Kon Paano Hanason ang mga Bag-uhan sa Pagbantala

1. Ano ang imo ginbatyag sa imo una nga pagbantala?

¹ Nadumduman mo bala ang imo una nga pagbantala sa balay kag balay? Mahimo nga ginakulbaan ka. Kon upod mo ang nagatuon sa imo sa Biblia ukon iban nga manugbantala, pat-od gid nga nalipay ka sa iya bulig. Karon nga eksperiensiado ka na nga ministro, ikaw naman ang yara sa kahimtangan nga magbulig para hanason ang mga bag-uhan sa pagbantala.

2. Ano ang kinahanglan matun-an sang bag-o nga mga manugbantala?

² Kinahanglan mahibaluan sang mga bag-uhan kon paano masugdan ang pag-istoryahanay sa tagbalay, paggamit sang Biblia sa pagbantala, pagbalik-duaw, kag pagsugod kag pagdumala sing mga pagtuon sa Biblia. Dapat man nila matun-an kon paano makigbahin sa lainlain nga porma sang pagbantala, subong sang pagpanaksi sa kalye kag sa duog sang negosyo. Mabuligan mo sila para mapauswag nila ini nga porma sang pagbantala paagi sa imo halimbawa kag mga panugda.

3. Paano naton mabuligan ang iban paagi sa aton halimbawa?

³ Magtudlo Paagi sa Halimbawa: Ginpasundayag ni Jesus sa iya mga disipulo kon paano magbantala. (Luc. 8:1; 1 Ped. 2:21) Kon mag-iskedyul ka nga updon ang mas bag-o nga manugbantala, maghanda sing simple nga presentasyon nga mahimo mailog sang manugbantala, ayhan nagagamit sang mga sampol sa aton publikasyon. Nian magtanyag nga ikaw ang mauna sa isa ukon duha ka balay agod mabatian sang manugbantala ang imo ihambal. Sa tion sang inyo pagliton sa masunod nga balay, mahimo mo sia pamangkuton sang iya naobserbahan kon ngaa epektibo ang imo presentasyon. Makabulig ini sa iya nga mapabaloran ang pag-upod sa iban sa ministeryo kag mangin mas mahapos sa iya nga batunon ang imo mga panugda pagkatapos sang iya presentasyon.

4. Paano naton mahimo mabuligan ang bag-uhan nga manugbantala pagkatapos mapamatian ang iya presentasyon?

⁴ Magtanyag sing mga Panugda: Ginhatagan man ni Jesus ang iya mga disipulo sing mga instruksion kon paano magbantala. (Mat. 10:5-14) Mahimo mo man ini mailog sa pagbulig sa bag-uhan nga manugbantala. Kon sia na ang mahambal, pamatii sia sing maayo. Nian sa pagbiya sa balay, hatagi sia sing espesipiko kag sinsero nga komendasyon, bisan pa may nakita ka nga palauswagon sa iya presentasyon. Antes maghatag sing panugda, mahimo mo obserbahan kon napauswag niya ang iya palauswagon sa masunod nga balay. Basi kon ginakulbaan lang sia. Dumduma man nga lainlain ang ikasarang sang kada manugbantala, kag indi lang isa ang pamaagi sa paghimo sing husto nga presentasyon.—1 Cor. 12:4-7.

5. Ano ang mahimo naton isiling kon nagatanyag sing mga panugda?

⁵ Kon kaisa, mahimo mangayo sing mga panugda sa imo ang bag-uhan nga manugbantala. Pero, kon indi man gid, maghimo sing tikang sa pagbulig sa iya. Paano ini mahimo sing mataktikanhon? Ang pila ka eksperiensiado nga manugbantala nagapamangkot lang, “Puede bala ako makahatag sa imo sing panugda?” ukon, “Paano ayhan naton mapauswag ang aton presentasyon kaina?” Ang isa pa ka paagi amo ang pagsiling, “Sang bag-uhan pa lang ako, nabudlayan gid ako sa . . . , pero nakabulig ini sa akon . . . ” Kon kaisa, mapuslanon kon tan-awon ninyo nga duha ang Reasoning nga libro. Agod indi sia mabudlayan, magtanyag sing panugda sa isa lang ka bahin sang iya presentasyon.

6. Tuhoy sa ministeryo, paano ‘mapatalom sang salsalon ang salsalon’?

⁶ Ang Salsalon Nagapatalom sang Salsalon: Si Timoteo, nga isa ka eksperiensiado nga ebanghelisador, ginpalig-on ni Pablo nga magpadayon sa pagtudlo kag pag-uswag. (1 Tim. 4:13, 15) Bisan pa tinuig ka na nga nagabantala, indi ka dapat mag-untat sa pagpauswag sang imo kalantip. Magtuon gikan sa mga manugbantala nga kaupod mo sa pagbantala, bisan pa sa mga indi tanto ka eksperiensiado sa ministeryo, kag mangin maabtik sa pagbulig sa ila sing mainayuhon, ilabi na sa mga bag-uhan, nga mangin hanas nga ministro sang maayong balita.—Hulu. 27:17.