“Madamong Beses na Naton Napangabudlayan ang Aton Teritoryo!”

¹ Nagbatyag ka na bala nga ang inyo teritoryo masunson gid nga napangabudlayan amo nga wala na sing tulad-karnero nga mga tawo nga nabilin sa sini? Ayhan naghunahuna ka: ‘Nahibaluan ko na ang reaksion sang mga tawo. Ngaa balikbalikan pa ang mga tawo nga indi naman interesado?’ Matuod nga madamong teritoryo ang masunson ginapangabudlayan. Apang, ini nga katunayan dapat tamdon sing positibo, indi sing negatibo. Ngaa amo sini? Talupangda ang apat ka rason nga ginahatag sa ubos.

² Ang Aton mga Pangamuyo Ginsabat: Si Jesus nagsiling: “Sa pagkamatuod, ang alanyon bugana, apang pila lamang ang mga mamumugon. Busa pakitluoy kamo sa Agalon sang alanyon nga magpadala sing mga mamumugon sa iya alanyon.” (Luc. 10:⁠2) Sa sulod sang mga dekada nag-ampo kita kay Jehova nga hatagan kita sing dugang pa nga bulig. Sa madamo nga duog, may yara na kita sang dugang pa nga mamumugon nga kinahanglanon, kag ginatuptupan naton ang teritoryo sing mas masunson. Indi bala dapat kita magkalipay bangod sang katunayan nga ginsabat ni Jehova ang aton mga pangamuyo?

³ Ang Pagpadayon Nagapamunga Sing Maayo: Bisan sa mga teritoryo nga masunson ginapangabudlayan, ang mga tawo nagahulag sa mensahe sang Ginharian kag nagadangat sa ihibalo sang kamatuoran. Busa, dapat kita padayon nga magduaw sa liwat kag liwat sa paglaum nga makakita sing dugang pa nga mga bunayag sing tagipusuon. (Isa. 6:8-11) Subong sang ginhimo anay sang mga disipulo ni Jesus, “magkadto kamo sing padayon” sa mga tawo sa teritoryo nga gintangdo sa inyo, nga nagapanikasog nga pukawon ang ila interes sa Ginharian sang Dios.​—⁠Mat. 10:​6, 7.

⁴ Sa Portugal ginatuptupan sang madamo nga kongregasyon ang ila teritoryo kada semana, apang nakakita gihapon sila sing mga tulad-karnero. Halimbawa, isa ka utod nga babayi ang may positibo kaayo nga panimuot. Nagsiling sia: “Antes maglakat agod mag-alagad kada aga, nagapangamuyo ako kay Jehova nga buligan niya ako nga makakita sing isa nga interesado sa pagtuon sa Biblia.” Isa ka adlaw naghimo sia sing kahimusan para sa isa ka pagtuon upod sa mga empleyado sang isa ka parlor. Apang, sang ulihi, isa na lamang ka babayi ang nag-abot para sa pagtuon. Yadto nga babayi nagsiling: “Ang iban indi interesado, apang ako interesado.” Sa sulod sang isa ka bulan nagadumala na sia sang iya kaugalingon nga duha ka pagtuon sa Biblia. Wala madugay pagkatapos sadto nagpabawtismo sia, kag sang ulihi nagpayunir!

⁵ Ang Hilikuton Ginahimo: Ang maayong balita ginabantala, suno sa gintagna ni Jesus. (Mat. 24:14) Bisan sa mga lugar diin ang mga tawo ‘indi luyag magpamati sa aton,’ ginahatagan sila sing pahibalo paagi sa hilikuton nga pagbantala. Ginapaabot naton nga ang iban indi magapamati ukon magapamatok pa gani sa kamatuoran. Apang, dapat sila paandaman sing nagakaigo tuhoy sa nagapakari nga paghukom gikan kay Jehova.​—⁠Ezeq. 2:​4, 5; 3:​7, 8, 19.

⁶ Wala Pa Kita Makatapos: Indi kita ang nagapamat-od kon san-o mag-untat sa hilikuton nga pagbantala. Nakahibalo gid si Jehova kon san-o ini dapat matapos. Nakahibalo sia kon bala may mga tawo sa aton teritoryo nga magapamati pa sa maayong balita. Sa karon, ang iban nga mga tawo nagasiling nga indi sila interesado, apang ang daku nga mga pagbalhin sa ila kabuhi​—⁠pagkadula sing palamugnan, malubha nga balatian, pagkapatay sang isa ka hinigugma⁠​—⁠​mahimo magpahulag sa ila nga magpamati sa masunod nga tion. Bangod sang pagpasulabi ukon bangod sang kasakuon amo nga indi makapamati, madamo nga tawo ang wala gid makabati sang aton ginabantala. Ang sulitsulit nga mainabyanon nga mga pagduaw mahimo magtiklod sa ila nga talupangdon ini kag magpamati.

⁷ Yadtong nagdinalagku na sining ulihi nga tinuig kag may kaugalingon na nga mga pamilya nagabinagbinag sing mas serioso sang kabuhi kag nagapamangkot sang mga pamangkot nga ang Pulong sang Dios lamang ang makasabat. Ginpasulod sa iya puluy-an sang isa ka lamharon nga iloy ang duha ka Saksi kag nagsiling: “Sang bata pa ako, indi ko gid mahangpan kon ngaa ginatabog sang akon iloy ang mga Saksi kag ginasingganan sila nga indi sia interesado, samtang ang luyag lang nila amo ang makigsugilanon tuhoy sa Biblia. Nagdesisyon ako sadto nga kon magdaku na ako, magminyo, kag may kaugalingon nga puluy-an, pasudlon ko ang mga Saksi ni Jehova kag pangabayon sila nga ipaathag sa akon ang Biblia.” Amo sina ang ginhimo niya, sa kalipay sang mga Saksi nga nagduaw sa iya.

⁸ Mahimo Bala Ikaw Mangin Mas Epektibo? Indi lamang pirme ang mga tawo nga ginaduaw naton ang rason kon ngaa daw mabudlay pangabudlayan ang teritoryo sing masunson. Kon kaisa kita mismo amo ang rason. Nagasugod bala kita nga may negatibo nga mga ideya? Makaapektar ina sang aton panimuot kag ayhan sang aton hagyo sang tingog kag pangguyahon. Ipakita ang positibo nga panimuot kag ang malipayon nga dagway. Tilawi ang bag-o nga paagi. Lainlaina ang imo presentasyon, kag panikasugi nga pauswagon ini. Mahimo nimo bag-uhon ang imo nagabukas nga pamangkot ukon gamiton ang lain nga teksto sa pagpakighambal. Pamangkuta ang iban nga mga kauturan kon ano ang nakita nila nga madinalag-on kon nagapangabudlay sa teritoryo. Magpangabudlay upod sa lainlain nga manugbantala kag payunir, kag talupangda ang mga rason kon ngaa epektibo ang ila ministeryo.

⁹ Ang hilikuton nga pagbantala sang Ginharian ginakahamut-an kag ginapakamaayo ni Jehova, kag ang pagpakigbahin naton sa sini nagapamatuod nga ginahigugma naton sia kag ang aton isigkatawo. (Mat. 22:37-39) Gani himuon naton ang aton hilikuton tubtob matapos ini, nga wala ginakapoy sa pagpangabudlay sa teritoryo sing masunson.