Kon Paano Maliton sa Pagtuon sa Biblia ang Pagpahamtang sing mga Magasin

1. Ano ang aton tulumuron sa sining Abril kag Mayo?

¹ Sa sining Abril kag Mayo, itanyag naton ang Lalantawan kag Magmata! upod ang tulumuron nga makasugod sing mga pagtuon sa Biblia sa Ginatudlo Sang Biblia nga libro sa pagduaw liwat. Sa ubos amo ang pila ka panugda nga mahimo makabulig. Dumduma nga dapat ini ipahisuno sa inyo teritoryo kag ihambal sa imo kaugalingon nga tinaga. Gamita ang iban nga pamaagi kon epektibo ini para sa imo.

2. Paano naton magamit ang nagabukas nga mga pahina (pahina 4-6) sang Ginatudlo Sang Biblia nga libro sa pagsugod sing pagtuon sa Biblia?

² Gamita ang Nagabukas nga mga Pahina: Ang isa nga mahimo mo ihambal sa imo pagbalik: “Ang magasin nga ginbilin ko sa imo nagapatalupangod sa Biblia. Talupangda kon ngaa importante ang pagbasa sing Biblia.” Basaha ang Isaias 48:17, 18; Juan 17:3; ukon ang iban pa nga nagakaigo nga teksto. Nian pagkatapos matanyag ang Ginatudlo Sang Biblia nga libro kag mahatagan ang tagbalay sang isa ka kopya, mahimo ka makapadayon subong sang masunod:

◼ “Nagahatag sa aton sing matuod nga paglaum sa palaabuton ang Biblia.” Ipakita sa tagbalay ang pahina 4-5 kag mamangkot, “Sa diin sa sini nga mga saad ang luyag mo makita nga matuman?” Ipatalupangod sa tagbalay ang kapitulo nga nagahinun-anon sa saad sang Kasulatan nga iya ginpili, kag binagbinaga sing makadali ang isa ukon duha ka parapo kon magsugot ang tagbalay.

◼ Ukon mahimo ka magsiling, “Ginasabat sang Biblia ang labing importante nga mga pamangkot sa kabuhi.” Ipakita sa tagbalay ang pahina 6, kag pamangkuta sia kon napaligban na bala niya ang bisan diin sa mga pamangkot nga yara sa ubos sang pahina. Buksi sa kapitulo nga nagahatag sing sabat, kag binagbinaga sing makadali ang isa ukon duha ka parapo.

◼ Ukon mahimo mo mapatalupangod ang pila sa mga tig-ulo nga yara sa mga kaundan kag mamangkot kon sa diin nga topiko sia interesado. Buksi sa sina nga kapitulo, kag ipasundayag sing makadali ang isa ka pagtuon sa Biblia.

3. Paano kita mahimo makasugod sing pagtuon sa Biblia pagkatapos nga makapahamtang sing mga magasin nga nagabinagbinag sang (a) nagalain nga mga kahimtangan sa kalibutan? (b) pamilya? (c) pagkamasaligan sang Biblia?

³ Magpautwas sing Isa ka Pamangkot sa Imo Una nga Pagduaw: Ang isa pa ka paagi amo ang pagpahamtang sing sadsaran para sa pagbalik duaw sa una nga pagduaw. Kon magbaton ang tagbalay sang mga magasin, magpautwas sing pamangkot kag magsaad nga sabton mo ini sa imo pagbalik. Tinguhai nga makahimo sing pat-od nga mga kahimusan sa pagbalik, kag siguraduha nga tumanon ini. (Mat. 5:37) Sa imo pagbalik, pahanumduma ang tagbalay sa pamangkot, kag basaha kag binagbinaga sing makadali ang isa ukon duha ka espesipiko nga parapo gikan sa Ginatudlo Sang Biblia nga libro nga masapwan ang sabat sa pamangkot. Hatagi sia sing isa ka kopya agod iya masundan. Yari ang pila ka halimbawa.

◼ Kon ang magasin nga imo napahamtang nagabinagbinag sa nagalain nga mga kahimtangan sa kalibutan, mahimo ka magsiling, “Sa masunod mahimo naton binagbinagon ang sabat sang Biblia sa sini nga pamangkot, Ano nga mga pagbag-o ang pagahimuon sang Dios sa duta?” Gamita ang pahina 4-5 sa imo pagbalik. Ukon mahimo mo ipautwas ini nga pamangkot, “Kabubut-on bala sang Dios ang mga trahedya?” Sa imo pagduaw liwat, ipakita sa tagbalay ang parapo 7-8 sang kapitulo 1.

◼ Kon ang magasin nga imo napahamtang nagabinagbinag sa pamilya, antes ka magbiya mahimo ka mamangkot, “Ano ang mahimo sang tagsa ka katapo sang pamilya agod mangin mas malipayon ini?” Sa imo pagbalik binagbinaga ang parapo 4 sang kapitulo 14.

◼ Kon ang magasin nga imo napahamtang nagabinagbinag sa pagkamasaligan sang Biblia, sarang ka makapamangkot para sa inyo masunod nga paghinun-anon, “Sibu bala sa siensia ang Biblia?” Sa imo pagduaw liwat, binagbinaga ang parapo 8 sang kapitulo 2.

4. Ano ang dapat naton himuon kon indi pagbatunon sang tagbalay ang Ginatudlo Sang Biblia nga libro?

⁴ Sa katapusan sang tagsa ka paghinun-anon, magpautwas sing iban nga pamangkot nga sabton sa masunod nga pagduaw. Kon matukod na ang regular nga pagtuon, tun-an ang libro sing sistematiko sugod sa umpisa asta sa katapusan. Ano abi kon ang tagbalay indi magbaton sing Ginatudlo Sang Biblia nga libro? Mahimo mo gihapon sia dal-an sing mga magasin kag makigsugilanon sa iya sa Kasulatan. Samtang ginapalambo mo ang iya interes, mahimo nga sa ulihi batunon niya ang pagtuon sa Biblia.

5. Ngaa tinguhaan gid naton nga indi lamang magbilin sing mga magasin sa mga tawo?

⁵ Ginsugo kita ni Jesus nga “maghimo sang mga disipulo. . . , nga nagapanudlo sa ila.” (Mat. 28:19, 20) Busa, ang aton gid tulumuron kon nagabilin sing mga magasin amo ang pagtudlo sang kamatuoran sa mga bunayag sing tagipusuon. Sa sining Abril kag Mayo, panikasugi gid nga makasugod sing isa ka pagtuon sa Biblia pagkatapos nga makapahamtang sing Ang Lalantawan kag Magmata!