Pinasahi nga Kampanya sa Pagpanagtag Sing Bag-o nga Brosyur
1 Ginpalibugan sang madamo nga tawo karon ang mga nagakatabo sa kalibutan, apang diutay lang ang nakahibalo kon ngaa amo sini ang kahimtangan, kon ano ang yara sa palaabuton, kag kon ano ang ila himuon agod maluwas sa nagapakari nga paghukom. (Ezeq. 9:4) Agod mabuligan sila nga magmata sa pagkahilingagawon sang aton tion, isa ka pinasahi nga kampanya sa pagpanagtag sang bag-o nga brosyur nga Magpadayon sa Pagbantay! ang himuon sa bug-os nga pungsod kutob sa Lunes, Marso 21, tubtob sa Domingo, Abril 17.
2 Mahimo itanyag ang brosyur sa pamalaybalay nga ministeryo, sa mga pagduaw liwat, sa di-pormal nga pagpanaksi, ukon sa publiko nga mga duog. Apang, indi dapat itanyag sing pataka ang Magpadayon sa Pagbantay! Sa baylo, ipahamtang lamang ang mga brosyur sa mga interesado sa ginasiling sang Biblia tuhoy sa kahulugan sang mga nagakatabo sa kalibutan. Mahimo tanyagan na lang sang tract ang mga wala nagpakita sing interes.
3 Mahimo mo makuha ang atension paagi sa pagsiling:
◼ “Nagakabalaka ang madamo nga tawo sa malain kag makapakibang nga mga hitabo nga kinaandan karon. [Magsambit sing isa ka halimbawa nga lapnag sa inyo duog.] Nahibaluan mo bala nga ina nga mga butang gintagna sa Biblia? [Tuguti sia nga makasabat. Nian basaha ang teksto nga nahisanto sa imo ginsambit nga halimbawa, subong sang Mateo 24:3, 7, 8; Lucas 21:7, 10, 11; ukon 2 Timoteo 3:1-5.] Ginpahayag sang Biblia ang kahulugan sang aton tion kag kon ano ang palaabuton sang katawhan. Luyag mo bala makahibalo sing dugang pa? [Tuguti sia nga makasabat. Itanyag ang brosyur kon interesado sia.] Matigayon mo ang brosyur nga wala sing bayad. Kon luyag mo magdonar sa amon bug-os kalibutan nga hilikuton, malipay kami sa pagbaton sina.”
4 Ukon basi masapwan mo nga epektibo ini nga pagpalapit:
◼ “Madamo sa karon ang natublag sa makahaladlok nga mga hitabo ukon sa mga trahedya nga ila naagihan. Ang iban natingala kon ngaa wala ginpunggan sang Dios ini nga mga butang. Ginapasalig kita sang Biblia nga sa dili madugay paumpawan sang Dios ang mga tawo gikan sa ila pag-antos. Talupangda kon ano ang mga kaayuhan nga ihatag sang Dios sa katawhan. [Basaha ang Salmo 37:10, 11.] Luyag mo bala makahibalo pa sing dugang?” Maghinakop subong sang ginbalay sa ibabaw.
5 Tinguhai nga kuhaon ang ngalan kag direksion sang mga nakakuha sang brosyur, kag maghimo sing kahimusan nga makabalik sa pagpalambo sang interes. Ang mga panugda kon paano ini himuon magagua sa Abril 2005 nga gua sang Ang Aton Ministeryo sa Ginharian. Kon interesado gid ang tawo sa una nga pagduaw, umpisahi ora-mismo ang pagtuon sing Biblia nga nagagamit sang Magpadayon sa Pagbantay! ukon sang iban nga publikasyon, kaangay sang Ginapatuman nga brosyur.
6 Ang mga kopya sang bag-o nga brosyur matigayon pagkatapos sang Miting sa Serbisyo nga nagabinagbinag sini nga artikulo. Ginapanugda nga magkuha ang mga manugbantala kag mga payunir sing igo-igo lang nila mapahamtang sa una nga pila ka adlaw sang kampanya. Kabay nga pakamaayuhon ni Jehova ining pinasahi nga hilikuton sa kadayawan niya kag sa kaayuhan sang bunayag sing tagipusuon nga mga tawo bisan diin.—Sal. 90:17.