KON PAANO MATAPOS ANG WALA UNTAT NGA PAGDUMTANAY

2 | Indi Magtimalos

Panudlo sang Biblia:

“Indi magbalos sing malaut sa malaut kay bisan sin-o. . . . Himua ang masarangan ninyo sa pagpakighidait sa tanan nga tawo. Indi kamo magtimalos, . . . kay nasulat na: ‘“Akon ang pagtimalos; ako ang magabalos,” siling ni Jehova.’”—ROMA 12:17-19.

Ang Buot Silingon:

Natural lang nga magkaakig kon nahimuan kita sing malain. Pero indi gusto sang Dios nga magtimalos kita. Sa baylo, ginpalig-on niya kita nga maghulat sa iya kay sa indi na lang madugay, tadlungon niya ang tanan nga kalainan.—Salmo 37:7, 10.

Ang Puede Mo Himuon:

Kon magtimalos ang indi perpekto nga mga tawo, mas labi pa gid nga indi mag-untat ang pagdumtanay. Gani kon may nagpaakig ukon naghalit sa imo, indi magbalos. Punggi ang imo kaugalingon kag tinguhai nga mangin kalmado. Sa pila ka sitwasyon, mahimo maghaganhagan ang imo kaugot kon palampason mo na lang ang natabo. (Hulubaton 19:11) Siempre may mga bes man nga kinahanglan mo ireport ang natabo. Halimbawa, kon nabiktima ka sang isa ka krimen mahimo nga gusto mo ini ireport sa mga pulis ukon sa iban pa nga awtoridad.

Ginahalitan mo lang ang imo kaugalingon kon magtimalos ka

Pero ano abi kon daw wala sing malinong nga paagi para masolusyunan ang problema? Ukon ano abi kon nahimo mo na ang tanan mo nga masarangan para masolbar ini sa malinong nga paagi? Indi magtimalos kay magapalala lang ina sang sitwasyon. Kon himuon mo ini, matapos mo ang wala untat nga pagdumtanay. Matun-an mo man nga magsalig sa paagi sang Dios sa pagsolbar sang problema. “Magsalig ka sa iya, kag buligan ka niya.”—Salmo 37:3-5.

Eksperiensia—ADRIÁN

Gin-untat Niya ang Pagtimalos

Sang tin-edyer pa si Adrián nangin street fighter sia bangod nagadumot sia kag gusto niya magtimalos. Nagsiling sia: “Pirme lang ako nadalahig sa mga tiruhay, kag makapila ka bes nga nasapwan na lang ako sa dalan nga nagapaligo sang akon kaugalingon nga dugo.”

Sang 16 anyos si Adrián nagtuon sia sang Biblia. Nagsiling sia: “Samtang nagapadayon ako sa pagtuon sa Biblia, narealisar ko nga dapat ko bag-uhon ang akon personalidad.” Dapat niya untatan ang pagdumot kag ang pagkabayolente. Nakabulig gid sa iya ang iya natun-an sa Roma 12:17-19 nga indi magtimalos. Nagsiling sia: “Nabaton ko nga si Jehova ang magasolbar sang inhustisya sa iya paagi kag tion. Amat-amat ko nga nadula ang pagkabayolente.”

Isa ka gab-i, ginbanggaan si Adrián sang kontra niya nga gang sang una. Ang lider sini nagsinggit, “Batu!” Si Adrián nagsiling: “Daw mabalos na gid ako.” Pero sa baylo nga magbalos, nangamuyo sia sing malip-ot kay Jehova kag nalagyo.

Nagsiling pa gid si Adrián: “Pagkasunod nga adlaw, nasugata ko ang lider sina nga grupo. Daw balusan ko na gid sia, pero sa liwat nangamuyo ako sing mahipos kay Jehova nga nagapangabay sing bulig nga makontrol ko ang akon kaugalingon. Nakibot gid ako sang nagpalapit ang pamatan-on sa akon kag nagsiling: ‘Pasayluha ko sa natabo kagab-i. Ang matuod, gusto ko mangin pareho sa imo. Gusto ko magtuon sa Biblia.’ Maayo lang gid kay nakontrol ko ang akon kaakig! Bangod sadto, nagtuon kami nga duha sa Biblia.”