Isa ka Pribilehiyo nga Bukas sa mga Bata

¹ Madamo sa mga ginikanan na karon ang malipayon nga nagahinumdom sang pribilehiyo nga gin-agom nila subong mga kabataan nga nagdaku sa kamatuoran​—⁠ang Adlaw Sang Magasin nga hilikuton. Ina nga hilikuton ginsugdan sa tanan nga kongregasyon sang 1949. Isa ka adlaw sa isa ka semana, ang tanan dapat magkonsentrar sa pagpanagtag sing Ang Lalantawan kag Magmata! sa mga dalan, sa pamalaybalay, sa mga tiendahan, kag sa iban pa nga mga paagi. Ang mga bata nga manugbantala ilabi na nga nagpaabot nga makapakigbahin sa sining hilikuton bangod naghatag ini sa ila sing kahigayunan nga makapakigbahin sa ginahimo man sang mga hamtong sa kongregasyon. Matuod bala ini sa imo sang bata ka pa?

² Ilakip ang Imo mga Anak: Ang mga bata pa kaayo nga indi pa handa sa pag-umpisa sing Makasulatanhon nga paghambalanay sa ganhaan makatanyag gihapon sing mga magasin. Nagakinahanglan lamang ini sang pagtuon sing isa ka simple nga presentasyon nga may pila ka malip-ot nga mga dinalan. Ang malip-ot nga komento, ayhan sa laragway sa panghapin, mahimo nga nagakaigo na. Madamong tagbalay ang gilayon nga nagabaton sing mga magasin gikan sa aton mga kabataan, sa masami nagakomento sing kalahamut-an tuhoy sa pagkasinsero kag maayo nga paggawi sining mga pamatan-on. Upod ang diutay nga bulig, ini nga pag-alagad isa ka butang nga ang mga kabataan mahimo mangin sampaton, nagaamot sing hamili sa pagpalapnag sa mensahe sang Ginharian. Sa pagkamatuod, samtang nagadaku ang mga kabataan, luyag sang ila mga ginikanan nga buligan sila nga mag-uswag sing padayon sa pagpalambo sang ila mga ikasarang sa pagpanaksi.

³ Si Manuel nagsugod sa pagbantala sa pamalaybalay sang tatlo ka tuig ang iya edad. Gintudluan sia sang iya mga ginikanan sa pagsaulo sing isa ka malip-ot nga presentasyon. Makugi sia nga nagbantala upod sa ila, nagapahamtang sing madamong magasin, brosyur, kag tract. Nagpanaksi man sia sing di-pormal. Isa ka bes sang gindala sia sang iya mga ginikanan sa isa ka parke agod maglingawlingaw, nagmatumato sia nga pahamtangan sing mga tract ang iban nga mga tawo didto. Bisan nga bata pa sia katama, ang kapagsik ni Manuel sa ministeryo isa ka tuburan sang daku nga pagpalig-on sa iya mga ginikanan kag sa bug-os nga kongregasyon.​—⁠Hulu. 22:⁠6.

⁴ Ang tagsa ka Sabado ginatalana subong “Magazine Day” sa 2000 Calendar of Jehovah’s Witnesses. Mga ginikanan, ginarekomendar namon nga magpakita kamo liwat sing interes sa sining hilikuton, ginabuligan ang inyo mga anak sa pagpakigbahin sing regular kon mahimo sa sining pribilehiyo sang pag-alagad.