Bag-o nga Artikulo Para sa Pagsugod sang mga Pagtuon sa Biblia

1. Ano ang bag-o nga artikulo sa pangpubliko nga edisyon sang Ang Lalantawan, kag paano ini gindesinyo?

¹ Sugod sa masunod nga bulan, may bag-o nga artikulo ang pangpubliko nga edisyon sang Ang Lalantawan para buligan kita nga makasugod sing mga pagtuon sa Biblia. Natig-uluhan ini sing “Magtuon sa Pulong sang Dios.” Luwas nga manamian ang pila ka tawo sa pagbasa sa tagsa ka artikulo sini, gindesinyo man ini para binagbinagon.

2. Paano gindesinyo ini nga mga artikulo?

² Desinyo: Ang tig-ulo kag ang mga subtitulo mga pamangkot. Gintuyo ini para ipautwas sa tagbalay sa tion sang paghambalanay. Ang panguna nga mga teksto wala ginkutlo para basahon ini mismo sang tagbalay sa Biblia. Malip-ot lang ang mga parapo para mabinagbinag gilayon bisan sa puertahan lang. Ang tagsa ka artikulo nagapatuhoy sa Ginatudlo Sang Biblia nga libro para mabuligan kamo nga maliton ang pagtuon sa sini nga libro kon nagakaigo na.

3. Kon nagapamalaybalay, paano naton magamit ini nga mga artikulo sa pagsugod sing pagtuon sa Biblia sa puertahan?

³ Kon Paano Ini Gamiton: Kon nagatanyag sang mga magasin, mahimo ka makapautwas sing makapainteres nga pamangkot parte sa kabug-usan nga tema sang artikulo. Halimbawa, ang Enero 1 nga gua nagabinagbinag sa kapuslanan sang Biblia. Mahimo ka mamangkot: “Nagapati ka bala nga ang Biblia Pulong sang Dios ukon isa lang ini ka maayo nga libro? [Tuguti sia sa pagsabat.] May luyag ako nga ipakita sa imo parte sa sini nga tema.” Patuhuyi ang una nga pamangkot, basaha ang una nga parapo, kag tan-awa ang ginsambit nga teksto. Basaha liwat ang pamangkot, kag pangabaya ang tagbalay sa pagkomento. Binagbinaga ang materyal suno sa kahimtangan sang tagbalay, nga nagagamit sa nalista nga mga pamangkot. Antes maghalin, ipatalupangod ang masunod nga pamangkot kag maghimo sing pat-od nga kahimusan sa pagbalik para binagbinagon ini. Baliki sia kada semana para binagbinagon ang iban pa nga bahin sang artikulo tubtob mag-abot ang masunod nga gua. Ang isa pa amo ang direkta nga paagi sa pagtanyag sing pagtuon sa Biblia sa tagbalay. Nian gamita ang artikulo sa magasin sa pagpresentar sang pagtuon.

4. Paano naton magamit ini nga mga artikulo kon nagaduaw liwat?

⁴ Magamit mo man sing epektibo ining bag-o nga artikulo sa imo ruta sang magasin kag mga pagduaw liwat. Mahimo ka magsiling: “May bag-o nga artikulo sa Ang Lalantawan. Ipakita ko sa imo kon paano ini gamiton.” Kabay pa nga ining bag-o nga artikulo makabulig sa madamo nga “makadangat sa sibu nga ihibalo tuhoy sa kamatuoran.”—1 Tim. 2:4.