‘Ining Maayong Balita Ibantala’!
1. Ngaa makasiguro kita nga wala sing makapugong sa pagbantala nga buluhaton?
1 Wala gid sing makapugong kay Jehova sa pagtuman sang iya kabubut-on. (Isa. 14:24) Sang si Hukom Gideon kag ang iya 300 ka tinawo makig-away sa daw indi malutos nga hangaway sang mga Midianhon nga nagadamo sing 135,000, ginsilingan sia ni Jehova: “Luwasa ang Israel sa kamut sang Midian; wala ko bala ikaw pag-ipadala?” (Huk. 6:14) Ano nga buluhaton ang ginasuportahan ni Jehova subong? Si Jesus nagsiling: “Ining maayong balita sang ginharian ibantala sa bug-os napuy-an nga duta.” (Mat 24:14) Wala gid sing makapugong sa katumanan sini nga buluhaton!
2. Ngaa mapaabot naton nga buligan kita ni Jehova sa aton ministeryo subong indibiduwal?
2 Personal Kita nga Ginabuligan ni Jehova: Nagasalig kita nga buligan ni Jehova nga mangin madinalag-on ang iya mga Saksi subong isa ka grupo. Pero buligan bala kita ni Jehova subong indibiduwal? Sa tion sang kabudlayan, nabatyagan ni apostol Pablo ang personal nga suporta ni Jehova paagi sa iya Anak nga si Jesus. (2 Tim. 4:17) Makasalig kita nga pakamaayuhon man ni Jehova ang aton personal nga panikasog sa pagtuman sang iya kabubut-on.—1 Juan 5:14.
3. Sa ano nga mga kahimtangan ginabuligan kita ni Jehova?
3 Ang mga buluhaton bala adlaw-adlaw nagapaluya sa imo, amo nga diutay na lang ang imo mahimo sa ministeryo? “Sia nagahatag sing gahum sa ginapunaw.” (Isa. 40:29-31) Nagaatubang ka bala sing paghingabot kag pagpamatok? “Itungtung sa GINOO ang imo lulan, kag sia magaalay-ay sa imo.” (Sal. 55:22) Nadulaan ka bala sing kompiansa kon kaisa? “Lakat ka, kag magaupud ako sa imo baba.” (Ex. 4:11, 12) Nalimitehan ka bala sa pagpakigbahin sa ministeryo bangod sang balatian? Ginapabaloran ni Jehova kag ginagamit ang imo bug-os kalag nga panikasog bisan ano man ini ka gamay.—1 Cor. 3:6, 9.
4. Ano ang epekto sa aton sang pagsalig kay Jehova?
4 Ang kamot ni Jehova “nauntay, kag sin-o bala ang magapakulo sini?” (Isa. 14:27) Nagasalig gid kita sa pagpakamaayo ni Jehova sa aton ministeryo, gani kabay nga magpadayon kita nga wala sing untat sa pagbantala nga “may kaisog paagi sa awtoridad ni Jehova.”—Binu. 14:3.