Mga Manugtatap nga Nagapanguna—Ang Manugtatap sa Pag-alagad
1 Ang manugtatap sa pag-alagad interesado gid sa tanan nga butang nga may kaangtanan sa lakat sang ebanghelyo nga hilikuton sa gintangdo nga teritoryo sa kongregasyon. Busa may importante sia nga katungdanan sa pagbulig sa aton nga matuman ang aton responsabilidad nga ibantala ang maayong balita. Subong isa ka makugi nga ebanghelisador, nagapanguna sia sa pag-organisar sa tanan nga butang may kaangtanan sa pag-alagad sa latagon. Subong isa ka sangkol nga manunudlo, ginabuligan niya ang indibiduwal nga mga manugbantala nga mapauswag ang ila pagkaepektibo sa ministeryo.—Efe. 4:11, 12.
2 Direkta nga ginadumalahan sini nga gulang ang hilikuton sang ministeryal nga mga alagad nga nagauyat sing literatura, magasin, kag teritoryo. Sia ang may salabton sa pagpat-od nga may yara nagakaigo nga suplay sing literatura, magasin, kag mga porma sa pag-alagad para magamit kada bulan.
3 Ang manugtatap sa pag-alagad amo ang may salabton sa pagdumala sa lainlain nga bahin sang pagbantala, lakip na ang pagpanaksi sa duog nga may negosyo, sa kalye, kag sa telepono. Alisto sia sa paghimo sing praktikal nga mga kahimusan sa pagtipon para sa pag-alagad sa bug-os nga semana, lakip na sa mga piesta opisyal. Nagapakita sia sing matuod nga interes sa hilikuton sa pagtuon sa Biblia. Nagapangita sia sing mga paagi agod buligan sa espirituwal yadtong nangin ditayuyon ukon diaktibo sa ministeryo. Interesado gid sia sa hilikuton sang mga payunir, kag ginatatap niya ang programa nga Ang mga Payunir Nagabulig sa Iban.
4 Subong katapo sang Komite Sang Pag-alagad Sang Kongregasyon, ang manugtatap sa pag-alagad nagapanugda sing bisan anong kinahanglanon nga mga pagbag-o sa mga grupo sang Pagtinuon Sang Kongregasyon sa Libro. Kon magduaw sia sa inyo grupo, pat-ura ninyo nga makatambong kamo kag makapakig-upod sa iya sa pag-alagad sa latagon.
5 Ang tanan sa kongregasyon dapat makigkooperar sing kinabubut-on sa direksion nga ginahatag sang manugtatap sa pag-alagad. Magabulig ini sa aton nga mapauswag ang aton pagkaepektibo sa paghimo sing disipulo nga hilikuton kag makasapo sing daku pa nga kalipay sa aton ministeryo.