Pagbantala sang Maayong Balita Tuhoy sa Butang nga Mas Maayo Pa
1 Sa sulod sang 117 ka tuig Ang Lalantawan nangin manugpangapin sang kamatuoran sang Biblia. Sa karon, 18,950,000 ka kopya kada guwa ang ginaimprinta sa 125 ka hambal. Ang Magmata! madugay man nga nagasakdag sang Pulong sang Dios, kag may sirkulasyon na ini karon nga 15,730,000 sa 80 ka hambal.—Ipaanggid ang Colosas 1:23.
2 Ginapun-an sang mga Magasin ang Espirituwal nga Kinahanglanon: Ang Lalantawan kag ang Magmata! nakabulig sa pagpaayaw sang espirituwal nga kinahanglanon sang minilyon ka bunayag-sing-tagipusuon nga katawhan. Halimbawa, sa Ang Lalantawan sang Pebrero 1, 1996, gintun-an naton ang kinahanglanon nga magsalig kay Jehova kag sa iya Pulong. Ang Marso 1, 1996 nga Lalantawan nagpalig-on sa aton nga padayon nga magmasako sa pag-alagad kay Jehova kag padayon nga maghulat sa iya. Makapulukaw gid ang paghinun-anon sa tagna ni Sofonias! Nian yara ang makapabakod-sing-pagtuo nga paghinun-anon sa Cristianong pagkamainunungon sa Ang Lalantawan sang Marso 15, 1996. Ginpadaku sang Mayo 15 nga guwa ang kabilihanan sang pagbasa kag sang pagtuon sa Pulong sang Dios sing tayuyon. Ginapadalom sining mga artikulo ang aton paghangop kag apresasyon sa Pulong kag Ginharian sang Dios.
3 Dugang pa, ining mga magasin nagaunod sing suno-sa-tion nga mga artikulo tuhoy sa Cristianong moralidad kag sa iban pa nga mga tema nga importante katama. Ginahinun-anon sini sing prangka ang matuod nga mga hulusayon nga nagaapektar sang aton kabuhi. Subong resulta, nagaagom kita karon sing superyor nga kalidad sang kabuhi samtang nagahulat kita sang katumanan sang mga saad sang Dios tuhoy sa mas maayo pa nga mga butang sa palaabuton.—Isa. 48:17; 1 Tim. 6:19.
4 Ang malip-ot nga pagrepaso sa ginasiling sa pahina 4 sang tagsa ka guwa sang Magmata! nagapakita kon ngaa ginarekomendar naton nga basahon sang mga tawo bisan diin, bata man ukon tigulang, ining magasin. Ini nagasiling: “Ang Magmata! para sa kasanagan sang bug-os nga pamilya. Ginapakita sini kon paano landason ang mga palaligban karon. Nagareport ini sing mga balita, nagasugid tuhoy sa katawhan sa madamong kadutaan, nagausisa sang relihion kag siensia. Apang kapin pa ang ginahimo sini. Nagausisa ini lapos sa kadaygan kag nagatudlo sa matuod nga kahulugan sang mga hitabo karon, apang nagapabilin ini pirme nga wala nadampigan sa politika kag wala nagabayaw sing isa ka rasa sa isa. Labi pa ka importante, ini nga magasin nagapalig-on sing pagsalig sa saad sang Manunuga tuhoy sa isa ka malinong kag may kalig-unan nga bag-ong kalibutan nga malapit na magabulos sa karon malaut, malinapason nga sistema sang mga butang.”
5 Ipaambit ang mga Magasin sa Iban: Ipanagtag sing hilway Ang Lalantawan kag Magmata! (Ipaanggid ang 1 Timoteo 6:18.) Magdala sing mga kopya agod matanyag mo ini kay bisan sin-o nga masugilanon mo. (Manugw. 11:6) Kita tanan, lakip na ang lamharon kag bag-ong mga manugbantala, mahimo makigbahin sa pagpanagtag sa mga magasin sini nga bulan paagi sa paggamit sa malip-ot nga mga presentasyon pasad sa bag-ong mga guwa. Hibalua sing maayo ang kaundan sini, kag itanyag ini nga may kombiksion.
6 Ang Lalantawan kag Magmata! nagaunod sang impormasyon nga kinahanglan sang tagsa ka tawo. Ang pagpanagtag sini amo ang isa sang labing maayo nga mga paagi nga makabulig kita sa iban sa pagtuon sang maayong balita nga may butang nga mas maayo pa nga magaabot sa dili madugay!