Pagpakamaayo Para sa mga Nagabulig sa Nagakinahanglan

Madamo nga tawo sa bilog nga kalibutan ang nagakinahanglan sang pagkaon kag ilistaran. Ang iban naman gusto lang sing paglaum sa palaabuton. Gusto sang Dios nga buligan naton ang mga nagakinahanglan sang bulig kag pakamaayuhon niya kita kon himuon naton ini.

ANG GINASILING SANG BALAAN NGA KASULATAN

“Ang isa nga nagakaluoy sa kubos nagapahulam kay Jehova, kag bayaran Niya ang iya ginahimo.”—HULUBATON 19:17.

ANG BUOT SILINGON SANG PAGBULIG SA NAGAKINAHANGLAN

Si Jesus nag-istorya parte sa isa ka lalaki nga ginbanggaan sang mga kawatan, ginbakol, kag ginbayaan nga halos patay na. (Lucas 10:29-37) May isa ka estranghero nga nagpundo para buligan kag atipanon ang pilason nga lalaki. Ginhimo ini sang estranghero bisan pa indi sia Judiyo.

Ining maayo nga estranghero wala lamang nagbulong sa mga pilas sang lalaki kag ginbayaran ang nag-atipan sa sini, kundi ginpaumpawan man niya sia kag ginbuligan nga maghaganhagan ang iya makaluluoy nga kahimtangan.

Ano ang matun-an naton sa sini nga istorya? Ginpakita ni Jesus nga dapat naton himuon ang tanan naton nga masarangan para buligan ang iban. (Hulubaton 14:31) Ang Balaan nga Kasulatan nagatudlo nga dali na lang dulaon sang Dios ang kapigaduhon kag ang pag-antos. Pero paano kag san-o ini himuon sang Dios? Binagbinagon sa masunod nga artikulo ang mga pagpakamaayo nga ginatigana sang mahigugmaon nga Manunuga para sa imo.