Pamangkot

◼ Paano mabuligan sang mga attendant ang mga ginikanan nga mahuptan sang ila mga anak ang nagakaigo nga paggawi sa mga miting?

Ang mga kabataan kinaugali na nga mapagsik, wala maanad sa pagpungko sa malawig nga tion. Pagkatapos sang miting, ang kabataan may natago nga kapagsik nga mahimo magbuyok sa ila sa pagdalagan kag sa paglagas sa iban nga kabataan sa Kingdom Hall ukon sa iban pa nga mga duog-tilipunan, parking lot, ukon sa higad-dalan. Apang, matuod gid ang hulubaton: ‘Ang bata nga ginapabayaan nagahatag sing kahuluy-an sa iya ginikanan.’​—⁠Hulu. 29:⁠15.

Sing makapasubo, ang pila sang aton may edad nga mga kauturan nga lalaki kag babayi nahalitan sing malubha bangod nadalasa kag natumba sila sang mga kabataan. Ginbangdan ini sang di-nagakaigo nga pag-antos subong man sing di-kinahanglanon nga gasto para sa mga ginikanan kag sa kongregasyon. Para sa ila kaugalingon nga kalig-unan kag sa kaayuhan sang iban, ang mga kabataan indi dapat pagtugutan nga magduludalagan kag maghampang sa sulod kag sa guwa sang Kingdom Hall.

Ang mga ginikanan may Makasulatanhon nga responsabilidad nga hanason ang ila mga anak nga tamdon ang aton mga duog sa pagsimba nga may nagakaigo nga pagtahod. (Manugw. 5:​1a) Sa aton Cristianong mga miting, mga asambleya, kag mga kombension, ang mga attendant ginatangdo sa pagtatap nga “ang tanan nga butang himuon sing nagakaigo” kag nga may “maayo nga kahimusan.” (1 Cor. 14:​40; Col. 2:5) Dapat sila pirme mangin alisto antes, sa tion, kag sa tapos sang programa, sa sulod kag sa guwa. Kon ang bata nagadalagan ukon nagasinabad, ang attendant malulo nga magasaway sa bata kag mapaathagan niya ang bata kon ngaa indi maayo ini nga mga buhat. Ang ginikanan sang bata dapat man sugiran sing malulo tuhoy sa problema kag sa kinahanglanon nga bantayan ang bata. Ang ginikanan dapat maghulag sing nagakaigo.

Halangpunon nga kon kaisa ang mga lapsag kag ang magagmay nga mga bata mahimo maghibi ukon magbisyo sa tion sang mga miting. Ang mga attendant, nga nagaabot sa di-magkubos 20 minutos antes sang pagsugod sang programa, mahimo magtigana sang pila ka raya sa likod sa awditoryom para sa mga ginikanan nga luyag magpungko didto upod sa ila magagmay nga kabataan. Ang iban sa aton dapat magkooperar paagi sa pagtigana sini nga mga pulungkuan sa ila.

Kon ang bata nagabisyo, ang ginikanan dapat maghulag. Kon ang ginikanan wala sing ginahimo kag ang pagbisyo makatulublag, ang attendant malulo nga magapangabay sa ginikanan nga dalhon ang bata sa guwa sang awditoryom. Kon ginaagda naton ang mga bag-uhan upod sa ila magagmay nga kabataan sa mga miting, dapat naton sila tuparan sa pulungkuan kag magbulig kon ang mga bata maghibi ukon magsinabad.

Nalipay kita nga makita ang tanan sing pangidaron nga kabataan sa Kingdom Hall kag mapanilagan ang ila maayong paggawi upod sa panimalay sang Dios. (1 Tim. 3:15) Paagi sa ila pagtahod sa kahimusan ni Jehova sa pagsimba, nagahatag sila sing kadungganan sa iya kag ginaapresyar sila sang tanan sa kongregasyon.