Daw Ano ka Importante ang Cristianong Pag-inupdanay?

¹ “No man is an island.” Ini nga pinamulong sang isa ka mamalaybay sang ika-17 nga siglo nagapalanog lamang sang ginsiling sang Biblia tuhoy sa sadsaran nga kinahanglanon sang tawo​—⁠ang pag-inupdanay. (Hulu. 18:1) Ginapun-an sang aton Cristianong pag-inupdanay ini nga kinahanglanon. Sa anong mapuslanon nga mga paagi?

² Sa Ministeryo: Ang isa sang una gid nga mga benepisyo amo kon paano kita ginapabakod kag ginasuportahan sang aton mga kauturan sa publiko nga ministeryo. Ginpadala ni Jesus ang iya mga disipulo sing “tagduhaduha” agod magbantala. (Mar. 6:⁠7; Luc. 10:1) Nahisanto sa sini nga sulundan, kon nagapangabudlay kita upod sa iban sa pag-alagad sa latagon, maeksperiensiahan naton ang kamatuoran sang Manugwali 4:​9, 10. Samtang ginahimo naton ang aton ministeryo sing magkaupod, ang pagtuo, pagkamatinumanon, kag gugma sang aton mga kaupod nagapaisog sa aton kag nagapapagsik sang aton kakugi.

³ Sa Personal nga Bulig: Ang aton paghiliutod isa man ka tuburan sang pagpalig-on kag pagtuytoy sa pag-atubang sa mga pag-ipit kag pagbato sa mga pagsulay. Mahimo ipatalupangod sa aton sang aton Cristianong mga kaupdanan ang mga kasulatan may kaangtanan sa aton personal nga mga kabalaka. Mahimo pa gani nila kita ipangamuyo, subong sang ginahimo naton sa ila. (2 Cor. 1:11) Kag ang ila maayong halimbawa pat-od nga nagapahulag sa aton sa maayo nga mga buhat kag nagapabakod sa aton.

⁴ Sa mga Miting: Ang pagpakamaayo sang Cristianong pag-inupdanay matigayon kon tayuyon kita nga nagatambong sa mga miting sang kongregasyon. (Heb. 10:​24, 25) Ang programa may yara bugana nga espirituwal nga instruksion, kag ang pagtambong naton sa mga miting nagapasuod sa aton sa aton mga masigkatumuluo. Ini nga pagtilipon nagahatag sa aton sing kahigayunan nga mabatian ang aton mga kauturan nga nagapabutyag sang ila pagtuo, sa plataporma man ukon gikan sa tumalambong. (Roma 1:12) Ang aton pag-inupdanay labi nga nagasuod kon maghambalanay kita antes kag pagkatapos sang mga miting. Ini nga mga okasyon nagahatag sa aton sing mga kahigayunan agod masugid ang aton nagapabakod-sing-pagtuo nga mga eksperiensia. Ang aton mga personalidad maapektuhan sa positibo nga paagi kon makig-upod kita sing hilway upod sa mga nagahigugma kay Jehova, sa iya Pulong, sa iya hilikuton, kag sa iya katawhan.​—⁠Filip. 2:​1, 2.

⁵ Kinahanglan naton ang aton Cristianong mga kaupod. Kon wala sila, ang paglakat sa masipot nga dalan padulong sa kabuhi mas mabudlay. Apang, bangod sang ila gugma kag pagpalig-on, makapadayon kita padulong sa matarong nga bag-ong kalibutan ni Jehova.​—⁠Mat. 7:14.