Gamita sing Maalamon ang Aton mga Literatura

¹ Sadtong Septiembre kag Oktubre sini nga tuig, ang pinasahi nga mga miting ginhiwat sa bug-os nga Pilipinas upod sa mga gulang kag ministeryal nga mga alagad agod hambalan ang bag-o nga kahimusan para sa simple nga pagpanagtag sing mga literatura nga magasugod sa Enero 10, 2000. Pagkatapos sining mga miting, sa tapos sang Pagtinuon sa Lalantawan para sa semana sang Nobiembre 1, isa ka sulat ang ginbasa sa tanan nga kongregasyon agod binagbinagon ang mga pamangkot may kaangtanan sining bag-o nga kahimusan. Nian, sadtong semana sang Nobiembre 8, ang isa ka pinasahi nga Miting sa Serbisyo ginhiwat sa tanan nga kongregasyon agod ipakita kon paano himuon ang aton pagbantala nga hilikuton sa idalom sang bag-o nga kahimusan. Napat-od namon nga handa na karon ang tanan agod sugdan ining bag-o nga kahimusan sa Enero 10, pagkatapos gid sang aton katapusan nga distrito nga kombension.

² Bangod itanyag naton ang aton mga literatura kag mga magasin nga wala sing bayad sa publiko, importante gid nga gamiton naton ang paghantop sa pagpanagtag sang aton mga publikasyon. Padayon naton nga pukawon ang interes paagi sa paggamit sa isa sang mga introduksion gikan sa Reasoning nga libro. Kon wala sing interes nga ginpakita, indi na kinahanglan nga itanyag ang literatura. Indi naton luyag uyangan ang bisan ano man sang aton mga literatura paagi sa pagtanyag sini sa mga tawo nga indi interesado. Apang kon ginpakita ang interes kag ang tagbalay nagapasugot nga basahon ang literatura, mahimo ini itanyag. Luyag naton gamiton sing maalamon ang aton mga literatura.

³ Ang masunod amo ang mga komento nga mahimo ninyo isiling sa tapos mapakita ang literatura: “Kon luyag mo mabasa ini nga publikasyon, nalipay ako nga ibilin ini sa imo.” Ayhan ang tagbalay magapamangkot: “Tagpila ini?” Mahimo ka makasabat: “Wala kami naganegosyo. Wala namon ginabaligya ini nga literatura. Ang amon hilikuton ginahimo sing boluntaryo sa 233 ka kadutaan sa bug-os nga kalibutan agod buligan ang mga tawo nga mahibaluan ang dalan padulong sa kabuhi nga walay katapusan. Kon luyag mo mag-amot sa sining hilikuton, nalipay ako nga batunon ini.”

⁴ Sa pila ka hitabo, ang topiko tuhoy sa mga donasyon sa aton bug-os kalibutan nga hilikuton mahimo nga masaw-a hambalan. Halimbawa, ang isa ka interesado nga tagbalay mahimo mamangkot: “Ginahatag mo bala ini sing libre?” Mahimo kita magsabat: “Kon luyag mo mabasa ang publikasyon kag luyag matigayon ini, huo, imo na ini. Magaduaw ako liwat sa masunod nga semana agod binagbinagon ang nahambalan naton kag sugiran ka sing dugang pa tuhoy sa amon bug-os kalibutan nga hilikuton.” Sa masunod nga pagduaw ang tagbalay mahimo masugiran kon paano ginagastuhan ang aton hilikuton.

⁵ Ukon ang tagbalay mahimo gilayon magbaton sang literatura kag magsabat, “Salamat.” Makasabat ka paagi sa pagsiling: “Wala sing ano man. Nahibaluan ko nga maluyagan mo ini. Madamo ang nagapalibog kon paano ginagastuhan ini nga hilikuton, kay ginahimo namon ini sa bug-os nga kalibutan. Madamo sang nagabaton sang amon mga publikasyon ang nagapakita sing apresasyon sa natun-an nila kag nagaboluntaryo sa paghatag sing diutay nga donasyon agod mangin posible ang dugang pa nga pagpanagtag. Kon himuon nila ina, nalipay kami nga batunon ini.”

⁶ Maathag gid nga indi naton tuyo nga ipanagtag ang mga literatura kay bisan sin-o lang. Luyag naton nga mabuligan sang mga literatura ang sinsero nga mga tawo nga mahibaluan sing dugang pa ang tuhoy sa mga katuyuan ni Jehova. Pag-uyang lamang kon ibilin naton ang mga literatura sa mga tawo nga wala sing apresasyon sa espirituwal nga mga butang. (Heb. 12:16) Paano naton mahibaluan kon may interes nga ginapakita? Kon ang isa ka tawo handa nga makigsugilanon sa imo, isa ini ka maayo nga tanda. Kon nagapamati sia samtang nagahambal ka, ukon nagapabutyag sang iya opinyon, ukon nagapamangkot, ginapakita sini ang interes. Kon nagapakighambal sia sa imo sa malulo, matinahuron nga paagi, nagapahangop ini sing malulo nga panimuot. Ang pagsunod samtang ginabasa mo ang Biblia nagapakita sing pagtahod sa Pulong sang Dios. Kon makita mo ini nga mga ebidensia sang sinsero nga interes, ayhan basahon niya kag apresyahon ang literatura nga mabaton niya.

⁷ Ang bisan ano man nga amot nga mabaton gikan sa publiko dapat ihulog sa kahon-alamutan sa Kingdom Hall nga nasulatan sing “Contributions for the Society’s Worldwide Work​—⁠Matthew 24:⁠14.” Ginapasalamatan naton ina nga mga amot, apang ang matuod, ini nga mga amot gikan sa publiko indi nagakaigo agod mabayaran ang tanan nga kagastuhanan. Kon amo, sin-o ang may una nga salabton sa pagsakdag sa bug-os kalibutan nga hilikuton, nga nagalakip sang pag-imprinta, pagpadala, kag pagpanagtag sing mga literatura kag mga magasin? Ang katawhan mismo ni Jehova amo ang nagasakdag sang bug-os kalibutan nga hilikuton. Busa, sugod sa Enero, kita tanan dapat mangin mahunahunaon kag sistematiko sa pag-amot. Ginapakamaayo sang madamo nga mag-amot sa tion nga nagakuha sila sang ila mga literatura kag mga magasin gikan sa counter sang Kingdom Hall, kay sa sining paagi ginapahanumdom sila nga ang mga literatura nagabili sing kuwarta agod maimprinta kag mangin bahin gid sang bug-os kalibutan nga hilikuton sa pagbantala.

⁸ Samtang ang mga amot pirme nangin boluntaryo, ini nga kahimusan nagatugot para sa indibiduwal nga pagbuot kag makatarunganon nga paghatag sing igtalupangod agod mapun-an ang mga kagastuhanan sang ginatuytuyan-sang-espiritu nga organisasyon ni Jehova. Ang tagsatagsa sa aton karon may dugang nga responsabilidad sa moral kag pribilehiyo nga padunggan si Jehova sang aton hamili nga mga butang. (Hulu. 3:9) Kon paano kita nagahulag sa mga pagtuytoy sang espiritu ni Jehova samtang nagahatag kita sang aton mga amot magapakita sang aton dugang nga pagkahibalo nga ginakabig kita nga masaligan ni Jehova.​—⁠1 Cor. 4:​1, 2.

⁹ Ini nga pagbag-o sa aton paagi sang pagbantala nagahatag sing dugang pa nga pamatuod sa mga tawo nga “indi kita mga manuglibod sang pulong sang Dios.” (2 Cor. 2:17) Nagapamatuod man ini nga tuhay gid kita kag nahamulag gikan sa kalibutan.​—⁠Juan 17:⁠14.

¹⁰ Nagasalig kita nga ang mga nagaapresyar sang hamili nga kamatuoran sang Pulong sang Dios kag kabilihanan sang mga aman sang Sosiedad, lakip na ang pag-imprinta sang aton mga publikasyon, padayon nga tinagipusuon nga mapahulag sa pag-amot sing maalwan sa sining hilikuton tubtob sa katapusan sining sistema. (2 Cor. 9:​6-14) Makasalig kita sing bug-os kay Jehova, nakahibalo nga ‘makahimo sia sing labi pa ka lakas kabugana nga labaw pa sa tanan nga butang nga aton ginapangayo ukon ginahunahuna.’ (Efe. 3:20) Apang, agod mabaton ang bug-os nga pagpakamaayo ni Jehova, pat-uron naton nga ginahimo naton ang aton bahin paagi sa paggamit sing maalamon sang aton mga literatura kag paagi sa ‘pagdala sang bug-os nga ikapulo nga bahin sa tambubo.’ (Mal. 3:10) Kabay nga pakamaayuhon ni Jehova ang aton tingob nga mga panikasog nga himuon ini sa masunod nga tuig.