Buligi ang Imo Manugtatap sang Pagtinuon Sang Kongregasyon sa Libro

¹ Ang tagsatagsa sa aton nagatigayon sing madamo nga benepisyo gikan sa Pagtinuon Sang Kongregasyon sa Libro. Ginhambalan naton sang nagligad nga bulan kon paano ginahimo sang manugtatap sang Pagtinuon Sang Kongregasyon sa Libro ang iya katungdanan. Apang ano ang sarang naton mahimo agod buligan sia kag sa amo makabenepisyo kita kag ang iban?

² Magtambong Kada Semana: Bangod diutay lamang ang mga katapo sang mga grupo sa pagtinuon sang libro, importante gid ang imo presensia. Tinguhai nga magtambong kada semana. Makabulig ka man kon mag-abot ka sing temprano, agod masugdan sang manugtatap ang miting sa mahim-ong nga paagi.​—⁠1 Cor. 14:40.

³ Makapalig-on nga mga Komento: Ang isa pa ka paagi nga makabulig ka amo ang paghanda sing maayo kag paghatag sing makapalig-on nga mga komento. Ang mga komento nga nagakonsentrar sa isa lamang ka punto amo ang labing maayo, kag nagapalig-on man ini sa iban nga magkomento. Likawi nga komentuhan ang tanan nga punto sa parapo. Kon natandog sang isa ka punto sa materyal ang imo tagipusuon, pasangkara ang paghambalanay paagi sa pagpaambit sang imo ideya.​—⁠1 Ped. 4:⁠10.

⁴ Kon may pribilehiyo ka nga magbasa sang mga parapo para sa grupo, mangin maukod sa pagtuman sina nga asaynment. Ang maayo nga pagbasa nagaamot sa kadalag-an sang pagtinuon.​—⁠1 Tim. 4:⁠13.

⁵ Pagpanaksi sang Grupo: Ang mga miting sa pag-alagad sa latagon ginahiwat sa madamo nga duog sang pagtinuon sa libro, kag ang imo pagsakdag sa sining mga kahimusan nagabulig sa manugtatap samtang nagapanguna sia sa pagbantala nga hilikuton. Tamda ining mga kahimusan subong mga kahigayunan nga mangin suod sa imo mga kauturan kag agod mapalig-on sila.

⁶ Mga Report sa Pag-alagad sa Latagon: Ang paghatag dayon sang imo report sa tapos sang bulan isa pa ka paagi nga makabulig ka sa manugtatap. Sarang mo mahatag sing direkta ang report sa iya ukon ihulog ini sa kahon para sa report sa Kingdom Hall. Sarang magamit sang sekretaryo ang kahon agod tipunon ang mga report nga natipon sang mga manugtatap sang pagtinuon sa libro.

⁷ Ginaapresyar ang imo kooperasyon sa imo manugtatap sang Pagtinuon Sang Kongregasyon sa Libro. Labaw sa tanan, makasalig ka nga si Jehova ‘mangin sa espiritu nga imo ginapakita.’​—⁠Fil. 4:⁠23.