatalaw. Ang mga disipulo ni Jesus pirme gid nagkinahanglan sing kaisog sa pagbatas. Kinahanglanon ini agod indi kita maluyahan sa mga panimuot kag mga pagginawi sang kalibutan nga nagapakig-away sa Dios. Makapalig-on gid para sa aton nga hunahunaon ang halangdon nga halimbawa ni Jesus, isa ka mandadaug sang kalibutan! (Juan 16:33) Dumduma, man, ang mga apostoles nga, walay sapayan sang daku nga mga pagtilaw, masidla nga nagsiling: “Dapat namon tumanon ang Dios subong manuggahom sa baylo sang mga tawo.”—Binu. 5:29.
4 Indi Kita ang Sahi nga Nagaisol: Dapat kita manikasog nga huptan ang positibo nga panimuot sa aton hilikuton. (Heb. 10:39) Dumduma pirme nga ginpadala kita ni Jehova subong pamatuod sang iya gugma kag kaluoy sa bug-os nga katawhan. Wala gid sia nagapahimo sa iya mga alagad sang bisan ano nga wala sing mapuslanon nga katuyuan. Ang tanan nga gintangdo sa aton nga himuon mangin para sa kaayuhan sa ulihi sang tanan nga nagahigugma sa Dios.—Roma 8:28.
5 Ang isa ka malaumon nga pagtamod magabulig sa aton nga padayon nga pangitaon ang mga katulad-karnero sa aton teritoryo. Mahimo naton tamdon ang dipagsapak nga ginapakita sang mga tawo subong pamatuod sang ila kabang-awan kag pagkawalay paglaum. Tuguti ang aton gugma sa pagpahulag sa aton nga magmahinuklugon kag magmapailubon. Kada makapahamtang kita sing literatura ukon makamutik sing interes, dapat naton mangin tulumuron ang magduaw liwat sa gilayon kag pukawon ang dugang pa nga interes. Indi gid naton dapat pagduhaduhaan ang aton ikasarang sa pagsugod sing isa ka pagtuon sa Biblia ukon mangin epektibo sa pagdumala sini. Sa baylo, dapat kita dalayon kag mapangamuyuon nga mangayo sing bulig kag panuytoy ni Jehova, nagasalig nga buligan niya kita.
6 Nagapati gid kita nga pat-uron ni Jehova nga matapos ang hilikuton. (Ipaanggid ang Filipos 1:6.) Ang aton bug-os nga pagsalig sa iya subong ang aton Kabulig nagapabakod sa aton, agod indi kita “magpakaluya sa paghimo sing maayo.”—Gal. 6:9.