Indi Paglimitahi ang Imo Kaugalingon—Pagbatyag nga Indi Kalipikado
1. Ngaa nagapangalag-ag ang iban nga magtanyag sing pagtuon sa Biblia?
1 Nagapangalag-ag ka bala nga magtanyag sing pagtuon sa Biblia bangod sa banta mo indi ka makasarang magdumala sini sing epektibo? Ang matutom nga mga alagad sang una, pareho nanday Moises kag Jeremias, nagbatyag man nga indi sila kalipikado sa ila asaynment. (Ex. 3:10, 11; 4:10; Jer. 1:4-6) Gani, natural lang ini nga balatyagon. Paano mo ini malandas?
2. Ngaa naton dapat paglimitahan ang aton kaugalingon sa pagpamalaybalay lang kag itugyan sa iban ang pagdumala sing pagtuon sa Biblia?
2 Dapat naton dumdumon nga wala sing ginapangabay sa aton si Jehova nga labaw sa aton masarangan. (Sal. 103:14) Buot silingon, masarangan gid naton ang aton hilikuton nga “maghimo sang mga disipulo” kag ‘magtudlo’ sa ila. (Mat. 28:19, 20) Ini nga pribilehiyo wala ginhatag ni Jehova sa pinakaeksperiensiado lamang kag pinakamaayo niya nga alagad. (1 Cor. 1:26, 27) Gani, indi naton dapat paglimitahan ang aton kaugalingon sa pagpamalaybalay lang kag itugyan sa iban ang pagdumala sing pagtuon sa Biblia.
3. Paano ang aton kalipikasyon nga maghimo sing mga disipulo naghalin kay Jehova?
3 Pagkakalipikado Halin kay Jehova: Ang aton kalipikasyon nga maghimo sing mga disipulo naghalin kay Jehova. (2 Cor. 3:5) Gintudluan niya kita paagi sa iya organisasyon parte sa mga kamatuoran sa Biblia nga bisan ang edukado nga mga tawo wala makahibalo. (1 Cor. 2:7, 8) Ginpasulat niya ang pamaagi sang pagtudlo ni Jesus, ang Daku nga Manunudlo, agod ilugon naton, kag padayon niya kita nga ginahanas paagi sa kongregasyon. Subong man, wala kita ginapabay-an ni Jehova nga maghimo sang aton pamaagi sa pagtudlo sang Biblia. Nag-aman sia sang mga galamiton, pareho sang Ginatudlo Sang Biblia nga libro, nga nagapaathag sang kamatuoran sa lohikal kag mahapos maintiendihan nga paagi. Ang pagdumala sing pagtuon sa Biblia mas mahapos sangsa ginapamensar naton.
4. Ngaa makasalig kita nga buligan kita ni Jehova?
4 Natuman nanday Moises kag Jeremias ang ila asaynment paagi sa bulig ni Jehova. (Ex. 4:11, 12; Jer. 1:7, 8) Makapangabay man kita kay Jehova nga buligan kita. Kay man, kon nagadumala kita sing pagtuon sa Biblia, nagatudlo kita sing kamatuoran parte kay Jehova, nga kalahamut-an sa iya mga mata. (1 Juan 3:22) Gani, himua nga tulumuron ang pagpakigbahin sa hilikuton nga pagdumala sing pagtuon sa Biblia, ang pinakamakalilipay kag makapaladya nga bahin sang ministeryo.