Dugang nga Pagpadaku sa Biblia!
1. Para kay sin-o anay panguna nga gindesinyo Ang Lalantawan, kag para kay sin-o naman ang The Golden Age?
1 Sang Oktubre 1, 1919, ginbalhag ang nahauna nga gua sang magasin nga The Golden Age. Napamatud-an ini nga isa gid ka mapuslanon nga gamit sa pagbantala nga hilikuton. Ngaa? Bangod espesipiko ini nga gindesinyo para sa publiko. Tuhay naman Ang Lalantawan, nga sa sulod sang madamong tinuig gintamod subong panguna nga gindesinyo para sa “diutay nga panong.” (Luc. 12:32) Mapagsik gid ang sabat sang mga manugbantala sang Ginharian sa sining bag-ong publikasyon amo nga sa sulod sang madamong tinuig mas madamo sing kopya sang The Golden Age ang napanagtag sangsa Ang Lalantawan.
2. Ano ang ngalan sang The Golden Age karon, kag ano anay ang katuyuan sini?
2 Ginbalhag ang magasin nga The Golden Age agod ipakita sa mga tawo nga ang matuod nga solusyon sa problema sang katawhan amo ang Isa ka Libo ka Tuig nga Paggahom ni Cristo, nga amo gid ang magadala sang dag-on sang dakung kalipay, kag kahamungayaan para sa katawhan. Sa nagsunod nga mga dekada madamo nga mga pagbag-o ang ginhimo sa The Golden Age agod mahatag ang mga nagabag-obag-o nga mga kinahanglanon sadtong mga tion. Sang 1937 nangin Consolation ang ngalan sini. Sang 1946 nangin Magmata! ini, ang ngalan nga kilala naton sa karon.
3. Ang Magmata! nangin epektibo nga gamit sa pagtuman sang anong tagna?
3 Halin sang pagsugod sini, daku gid ang naamot sining magasin sa dakung panaksi nga nahimo halin sang 1919. (Mat. 24:14) Apang, bangod sa pagkahilingagawon sang aton tion, daw maalamon nga himuon ang dugang pa nga pagbag-o sa Magmata!
4. (a) Ano ang kinahanglan himuon sang isa ka tawo agod malipdan sia “sa adlaw sang kaakig ni Jehova”? (b) Suno sa Bugna 14:6, 7, ano ang ginapanawagan sang “anghel nga nagalupad sa tunga sang langit” nga dapat himuon sang tanan?
4 Minilyon ka tawo ang nalipay sa pagbasa sang Magmata! bangod ginakobrehan sini ang nanuhaytuhay nga sekular nga mga topiko sa makagalanyat nga paagi. Walay duhaduha nga ang kalabanan nga nagatambong sa Memoryal kada tuig mga regular nga bumalasa sang Magmata! Apang, kon luyag sang bisan sin-o nga malipdan “sa adlaw sang kaakig ni Jehova,” kinahanglan sia maghimo sing kapin pa sangsa mangin isa lamang ka regular nga bumalasa sang aton mga publikasyon.—Sof. 2:3; Bug. 14:6, 7.
5. (a) Sugod sa Enero 2006, ano ang mangin panguna nga kaundan sang Magmata!? (b) Ano ang mahimo himuon sang madamo, kag bilang katumanan sang ano nga tagna?
5 Busa, sugod sa Enero 2006, ang Magmata! magahatag sing mas labi pa nga pagpadaku sa Ginharian sang Dios. Palig-unon sini sing mas direkta ang mga bumalasa nga mangita sing mga solusyon sa Biblia para sa ila mga problema kag panguna sini nga ipadaku ang pagpaathag sang Biblia sa mga nagakalatabo karon. Sa sining paagi, mas mahangpan sang mga bumalasa ang mga nagakalatabo karon kag ayhan ang ila mabasahan magapahulag sa ila nga magtuon sing dugang pa tuhoy kay Jehova.—Zac. 8:23.
6, 7. (a) Paano idesinyo ang Magmata! agod mabuligan ang madamo nga tawo nga iaplikar ang 1 Tesalonica 2:13? (b) Daw ano kasunson ibalhag ang Magmata!, kag pila ka lenguahe ang maapektuhan sining pagbag-o?
6 Ang Magmata! magaunod sa gihapon sing mga topiko nga makapainteres sa publiko. Apang, mas kapin nga pagpadaku ang ipatungod sa Biblia. (1 Tes. 2:13) Bangod Ang Lalantawan nagaunod sing madalom nga impormasyon tuhoy sa Biblia kag ang Magmata! magaunod sing dugang pa nga materyal nga ginpasad sa Biblia, indi na kinahanglan nga padayon pa nga ibalhag ang Magmata! sing makaduha kada bulan. Busa, sugod sa Enero 2006 nga gua sini, ang Magmata! ibalhag na subong bulanan nga magasin. Magaresulta ini sa daku nga pagpasimple sa paghanda, pagbadbad, kag sa pagpadala sing mga literatura.
7 Ining pagbag-o magaapektar sa mga 40 porsiento sang mga lenguahe diin ginabalhag ang Magmata! Sa kalabanan nga lenguahe, ang Magmata! ginabalhag na sing bulanan ukon kada tatlo ka bulan. Wala sing pagbag-o nga himuon sa publikasyon nga Ang Lalantawan.
8. Paano magamit sang mga manugbantala ang Magmata! upod sa Ang Lalantawan?
8 Mahimo itanyag sang mga manugbantala ang gua sang Magmata! kada bulan upod sa bisan ano gua sang Ang Lalantawan para sa sina nga bulan. Ang magatanyag sing Magmata! mahimo makagamit sing amo gihapon nga gua sa bilog nga bulan nga indi na kinahanglan magbag-o sang ila presentasyon sa tungatunga sang bulan, subong sang ginahimo karon.
9. Ano nga papel ang padayon nga pagatungdan sang Magmata!?
9 Sugod sang nahauna nga gua sini sang 1919, ang magasin nga gintawag nga The Golden Age, Consolation, kag Awake! na karon may daku nga papel sa pagbantala nga hilikuton. Ginapangamuyo namon nga padayon nga pakamaayuhon ni Jehova ang pagpanagtag sang magasin sa ginrebisa sini nga kaundan kag makabulig ini sa madamo pa nga katawhan gikan sa “tanan nga mga pungsod kag mga tribo kag mga katawhan kag mga hambal” nga magdangop sa Ginharian sang Dios subong ang lamang nila nga paglaum.—Bug. 7:9.