Pagtanyag Sing Maayong Balita nga May Positibo nga Panimuot

¹ Kita tanan maluyag nga mangin malipayon sa aton ginahimo, ilabi na sa paghimo sing mga disipulo nga hilikuton. Ano ang nagahatag sa aton sing subong sina nga kaayawan? Nagasugod ini paagi sa paghupot naton sing positibo nga panghunahuna kon nagabulig sa iban. (Hulu. 11:25) Dapat ipakita sang aton paagi sa pagtanyag sing maayong balita nga nagapati gid kita sa aton ginahambal. Kon maghambal kita sing tinagipusuon, nian ang aton pagkasinsero kag personal nga pagtuo magaiwag. (Luc. 6:45) Paagi sa pag-ensayo sa aton presentasyon, mangin mas maisugon kita kon nagapakighambal sa mga tawo. Magabulig ini sa aton ilabi na sa Pebrero kon nagatanyag sing Life​—⁠How Did It Get Here? By Evolution or by Creation? Ayhan masapwan mo ang masunod nga mga panugda nga mabuligon.

² Kon nagatanyag sing “Creation” nga libro, mahimo nimo ini isiling sa nahaunang pagduaw:

◼ “Sa pagpakighambal sa amon mga kaingod, nasapwan namon nga ang pila nagasalig sa Dios. Ang iban naman nabudlayan sa pagpati sa iya. Ano ang imo opinyon? [Pasabta sia.] Talupangda kon paano nagapangatarungan ang Biblia tuhoy sini nga butang. [Basaha ang Roma 1:⁠20.] Makita naton ang pamatuod sang ‘dayon nga gahom kag pagka-Dios’ sang Dios paagi sa pagtan-aw sa mga butang nga gintuga niya.” Basaha ang katapusan nga parapo sa pahina 48 sang Creation nga libro, kag ipatalupangod ang pagkasibod sang buhi nga selula. Ukon gamita ang parapo 18 sang pahina 147 sa pagpakita kon paano ang makatilingala nga sistema sa sirkulatoryo sang isa ka kahoy nagapadaku sang binuhatan sang Manunuga. Itanyag ang libro kag maghimo sing kahimusan sa pagbalik.

³ Kon nagaduaw liwat sa mga nasugilanon mo tuhoy sa pagka-Manunuga sang Dios, ayhan luyag mo ini isiling:

◼ “Sang nagligad ko nga pagduaw, ginhambalan naton ang tuhoy sa ebidensia sang pagluntad sang Dios​—⁠ang iya makatilingala nga pagpanuga. Nabudlayan ka bala sa pagpati nga ang Isa nga nagtuga sang uniberso mangin interesado man sa aton palaabuton? [Pasabta sia.] Makawiwili talupangdon nga ginpat-od na sang Manunuga ang palaabuton.” Basaha ang Isaias 46:​9, 10. Depende sa interes sang indibiduwal, gamita ang mga laragway kag mga kapsion sa kapitulo 19 sang Creation nga libro sa pagpadaku sang himpit nga mga kahimtangan nga ginpanaad sang Dios. Basaha ang parapo 1 sang kapitulo 20, kag magtanyag sing isa ka pagtuon sa Biblia. Kon batunon, sugdi ang pagtuon sa Ihibalo nga libro.

⁴ Mahimo nimo tilawan ining presentasyon kon nagatanyag sing “Creation” nga libro:

◼ “Sa pagpakighambal sa imo mga kaingod, naobserbahan ko nga ang kalabanan nagahandum sing isa ka wala sing peligro nga komunidad kag ang mahidaiton nga kalibutan. Sa banta mo, ngaa wala matigayon sang tawo ini nga mga kahimtangan? [Pasabta sia.] Ang pila ka lider mahimo nga hanuot kag nagahimo sing maayo, apang talupangda kon ano ang ginalaygay sang Biblia.” Basaha ang Salmo 146:​3, 4; nian mamangkot: “May isa bala nga makapaayaw sa mga kinahanglanon sang tawo?” Basaha ang bersikulo 5 kag 6. Ipakita ang laragway sa pahina 251 sang Creation nga libro, kag ipatalupangod ang mga benepisyo sang pagginahom sang Dios. Itanyag ang libro.

⁵ Kon ang pagginahom sang Dios ginhambalan sang primero, matilawan mo ining panugda sa pagduaw liwat:

◼ “Sang nagduaw ako sang nagligad nga pila ka adlaw, ginhambalan naton ang kapaslawan sang tawo sa pagpaluntad sing paghidait sa duta. Ayhan nadumduman mo ang rason nga ginahatag sang Biblia tungod sina nga kapaslawan. [Basaha liwat ang Salmo 146:⁠3.] Nakita mo bala kon ngaa nagalaygay ang Dios sa aton nga indi naton pag-ibutang ang aton pagsalig sa mga tawo? [Pasabta sia.] Ayhan nagaugyon ikaw nga ang bisan ano nga paglaum para sa isa ka permanente nga solusyon dapat nga maghalin sa Dios. Ang rason kon ngaa makasalig kita sa sini ginapaathag sa Salmo 146:⁠10. [Basaha.] Kon luyag naton mangin sakop sang Ginharian sang Dios, ano ang dapat naton himuon?” Buksi ang pahina 250 sang Creation nga libro, basaha ang parapo 13, kag ipadaku ang Juan 17:⁠3. Ipanugda sa iya nga ipasundayag mo kon paano matigayon ang ihibalo nga nagadul-ong sa kabuhi nga walay katapusan. Kon gintugutan, ipakita ang Ihibalo nga libro kag sugdi ang pagtuon.

⁶ Sa pagpangabudlay sa mga balaligyaan, mahimo nimo gamiton ining malip-ot nga paagi sa pagtanyag sing “Creation” nga libro:

◼ “Nagahimo kami karon sing isa ka pinasahi nga serbisyo sa mga negosyante sang komunidad. Kita tanan nabalaka sa pagdugang sang krimen kag kasingki sa aton lugar. Sa banta mo, may isa bala nga may tunay nga solusyon sa problema? [Pasabta sia.] Ang Dios may solusyon.” Buksi ang pahina 196 sang Creation nga libro; basaha kag komentuhi ang Hulubaton 2:​21, 22 sa parapo 19. Ipakita ang titulo sa kapitulo 16, kag itanyag ang libro.

⁷ Kon nagaduaw liwat sa isa ka negosyante nga napahamtangan mo sing “Creation” nga libro, mahimo nimo ini masiling:

◼ “Sadtong nagligad ko nga pagduaw, nasambit ko nga ang Dios gid lamang ang may dayon nga solusyon sa krimen kag kasingki. Suno sa iya saad, makasalig kita nga ang isa ka mahidaiton nga duta magaabot. Talupangda ang pagpili nga ginahatag sa kada isa sa aton.” Basaha ang parapo 11 sa pahina 250 sang Creation nga libro, lakip ang Salmo 37:​37, 38. Komentuhi ang laragway sa pahina 251, kag basaha ang nahaunang dinalan sang parapo 14. Magtanyag sing walay bayad nga pagtuon sang Biblia sa puluy-an, nga mahimo hiwaton sa ila balaligyaan ukon sa ila puluy-an.

⁸ Subong “mga masigkamanugpangabudlay sang Dios,” may rason gid kita nga mangin positibo kon nagatanyag sing maayong balita. (1 Cor. 3:9) Ang paghupot naton sini nga panimuot magaresulta sa bugana nga pagpakamaayo ni Jehova.