Ang Tanan nga Sahi sang Tawo Maluwas
1. Sa ano nasandig ang aton tindog sa Dios?
1 Ang wala tupong nga kaayo sang Dios nagbukas sing dalan para sa kaluwasan. Kabubut-on ni Jehova nga ang “tanan nga tawo maluwas kag makadangat sa pagkilala sang kamatuoran.” (1 Tim. 2:3, 4) Ang aton tindog sa Dios, wala nasandig sa aton rasa, kahimtangan sa pangabuhi, kinaadman ukon panagway, kundi sa aton pagtuo sa halad gawad ni Jesus. (Juan 3:16, 36) Subong mga masigkamanugpangabudlay sang Dios, dapat naton isikway ang pagpasulabi, nga mahimo magtiklod sa aton nga likawan ang mga tawo nga luyag batunon ni Jehova.
2, 3. Ano ang makabulig sa aton agod indi maghukom sa mga tawo pasad sa ila panagway?
2 Likawi ang Paghukom: Ginatulok ni Jehova nga walay pagpasulabi ang tagipusuon sang mga tawo. (1 Sam. 16:7) Makita man niya kon ano ang ila sarang mahimo. Busa, ginatamod niya ang mga luyag magpahamuot sa iya nga mga bilidhon. (Hag. 2:7) Pareho bala sa Dios ang aton pagtamod?
3 Mahimo nga indi kita mapahamtang sa hitsura sang pila ka tawo nga aton masalapuan sa ministeryo. Mahimo nga di-maugdang ukon lamugo sila mamayo, buranguson, kag may aritos pa gani sa ilong ukon sa bibig. Ang pila mahimo nga wala sing puluy-an. Ang pila sa ila mahimo mangakig pa gani sa aton. Sa baylo nga hukman ini nga mga tawo nga wala na sing tsansa nga magsimba kay Jehova, dapat nga mangin positibo kita, ‘kay kita sang una mga buangbuang, dimatinumanon, kag ginpatalang’ man. (Tito 3:3) Bangod sini, dapat naton panikasugan nga bantalaan ang tanan bisan pa ang panagway nila daw indi na takus bantalaan.
4, 5. Ano ang matun-an naton gikan sa halimbawa nanday Jesus kag Pablo?
4 Mga Halimbawa sang Unang Siglo: Naghinguyang sing tion si Jesucristo sa pagbulig sa mga tawo nga sa pagtamod sang iban halos wala na sing tsansa nga magsimba kay Jehova. (Luc. 8:26-39) Bisan pa wala niya ginakunsinti ang paghimo sing sala, nahibaluan niya nga ang mga tawo mahimo makasala. (Luc. 7:37, 38, 44-48) Busa, ginahangop niya sila, “naluoy sia sa ila, kay subong sila sang mga karnero nga walay manugpahalab.” (Mar. 6:34) Mailog bala naton sing labi pa ang iya halimbawa ni Jesus?
5 Si apostol Pablo ginbato, ginbunal, kag ginbilanggo. (Binu. 14:19; 16:22, 23) Naghupot bala si Pablo sing aligutgot bangod sini kag naghinakop nga nagauyang lamang sia sang iya tion sa sining gamay nga mga grupo sang tuhay nga rasa? Wala gid. Nahibaluan niya nga basi may mga bunayag pa sing tagipusuon nga masapwan sa tunga nila, kag determinado gid sia nga pangitaon sila. Amo man bala sini ang aton pagtamod sa mga tawo sa aton teritoryo nga naghalin sa nanuhaytuhay nga rasa kag kultura?
6. Ano ang epekto kon abiabihon naton ang mga bag-uhan sa mga miting sa kongregasyon?
6 Pag-abiabi sa Iban Karon: Madamo sa mga alagad sang Dios karon ang nalipay bangod gin-abiabi anay sila sang mga kauturan sa kongregasyon, walay sapayan sang ila panagway. Sa isa ka Kingdom Hall sa Alemanya, nagtambong sa miting ang isa ka tawo nga buranguson, malaba sing buhok, kag lamugo. Ini nga tawo may malain nga reputasyon. Walay sapayan sini, mainabyanon sia nga gin-abiabi. Nagdayaw gid sia sa sini amo nga nagbalik sia pagkadason nga semana. Sa malip-ot lang nga tion, ginbag-o niya ang iya pamayo kag pamustura, nag-untat sa pagpanigarilyo, kag ginpakaslan ang iya ginapuyopuyo. Sang ulihi, sila nga mag-asawa kag ang ila kabataan nagaalagad kay Jehova subong nahiusa nga pamilya.
7. Paano naton mailog ang aton walay pinasulabi nga Dios?
7 Bilang pag-ilog sa aton walay pinasulabi nga Dios, kabay pa nga ipalab-ot naton ang pangagda sa tanan agod nga makabenepisyo man sila sa wala tupong nga kaayo sang Dios.
[Retrato sa pahina 6]
“Ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.”—Binu. 10:34, 35.