Epektibo nga Paagi sa Pagsugod sang Paghambalanay
1. Ano ang matun-an naton gikan sa lainlain nga paagi sa pagsugod sang paghambalanay sang mga Cristiano sang una?
1 Ang mga Cristiano sang una nagbantala sang maayong balita sa mga tawo nga lainlain sing kultura kag relihion. (Col. 1:23) Isa lang ang ila mensahe, ang Ginharian sang Dios. Pero ang ila paagi sa pagsugod sang paghambalanay nagadepende sa ila tagpalamati. Halimbawa, sang nagpakighambal si Pedro sa mga Judiyo nga nagapati sa Kasulatan, ginsambit niya ang pinamulong ni manalagna Joel. (Binu. 2:14-17) Pero talupangda kon paano nangatarungan si Pablo sa mga Griego nga narekord sa Binuhatan 17:22-31. Subong, ang mga tawo sa iban nga teritoryo nagapati man sa Kasulatan, kag puede kita maggamit sang Biblia sa aton pagpamalaybalay. Pero dapat kita maghalong kon nagapakig-istorya sa mga indi Cristiano ukon indi interesado sa Biblia ukon sa relihion.
2. Paano naton magamit ang tanyag nga literatura para buligan ang mga nagapati kag wala nagapati sa Biblia?
2 Gamita sing Epektibo ang Tanyag nga Literatura: Ang tanyag nga mga literatura sa sini nga tuig sang pag-alagad magabag-o kada duha ka bulan. Nagalakip ini sang mga magasin, tract, kag brosyur. Kon ang mga tawo sa aton teritoryo indi interesado sa Biblia, puede naton magamit ang iban nga artikulo nga makapainteres sa ila. Bisan pa wala kita makabasa sang teksto sa Biblia sa una nga paghambalanay pero nagpakita sang interes ang tagbalay, mahimo kita magbalik agod buligan sia nga magtuo sa Manunuga kag sa Biblia. Pero kon nagabantala kita sa mga tawo nga nagapati sa Biblia, makagamit kita sang nagakaigo nga literatura kag paagi sa pagsugod sang paghambalanay. Mahimo naton itanyag ang libro nga Ginatudlo Sang Biblia ukon ang brosyur nga Listen to God kag Pamatii ang Dios Agod Magkabuhi Ka sing Walay Katapusan bisan indi ini ang tanyag nga literatura sa sina nga bulan. Ang importante amo ang paggamit sang epektibo nga paagi sa pagsugod sang paghambalanay.
3. Paano nangin kaangay sang duta ang tagipusuon sang mga tawo sa aton teritoryo?
3 Ihanda ang Duta: Ang tagipusuon sang tawo kaangay sang duta. (Luc. 8:15) May mga duta nga nagakinahanglan sing dugang nga paghanda antes ang binhi sang kamatuoran manggamot kag magtubo. Ang mga ebanghelisador sang unang siglo nagmadinalag-on sa pagtanom sa tanan nga sahi sang duta, gani daku gid ang ila kalipay. (Binu. 13:48, 52) Maeksperiensiahan man naton ini kon maggamit kita sing epektibo nga paagi sa pagsugod sang paghambalanay.