Pagpanaksi nga May Kompiansa sa Duog sang Negosyo
1. Ngaa indi ka dapat maluyahan sang buot kon nagabatyag ka sing kakulba sa pagpanaksi sa duog sang negosyo?
1 Ginakulbaan ka bala nga magpanaksi sa duog sang negosyo? Kon huo, indi ka maluyahan sang buot, kay bisan si Pablo, nga isa ka maisog nga manugbantala, kinahanglan ‘magtipon sang kaisog’ agod makabantala. (1 Tes. 2:2) Makita mo sa idalom ang pila ka kinaandan nga ginakabalak-an kon nagapanaksi sa duog sang negosyo lakip na ang praktikal nga mga panugda sa pag-atubang sini.
2. Ngaa indi ka dapat magkabalaka nga basi maakig ang mga nagatrabaho?
2 Basi Maakig ang mga Nagatrabaho. Madamo nga establisimiento ang nagatanyag sang ila serbisyo sa mga tawo. Gani kon magpalapit ka ginauntatan anay nila ang ila ginaobra. Sa masami matinahuron sila, kay ginakabig ka nila nga kustomer. Paagi sa pagpamayo sing maayo kag pagkamainabyanon, mapahulag sila nga tahuron ka.
3. Paano mo malikawan nga maakig sa imo ang mga kostumer?
3 Ihambal Ko Bala ang Akon Presentasyon sa Atubang sang Madamo nga Tawo? Kon mahimo, pilia ang tion nga indi gawa madamo ang kostumer, subong sang tion nga bag-o pa lang sila nagbukas. Hulata nga wala na sing ginaatipan nga kostumer ang manedyer ukon klerk antes sia palapitan. Lip-uta lang ang imo presentasyon.
4. Ano ang mahimo mo isiling ko nagapanaksi sa lugar sang negosyo?
4 Ano ang Akon Isiling? Kon madamo sang empleyado, makighambal anay sa nagadumala sa ila. Mahimo mo isiling: “Mabudlay maabtan sa puluy-an ang mga nagatrabaho, amo nga ginbisitahan ko ikaw diri sa imo ginatrabahuan. Nakahibalo ako nga masako ka, gani indi ako magdugay.” Agod indi kita masal-an nga mga ahente, mas maayo nga indi na lang naton pagsambiton ang tuhoy sa donasyon magluwas lang kon ginpamangkot kita kon paano ginasuportahan ang aton hilikuton. Depende sa sahi sang ila trabaho, mahimo mo pangabayon ang nagadumala nga makighambal ka sing malip-ot sa mga empleyado. Sulita ang imo presentasyon sa mga empleyado. Kon daw masako ang isa ka empleyado, palip-uta ang imo presentasyon kag hatagi sia sang tract. Kon indi gid puede nga makapakig-istorya sa mga empleyado, basi puede ka makabilin sang mga literatura sa ila ginapahuwayan ukon ginasayuhan.
5. Ngaa indi ka dapat mahadlok nga magpanaksi sa duog sang negosyo?
5 Sanday Jesus kag Pablo nakapanaksi nga may kaisog sa mga tawo sa ila ginatrabahuan. Mahimo mo man ini. (Mat. 4:18-21; 9:9; Binu. 17:17) Pangabaya si Jehova nga hatagan ka sing kalmado nga tagipusuon kag kaisog. (Binu. 4:29) Sa duog sang negosyo pirme gid may tawo, gani ngaa indi mo pagtilawan ini nga sahi sang pagpanaksi?