Pasangkara ang Imo Bahandi sang Pag-alagad sa Ginharian

¹ Ginpaanggid ni Jesus ang paglaum sang Ginharian sa malahalon nga bahandi. (Mat. 13:​44-46) Kaangay bala kita sang mga lalaki sa mga ilustrasyon ni Jesus nga nagbaligya sang tanan nila nga mga pagkabutang agod baklon ang isa nga may mas daku nga bili? Kon amo, hatagan naton ang Ginharian sang Dios sang una nga prioridad.​—Mat. 6:​19-22.

² Sanglit ang aton pag-alagad sa Ginharian isa ka bahandi, dapat nga handumon naton nga pasangkaron ini. Ginapasangkad bala naton ang aton hilikuton sa Ginharian? Mahimo naton ini paagi sa pagpakigbahin sa pamalaybalay nga hilikuton, paghimo sing mga pagduaw liwat, pagdumala sing mga pagtuon sa Biblia, kag pagpanaksi sing dipormal.

³ Paano Ko Mapasangkad ang Akon Pagpakigbahin?: Sa pagsugod sang bag-o nga tuig sang pag-alagad, maayo nga repasuhon sang kada isa ang iya personal nga hilikuton kag mamangkot: ‘Sarang ko bala maorganisar ang akon mga hilikuton agod makapalista subong isa ka auxiliary payunir sa tion kag tion ukon sing padayon? Paagi sa pila ka pagpasibu, makasulod ayhan ako sa regular payunir nga pag-alagad?’ Ang bag-o nga mga payunir nga nagpalista kutob sang Septiembre 1 kalipikado sa pagtambong sa Pioneer Service School sa masunod nga tuig.

⁴ Ang pila ka manugbantala nagpahamtang sing isa ka personal nga tulumuron agod makahimo sing dugang nga dipormal nga pagpanaksi. Mahimo ginabatyag sang iban nga kinahanglan nila ang paghimo sing epektibo nga mga pagduaw liwat ukon sing pagsugod sing bag-o nga mga pagtuon sa Biblia.

⁵ Kon matalupangdan naton nga limitado ang aton ministeryo, ano ang mahimo naton agod mapasangkad ini? Ginarekomendar sadtong nangin madinalag-on nga mangin determinado kita nga unahon ang mga intereses sang Ginharian bisan ano man ang kahimtangan. (Mat. 6:33) Kinahanglanon ang bug-os nga pagsalig kay Jehova. (2 Cor. 4:7) Pangayua ang iya bulig paagi sa pangamuyo. (Luc. 11:​8, 9) Makasalig kita nga pakamaayuhon ni Jehova ang aton mga panikasog agod mapauswag naton ang aton bahin sa pag-alagad sa iya.​—1 Juan 5:14.

⁶ Makigsugilanon sa iban nga nangin madinalag-on sa pagpasangkad sang ila ministeryo. Pamangkuta sila kon paano nila nalandas ang mga balagbag. Ang ila mga eksperiensia mahimo makakombinse sa imo nga ang masangkad nga ministeryo sarang malab-ot.

⁷ Kon ginabasa mo ang mga artikulo sa Ang Lalantawan ukon sa Ang Aton Ministeryo sang Ginharian nga nagapaathag tuhoy sa pag-alagad sa latagon, binagbinaga sing mapangamuyuon kon paano mo maaplikar ang mga panugda. Himua man ini kon nagatambong sa mga miting sang kongregasyon ukon mga asambleya. Ang mga panugda sa sining artikulo ginpasad sa programa sang sirkito nga asambleya sang nagligad nga tuig. Amo ini ang una sang isa ka serye sang mga artikulo nga gindesinyo agod buligan kita nga maaplikar ang pagpalig-on nga ginhatag sadto nga programa.

⁸ Ginkabig ni Jesus ang iya ministeryo subong ang pinakaimportante nga butang. Sia nagsiling: “Ang akon pagkaon amo ang akon paghimo sang kabubut-on sang nagpadala sa akon.” (Juan 4:34) Amo man bala sina ang aton ginabatyag? Kon amo, mangabudlay kita agod pasangkaron ang aton hilikuton kag magpaambit sing “maayong mga butang” sa iban gikan sa aton balahandian.​—Mat. 12:​35; Luc. 6:45.