“Magpabilin Kamo nga Nagamata”

¹ Sa tapos ilaragway ang importante nga mga hitabo nga magatanda sa katapusan nga mga adlaw sining sistema sang mga butang, ginlaygayan ni Jesus ang iya mga disipulo nga ‘magpabilin nga nagamata.’ (Mar. 13:33) Ngaa dapat magpabilin nga nagamata ang mga Cristiano? Bangod nagakabuhi kita sa labing makatalagam nga tion sa maragtas sang tawo. Makatalagam nga tuyhon kita sa espirituwal. Magaresulta ina sa indi naton pag-apresyar sa hilikuton nga ginhatag ni Jehova sa aton nga himuon sa sining tion sang katapusan. Ano ina nga hilikuton?

² Ginapabantala ni Jehova sa iya katawhan sa bug-os nga duta ang maayong balita tuhoy sa iya Ginharian​—⁠ang lamang nga paglaum para sa katawhan. Ang pagpanghikot naton sing suod upod sa organisasyon sang Dios nagapakilala sa aton subong matuod nga mga Cristiano, nga mahunahunaon sa mga tion kag sa kinahanglanon nga buligan ang iban nga makabati sang “mga pulong sang kabuhi nga walay katapusan.” (Juan 6:68) Paagi sa makugi nga pagpakigbahin sa sining labing importante nga hilikuton, ginapamatud-an naton nga nagamata kita sa espirituwal.

³ Ginapahulag sa Pagbantala: Subong mga Saksi ni Jehova, dapat kita mangin positibo sa aton ministeryo. Ang gugma sa Dios kag sa isigkatawo personal nga nagapahulag sa aton nga makigbahin sa pagbantala nga hilikuton. (1 Cor. 9:​16, 17) Sa paghimo sini, maluwas naton ang aton kaugalingon subong man ang mga nagapamati sa aton. (1 Tim. 4:16) Kabay nga determinado kita sa pagpakigbahin sing regular kon mahimo sa pagbantala tuhoy sa labing maayo nga panguluhan nga maagom sang katawhan​—⁠ang Ginharian sang Dios!

⁴ Ang pagkahilingagawon sang aton ministeryo ginapatudok sa aton sang isa ka importante nga kamatuoran​—⁠ang pagsugod sang dakung kapipit-an magaabot samtang masako pa kita sa sining hilikuton. Bangod wala kita makahibalo sang adlaw kag oras, dapat kita magpabilin nga nagamata kag nakahanda sa tanan nga tion, mapangamuyuon nga nagasalig kay Jehova. (Efe. 6:18) Ang pagbantala nga hilikuton padayon nga nagasangkad. Apang sa dili madugay, ang pinakadaku nga pagpanaksi nga hilikuton sa maragtas sang tawo magalab-ot sa talipuspusan.

⁵ Tumana sing matutom ang sugo ni Jesus nga ‘magpabilin nga nagamata.’ Mas kinahanglan ini karon sangsa una. Kabay nga maghulag kita nga may kadagmit. Sa karon kag sa tagsa ka adlaw, magpabilin kita nga mabinantayon, alisto, kag aktibo sa pag-alagad kay Jehova. Huo, kabay nga “magpabilin [kita] nga nagabugtaw kag huptan ang aton kaligdong.”​—⁠1 Tes. 5:⁠6.