Nagapangabudlay Bala Kamo nga May Katuyuan?
1 Si Jehova isa ka Dios nga may katuyuan. (Isa. 55:10, 11) Ginalaygayan kita nga ilugon sia. (Efe. 5:1) Dapat gid ini makita sa kon paano naton ginahimo ang aton ministeryo. Gani ang pamangkot nagakaigo: “Nagapangabudlay bala kamo nga may katuyuan?”
2 Ang inyo pagbantala sa mga ganhaan, di-pormal nga pagpanaksi, kag pagpanagtag sing literatura bahin tanan sang isa ka ministeryo nga may katuyuan. Apang dumduma nga ang sugo sa aton indi lamang may kaangtanan sa pagbantala kundi sa paghimo man sing disipulo. (Mat. 28:19, 20) Sa tapos masab-ug ang mga binhi sang kamatuoran sang Ginharian, dapat kita magbalik agod bunyagan kag atipanon ini sing tayuyon samtang nagapaabot kita nga padamuon ini ni Jehova. (1 Cor. 3:6) Dapat kita mangin mahunahunaon sa paghimo sing mga pagduaw liwat kag sa pagsugod sing mga pagtuon sa Biblia.
3 Pasangkara ang Inyo Ministeryo: Makalilipay pirme nga mahinumdom ninyo ang inyo hinimuan sa pag-alagad kag makasiling sa kaugalingon: “Nahimo ko ang gintuyo ko nga himuon.” Suno sa 2 Timoteo 4:5, si Pablo naglaygay: “Tumana sing bug-os ang imo ministeryo.” Nagalakip ina sang pagpasangkad sa inyo mga panikasog agod matatap ang tanan nga interesado nga nasalapuan. Sa inyo semanal nga iskedyul sa pag-alagad, magplano sing isa ka pat-od nga tion sa paghimo sing mga pagduaw liwat. Pangabudlayi ang tulumuron nga makasugod sing mga pagtuon sa Biblia sa mga nahuyog sa pagkamatarong. Amo ini dapat ang inyo katuyuan kon nagapakigbahin sa ministeryo.
4 Pamangkuta ang mga manugbantala kon ano ang ginbatyag nila sang nakita nila ang ila mga estudyante sang Biblia nga nabawtismuhan sa isa ka asambleya. Nalipay sila, ayhan sing subong sa nabatyagan sang mga ginbawtismuhan. Natuman nila ang isa ka daku nga katuyuan! Ang isa ka manughimo-disipulo nagpabutyag sini sa sining paagi: “Ang paghimo sing mga disipulo nagakahulugan sing paghimo sing dugang pa nga mga dumalayaw ni Jehova. Nagakahulugan ini sing kabuhi sa mga nagabaton sang kamatuoran. Naluyagan ko gid ang pagtudlo sing kamatuoran sa iban—tumalagsahon gid ini! . . . Madamo sang mga nagahigugma kay Jehova ang nangin akon pinalangga gid nga mga abyan.”
5 Handurawa lamang nga mabuligan ang isa ka tawo nga mangin dedikado nga alagad ni Jehova! Daw ano gid nga rason sa pagkalipay! Ini nga bunga resulta sang pagpangabudlay nga may katuyuan sa ministeryo.—Col. 4:17.