Mahimo Ka Mangin Isa ka Manunudlo!
1. Anong pinasahi nga pribilehiyo ang dapat mangin tulumuron sang tanan nga manugbantala sang Ginharian?
1 Ang isa ka makaalayaw nga bahin sang ministeryo amo ang pagtudlo sang kamatuoran sa isa ka tawo. Isa gid ka makalilipay nga eksperiensia nga makita ang isa nga nagabaton sa mensahe sang Ginharian kag mabuligan nga mangin suod sa Soberano sang bug-os nga uniberso. (Sant. 4:8) Ang pagtudlo sa tawo nga nagapangita gid sing kamatuoran kag pagsaksi kon paano sia nagahimo sing daku nga mga pagbag-o sa iya personalidad, pagtamod, kag paggawi amo dapat ang mangin tulumuron sang tanan nga manugbantala sang Ginharian.—Mat. 28:19, 20.
2. Ngaa ang iban nagapangalag-ag sa pagdumala sing isa ka pagtuon sa Biblia, kag ano ang makabulig sa ila nga malandas ining problema?
2 Magsandig kay Jehova: Sang una, may mga matutom nga alagad nga nagpangalag-ag anay sa pagtuman sa hilikuton nga gintangdo sa ila ni Jehova. Bangod nagsandig sila kay Jehova nga Dios, nalandas nanday Moises, Jeremias, Amos, kag sang pila ka ordinaryo nga tawo ang ila pagbatyag sang pagkadi-sangkol kag gintuman ang importante nga hilikuton. (Ex. 4:10-12; Jer. 1:6, 7; Amos 7:14, 15) Si apostol Pablo “nagtipon [man] sang kaisog.” Paano? Nagsiling sia nga “paagi sa aton Dios.” (1 Tes. 2:2) Huo, tanan kita makasalig nga si Jehova magahatag sa aton sing bulig, kaalam, kag kusog nga kinahanglan naton agod makadumala sing mabungahon nga mga pagtuon sa Biblia.—Isa. 41:10; 1 Cor. 1:26, 27; 1 Ped. 4:11.
3, 4. Ano nga paghanas ang makabulig sa aton sa pagtudlo sang Pulong sang Dios?
3 Magpahanas: Ang aton Dakung Instruktor, si Jehova nga Dios, nagahanas sa aton paagi sa regular nga programa sang espirituwal nga edukasyon agod mangin sangkol gid kita nga mga manunudlo. (Isa. 54:13; 2 Tim. 3:16, 17) Magpahanas paagi sa pagpanginpulos sing bug-os sa mga kahigayunan nga mapauswag mo ang imo paghangop sa Kasulatan kag ang imo ikasarang sa pagtudlo sang mga kamatuoran sa Biblia. Bisan pa amo ini ang panguna nga katuyuan sang Teokratikong Eskwelahan Para sa Ministeryo kag Miting sa Serbisyo, ang tanan nga miting sang kongregasyon nagahanas man sa aton nga mangin manunudlo sang Pulong sang Dios.
4 Panikasugi nga tun-an kon paano itudlo sa simple nga paagi bisan ang madalom nga espirituwal nga mga kamatuoran. Ang libro nga Eskwelahan Para sa Ministeryo, pahina 227, nagapaathag: “Dapat nahangpan mo mismo ang imo topiko agod mapahangop mo ini sa iban.” Ang pagkomento sa mga miting nagabulig sa aton nga matandaan ang panguna nga mga punto nga magamit naton sa ulihi. Busa, maghanda sing maayo, kag pat-od nga ang imo kompiansa sa pagtudlo magauswag.
5. Anong dugang pa nga paghanas sa sulod sang kongregasyon ang makabulig sa aton nga mag-uswag subong mga manunudlo?
5 Pat-od gid nga ang Cristianong mga ministro nakatuon sa kada isa halin pa sang nag-umpisa sila sa pagpakigbahin sa paghimo-disipulo nga hilikuton. (Luc. 10:1) Kon posible, mag-upod sa eksperiensiado nga mga manugbantala, lakip sa mga payunir, mga gulang, kag sa mga nagalakbay nga manugtatap, sa pagdumala sang pagtuon sa Biblia nga hilikuton. Panilagi kon paano sila nagagamit sing simple nga mga ilustrasyon kag iban pa nga mga bulig sa pagtudlo nga masapwan sa mga publikasyon nga ginagamit naton sa pagtudlo. Mangayo sa ila sing panugda kon paano mo pa mapauswag ang imo pagtudlo. (Hulu. 1:5; 27:17) Pabalori ining tanan nga paghanas kay gin-aman ini sang Dios.—2 Cor. 3:5.
6. Ano ang kinahanglanon gid agod mangin isa ka manunudlo sang Pulong sang Dios?
6 Magsandig kay Jehova, kag magbenepisyo sa paghanas nga iya ginaaman. Ipangamuyo ang imo handum nga mag-uswag. (Sal. 25:4, 5) Sa amo, maeksperiensiahan mo man ang kalipay nga mabuligan ang isa ka tawo nga mangin kaangay sa imo, isa ka manunudlo sang Pulong sang Dios!