PAGKABUHI BILANG CRISTIANO

Buligi ang mga Tawo nga Indi Interesado sa Relihion nga Makilala Nila ang Ila Manunuga

Nagaalang-alang ka bala nga panaksihan ang mga tawo nga indi interesado sa relihion kay basi indi sila mamati? Kon huo, dumduma nga madamo nga tawo nga indi interesado sa relihion—pareho sa mga atiesta—ang nangin mga Saksi ni Jehova. Sa masami, kinahanglan lang sila buligan para makita nila ang mga ebidensia nga may Dios.—Ro 1:20; 10:14.

TAN-AWA ANG VIDEO NGA DUMDUMA—MAHIMO MAGTUO ANG WALA NAGATUO!—ANG MGA TAWO NGA INDI INTERESADO SA RELIHION, DAYON SABTI ANG MASUNOD NGA MGA PAMANGKOT:

Paano ang eksperiensia ni Tommaso makabulig sa imo nga mangin positibo kon nagapanaksi sa mga tawo nga indi interesado sa relihion?

Ang imo sabat

Kon paano ini himuon

Kon ang naistorya mo wala nagapati sa Dios, mangin mainayuhon, malulo, kag ipakita nga interesado ka sa iya ginahunahuna kag ginabatyag parte sa sina nga topiko. (2Ti 2:24) Istoryahi ninyo ang mga topiko nga nanamian niya. OK man bala sa iya kon istoryahan ninyo ang mga ebidensia nga may Manunuga? Kon OK sa iya, ipakita sa iya ang mga publikasyon kag video parte sa sina nga topiko. Ang mga brosyur nga Gintuga Bala ang Kabuhi? kag The Origin of Life—Five Questions Worth Asking ginbutang sa aton Teaching Toolbox para madali ini makita.

Sa primero, basi nagaalang-alang ka nga istoryahan ang kamatuoran sa isa nga wala nagapati sa Dios. Puede ka magpabulig sa eksperiensiado nga manugbantala. Dumduma man nga buligan kita ni Jehova para malab-ot ang tagipusuon sang mga tawo nga may husto nga panimuot—bisan pa sa umpisa wala sila nagapati nga may Dios.—Bin 13:48.