Pinasahi nga Kampanya sa Pagsugod sang Pagtuon sa Biblia sa Septiembre

Sa Septiembre, tinguhaan gid naton nga makatanyag sang pagtuon sa Biblia sa kada pamilya, nga ginagamit ang brosyur nga Magkabuhi sing Wala Katapusan! Ang mga manugbantala puede maka-auxiliary payunir nga may 30 ka oras lang nga lalab-uton. Paano kita makapakigbahin sa sining pinasahi nga kampanya?

• Sa Una nga Pag-istoryahanay: Gamita ang kober sa likod sang brosyur para mangin interesado ang aton kaistorya, dayon ipakita sa iya kon paano ginahimo ang pagtuon. Dumduma ang mga naistorya mo nga interesado, lakip na ang mga ginabalikan mo. Bisan pa nangindi sila nga magpa-Bible study sang una, basi interesado na sila sa aton bag-o nga paagi sa pagtuon kag brosyur. Indi dapat pag-ibilin ang brosyur sa mga balay nga wala sing tawo kag indi man ini pag-ilakip sa mga sulat magluwas lang kon kabalo ka nga interesado ang tawo. Ang Komite sang Pag-alagad sang Kongregasyon puede makahimo sing dugang nga kahimusan sa miting sang pag-alagad sa sini nga bulan.

• Sa Iban Pa nga Kahigayunan: Kon ang inyo kongregasyon nagagamit sang cart, i-displey ang Magkabuhi sing Wala Katapusan! nga brosyur. Sugiri ang mga interesado nga gusto magkuha sang brosyur nga puede man nila tun-an ang Biblia sing libre. Ipakita dayon sa iya kon paano ginahimo ang pagtuon sa Biblia, ukon ipakita ini sa iya sa sunod ninyo nga pag-istoryahanay. Ang manugtatap sang pag-alagad puede mag-asayn sang kalipikado nga manugbantala para magtanyag sing pagtuon sa Biblia sa mga lugar sang negosyo. Puede ka man magtanyag sing pagtuon sa Biblia sa mga upod mo sa obra ukon sa mga mapanaksihan mo sing indi pormal.

Ginsugo kita ni Jesus nga ‘tudluan ang mga tawo agod mangin disipulo niya.’ (Mat 28:19, 20) Kabay nga matuman naton ini nga sugo paagi sa sining pinasahi nga kampanya nga ginagamit ang Magkabuhi sing Wala Katapusan!