Pamangkot

◼ Paano naton dapat atipanon ang aton mga asaynment sa kongregasyon?

Ang nahiusa nga pagtinguha sang katawhan ni Jehova nagapahim-ong sa pagsinalayo sang kongregasyon. (1 Cor. 14:​33, 40) Hunahunaa kon ano ang nadalahig sa isa lamang ka miting sa kongregasyon. Luwas sa programa mismo, may nanuhaytuhay nga mga hilikuton ang mga kauturan antes kag pagkatapos sang miting. Importante man ang mga hilikuton nga indi matalupangdan sang iban. Paano ang tagsatagsa sa aton makabulig sa sini nga kahimusan?

Mangin pirme handa. Madamo sing mahimo nga mga butang ang mga tawo nga pirme handa. (Sal. 110:3) Kabalak-i ang mga masakiton kag tigulang. Magbulig sa pagpaninlo sa Kingdom Hall. Paagi sa pagmatumato madamo kita sing mapuslanon nga mabulig. Kinahanglan lang naton ang handum sa pagbulig.

Mag-alagad sing maugdang. Malipayon nga nagaalagad sa iban ang mga maugdang. (Luc. 9:48) Magapugong ini sa aton nga batunon ang indi na naton masarangan. Dugang pa, nagapugong ini sa aton nga magpasobra sa paggamit sang aton awtoridad.​​—⁠Hulu. 11:2.

Mangin masaligan. Ginpalig-on si Moises nga magpili sing “masaligan nga mga tawo” sa pag-uyat sang mga responsibilidad sa dumaan nga Israel. (Ex. 18:21) Amo man nga kinaiya ang kinahanglan karon. Tatapa sing maayo ang tagsa ka asaynment nga nabaton mo. (Luc. 16:10) Kon wala ka, siguraduha nga may nagakaigo nga mga kahimusan nga maatipan sang iban ang imo asaynment.

Himua ang imo bug-os nga masarangan. Ginalaygayan ang mga Cristiano nga manghikot sing bug-os kalag bisan sa sekular nga mga hilikuton. (Col. 3:​22-​24) Ilabi na nga dapat himuon ini kon nagapanghikot sa pagpauswag sang matuod nga pagsimba. Bisan pa daw gamay ukon daw indi importante ini nga hilikuton, pagpakamaayo ini sa kongregasyon kon ginahimo ini sing maayo.

Ang tagsa ka asaynment nagahatag sa aton sing kahigayunan sa pagpakita sang aton gugma kay Jehova kag sa aton mga kauturan. (Mat. 22:37-​39) Kabay nga atipanon naton sing matutom ang mga hilikuton nga ginsalig sa aton.