Pamangkot
◼ Paano makabulig ang kada isa agod makapamati sing maayo kag makabenepisyo ang tanan sa mga miting sa kongregasyon?—Deut. 31:12
Bangod sang tudok nga pagtahod kay Jehova kag sa mga miting sa kongregasyon, ginapalig-on ang tanan nga mag-abot sing temprano kag mangin handa sa mga programa. Mas maayo kon ang una mag-abot nga mga kauturan magpungko sa prante agod ang mga pulungkuan sa likod matigana sa may magagmay nga kabataan kag sa mga naulihi. Antes magsugod ang miting, dapat i-off ukon i-silent ang mga cellphone agod indi ini makaisturbo sa mga tagpalamati. Mabuhinan ang mga tublag kon huptan sang tanan nga tumalambong ang pagtahod sa bug-os nga miting.—Man. 5:1; Fil. 2:4.
Kon may mga bag-uhan nga magtambong sa mga miting, dapat tuparan sila sang mga kauturan nga nakakilala sa ila. Kinahanglanon gid ini ilabi na kon may magagmay sila nga kabataan nga dapat tatapon. Mahimo amo pa lang ini ang una nila nga pagtambong sa mga miting. Gani, mas gusto nila nga sa likod magpungko agod indi sila makatublag kon maggua para atipanon ang ila magagmay nga kabataan sing makadali. (Hulu. 22:6, 15) Indi maayo nga magpungko sa tuhay nga hulot ang mga pamilya nga may magagmay nga kabataan, nga nagahunahuna nga hilway sila sa paggahod. Labing maayo para sa mga ginikanan nga disiplinahon ukon tatapon nila ang ila kabataan sa gua sang tilipunan kag dayon magsulod upod ang ila kabataan.
Nagapangalagad ang mga atendant agod mahuptan ang kahim-ong sa sulod sang tilipunan. Ginabuligan nila ang mga pamilya kag ang mga nagakaulihi nga makapangita sing pulungkuan. Ang mga atendant dapat mangin mataktikanhon kag mainandamon sa pagbulig sa iban nga makapungko sing komportable nga indi makatublag sa iban. Kon may mag-utwas nga mga tublag, maalamon nila ini nga ginaatipan. Kon may nagapasaway nga bata, ginatatap nila ini sing mainayuhon.
Ang kada isa nga nagatambong mahimo makabulig agod ang tanan makapamati sing maayo kag makatuon parte kay Jehova kag sa iya katuyuan para sa mahidaiton kag matarong nga bag-ong kalibutan—Heb. 10:24, 25.