Ginaapresyar Mo Bala ang Pagpailob ni Jehova?

¹ Kon si Jehova wala magpailob sang nagligad nga 10, 20, kag kapin pa ka tuig, agod palawigon pa ang pagpanaksi, natun-an mo bala kuntani ang kamatuoran? Daku gid ang aton pagpasalamat nga gintugutan niya ang madamo pa nga tawo nga “makadangat sa paghinulsol.” Apang, ang daku nga adlaw sang paghukom ni Jehova “magaabot subong sang makawat.” (2 Ped. 3:​9, 10) Gani, ang pagpailob sang Dios indi dapat hangpon sing sayop subong pagpalantang sa paglaglag sining sistema sang mga butang.​—⁠Hab. 2:⁠3.

² Magbatyag sing Kaluoy sa mga Tawo: Ang pagkamainantuson ni Jehova labaw sa mahangpan naton. Indi naton dapat mawasi ang katuyuan sini. (Jon. 4:​1-4, 11) Nakita ni Jehova ang makaluluoy nga kahimtangan sang katawhan kag naluoy sia sa ila. Amo man sini ang balatyagon ni Jesus. Bangod naluoy sia sa mga kadam-an nga ginbantalaan niya, luyag niya nga pasangkaron ang pag-ebanghelyo nga hilikuton agod madamo pa ang may higayon nga makatigayon sing kabuhi nga walay katapusan.​—⁠Mat. 9:​35-38.

³ Kon may mga trahedya kag mga kalamidad nga nagakatabo, wala bala kita nahanuklog sa mga tawo nga wala makahibalo sang kamatuoran? Ang mga tawo sa karon subong sang “mga karnero nga wala sing manugbantay” samtang ginatinguhaan nila nga atubangon kag hangpon ang kagamo sa kalibutan. (Mar. 6:34) Paagi sa makugi nga pagbantala sing maayong balita, ginalugpayan naton ang mga tawo nga may tagipusuon nga husto nga napahamtang kag ginapakita ang aton apresasyon sa pagpailob ni Jehova.​—⁠Binu. 13:⁠48.

⁴ Ang Aton Hilikuton Hilingagawon: Sang nagligad nga tuig 323,439 ang ginbawtismuhan kag kapin sa 14,000,000 ang nagtambong sa Memoryal. Daku gid ang posibilidad nga madamo pa ang makalikaw sa kalaglagan sining malauton nga sistema! Kon daw ano ka daku ang “dakung kadam-an,” wala kita makahibalo. (Bug. 7:9) Kon daw ano pa ka dugay ang aton hilikuton sa pagbantala, wala kita makahibalo. Apang si Jehova nakahibalo. Ang maayong balita ibantala tubtob sa iya kaayawan, “kag ugaling magaabot ang katapusan.”​—⁠Mat. 24:⁠14.

⁵ Ang tion nga nabilin ginpalip-ot, kag ang adlaw sang Dios malapit na. (1 Cor. 7:​29a; Heb. 10:37) Sa walay duhaduha, “ang aton kaluwasan labing malapit na sangsa tion nga nangin mga tumuluo kita.” (Roma 13:11) Indi naton pagwasihon ang katuyuan sang pagpailob sang Dios. Sa baylo, magbantala kita sing hilingagawon agod madamo pa nga nahidlaw sa pagkamatarong ang mahimo nga makaagom sang daku nga kaluoy ni Jehova.