San-o Maabot ang Katapusan? Ang Ginsiling ni Jesus

BINAGBINAGA ANG DUHA KA GINSILING NI JESUS PARTE SA KATAPUSAN:

“Gani, magpadayon kamo sa pagbantay, bangod wala kamo makahibalo sang adlaw ukon sang oras.”—MATEO 25:13.

“Magpadayon kamo sa pagbantay, magpadayon kamo nga nagamata, kay wala kamo makahibalo kon san-o ang gintalana nga tion.”—MARCOS 13:33.

Gani wala sing bisan sin-o nga nakahibalo diri sa duta kon san-o matapos ining sistema sang kalibutan. Pero, ang Dios may “gintalana nga tion” ukon “adlaw kag oras” kon san-o maabot ang katapusan. (Mateo 24:36) Pero may paagi bala nga mabal-an naton nga malapit na mag-abot ang katapusan? Huo. Ginsugo ni Jesus ang iya mga disipulo nga bantayan ang pila ka hitabo nga nagapakita nga malapit na ang katapusan.

ANG TANDA NGA GINSILING NI JESUS

Ginsugid ni Jesus ang mga hitabo nga mangin tanda “sang hingapusan sang sistema sang mga butang.” Nagsiling sia: “Magailinaway ang mga pungsod kag subong man ang mga ginharian, kag may kakulang sa pagkaon kag mga linog sa nagkalainlain nga mga lugar.” (Mateo 24:3, 7) Nagsiling man si Jesus nga may magalapta nga “mga balatian” sa madamo nga mga lugar. (Lucas 21:11) Makita mo bala nga nagakatabo na subong ining mga hitabo nga gintagna ni Jesus?

Subong, madamo nga tawo ang nagaantos bangod sa inaway, gutom, linog, kag sa malala nga mga balatian. Halimbawa sang 2004, gintay-ug sang mabaskog nga linog ang Indian Ocean. Nagresulta ini sa tsunami nga nagpatay sang mga 225,000 ka tawo. Sa sulod sang tatlo ka tuig, mga 6.9 ka milyon ka tawo ang napatay sa bilog nga kalibutan bangod sa COVID-19 nga pandemic. Ginsugid ni Jesus nga ini nga mga hitabo mangin tanda nga malapit na ang katapusan sini nga sistema sang kalibutan.

ANG “KATAPUSAN NGA MGA ADLAW”

Ang panahon antes sang katapusan ginatawag sa Biblia nga “katapusan nga mga adlaw.” (2 Pedro 3:3, 4) Mabasa naton sa 2 Timoteo 3:1-5, nga sa katapusan nga mga adlaw maganubo gid ang moral sang mga tawo. (Tan-awa ang kahon nga “Antes sang Katapusan sang Kalibutan.”) Natalupangdan mo bala nga ang mga tawo subong kaugalingon lang nila ang ila ginapensar, sakon, mapintas, kag wala sing pagpalangga sa iban? Isa pa gid ini ka pamatuod nga malapit na gid ang katapusan sini nga kalibutan.

Daw ano kadugay ang katapusan nga mga adlaw? Suno sa Biblia, ‘malip-ot lamang ini nga tion.’ Dayon, laglagon sang Dios “ang mga nagalaglag sang duta.”—Bugna 11:15-18; 12:12.

MALAPIT NA NGA MANGIN PARAISO ANG DUTA

May gintalana na nga adlaw kag oras ang Dios kon san-o niya tapuson ining malain nga sistema sang kalibutan. (Mateo 24:36) Pero may isa pa ka maayong balita. ‘Indi luyag sang Dios nga ang bisan sin-o malaglag.’ (2 Pedro 3:9) Gani ginahatagan niya sing kahigayunan ang mga tawo nga mabal-an ang iya kabubut-on para mahimo nila ang iya gusto. Ngaa? Bangod gusto niya nga maluwas kita kon tapuson na niya ini nga kalibutan, para makaistar kita sa iya bag-ong kalibutan nga isa ka paraiso nga duta.

Ginasigurado sang Dios nga matun-an sang tanan nga tawo kon paano sila mangin bahin sang bag-ong kalibutan nga pagagamhan sang iya Ginharian. Nagsiling si Jesus nga ang maayong balita parte sa Ginharian sang Dios ibantala “sa bug-os nga duta.” (Mateo 24:14) Binilyon ka oras ang ginagamit sang mga Saksi ni Jehova sa bilog nga kalibutan para bantalaan kag tudluan ang mga tawo sang paglaum sa Biblia. Nagsiling si Jesus nga himuon ini nga pagbantala sa bilog nga duta antes sang katapusan.

Sa indi na lang madugay matapos na ang paggahom sang tawo. Pero may maayong balita. Mahimo ka maluwas sa katapusan sini nga kalibutan kag makaistar sa Paraiso nga duta nga ginpromisa sang Dios. Binagbinagon sa masunod nga artikulo kon paano ka makaistar sa sinang bag-ong kalibutan.