Nagpagiya Ako kay Jehova

HALIN SA ENGLAND PAKADTO SA AFRICA

Natawo ako sang 1935 sa banwa sang Darlaston. Sakop ini sang ginatawag nga Black Country sa England. Gintawag ini nga Black Country bangod sang maitom nga aso halin sa madamo nga factory diri. Sang mga apat ako ka tuig, nag-Bible study sa mga Saksi ni Jehova ang akon mga ginikanan. Sang nagtin-edyer ako, nakumbinsi ako sa kamatuoran kag nabawtismuhan ako sang 1952 sang 16 anyos ako.

Sa sini man nga tion, nag-obra ako sa isa ka daku nga factory nga nagahimo sang de-mano nga mga gamit kag sang mga piyesa sang mga makina. Ginhanas ako nga mangin sekretaryo sang kompanya, kag nanamian gid ako sa sini nga obra.

Sang ginpangabay ako sang manugtatap sang sirkito nga ako ang madumala sang Pagtinuon sang Kongregasyon sa Libro sa amon kongregasyon sa Willenhall kon midweek, kinahanglan ko maghimo sang importante pero mabudlay nga desisyon. Kay man, naga-attend ako sa duha ka kongregasyon sadto nga tion. Kon midweek, naga-attend ako sa kongregasyon nga malapit sa akon ginaubrahan sa Bromsgrove, nga mga 32 ka kilometro ang kalayuon halin sa balay. Kon weekend, nagapuli ako sa balay sang akon mga ginikanan, kag naga-attend ako sa kongregasyon sa Willenhall.

Bangod gusto ko suportahan ang organisasyon ni Jehova, ginbiyaan ko ang obra nga nanamian ko gid kag ginbaton ko ang pangabay sang manugtatap sang sirkito. Wala ko gid ginhinulsulan ang akon desisyon nga magpagiya kay Jehova bangod nangin malipayon gid ang akon kabuhi.

Sang naga-attend ako sa Bromsgrove Congregation, nakilala ko ang isa ka matahom nga sister nga si Anne nga nakapokus sa pag-alagad kay Jehova. Nagpakasal kami sang 1957. Nangin pribilehiyo namon nga mangin regular payunir, espesyal payunir, nagalakbay nga manugtatap, kag Bethelite. Malipayon gid ako kay kaupod ko si Anne.

Sang 1966, nalipay gid kami nga mag-eskwela sa ika-42 nga klase sang Gilead. Gin-asayn kami sa Malawi, kag maabiabihon ang mga tawo diri. Pero wala gid namon ginpaabot nga indi kami magdugay sa sini nga lugar.

ANG PAG-ALAGAD SA MALAWI SA MABUDLAY NGA MGA TION

Nag-abot kami sa Malawi sang Pebrero 1, 1967. Pagkatapos namon magtuon sang ila lenguahe sa sulod sang isa ka bulan, nag-alagad ako bilang manugtatap sang distrito. May salakyan kami nga ginatawag Kaiser Jeep. Para sa iban, masarangan kuno sini ang mabudlay nga mga dalan kag mga suba. Pero indi ini matuod kay manabaw lang nga mga suba ang masarangan sini. May mga tion nga nagatulog kami sa payag nga human sa daga ang dingding. Kon tingulan, ginabutangan sang trapal ang idalom sang atop sang payag para indi ini magtulo. Mabudlay gid ini para sa amon nga bag-o nga mga misyonero, pero nalipay gid kami sa amon asaynment.

Sang Abril, narealisar ko nga hingabuton kami sang gobierno. Nabatian ko sa radyo ang ginsiling sang presidente sang Malawi nga si Dr. Hastings Banda. Nagsiling sia nga wala nagabayad sing buhis ang mga Saksi ni Jehova kag nagapasilabot sila sa pulitika. Kabalo kami nga indi matuod ang iya mga akusasyon. Akig sa amon ang gobierno kay neutral kami kag wala kami nagabakal sang kard sang mga partido sa pulitika.

Sang Septiembre, nabasa namon sa newspaper ang akusasyon sang presidente nga nagapanggamo kuno ang mga kauturan sa bilog nga pungsod. Ginpabalo niya sa isa ka pagtilipon sang mga pulitiko nga ipatuman dayon sang iya gobierno ang ginrekomendar nga pag-ban ukon pagdumili sa mga Saksi ni Jehova. Gani gin-ban ang mga Saksi sang Oktubre 20, 1967. Wala madugay pagkatapos sini, ginkadtuan sang mga pulis kag sang mga opisyal sang immigration ang branch office para ipasira ini kag para pahalinon sa pungsod ang mga misyonero.

Tatlo ka adlaw kami sa prisuhan. Dayon gin-deport kami sa pungsod sang Mauritius nga ginakontrol sang Britain. Pero, indi magpasugot ang mga opisyal sa Mauritius nga magtener kami didto bilang mga misyonero. Gani gin-asayn kami sa Rhodesia (Zimbabwe subong). Pag-abot namon didto, indi gusto sang suplado nga opisyal sang immigration nga magsulod kami sa ila pungsod. Nagsiling sia: “Ginpahalin kamo sa Malawi. Dayon indi magsugot ang Mauritius nga magtener kamo sa ila pungsod. Subong, ari kamo diri kay matawhay diri?” Naghibi si Anne kay daw indi gusto sang mga tawo sa amon. Sadto nga tion, gusto ko nga magpuli na lang sa England. Sang ulihi, nagpasugot ang mga opisyal sang immigration nga magpaligad kami sa branch office sing isa ka gab-i basta makadto kami sa ila headquarters pagkasunod nga adlaw. Kapoy gid kami, pero padayon kami nga nagsalig kay Jehova. Pagkasunod nga hapon, wala gid namon ginpaabot nga ginpasugtan kami nga magtener sa Zimbabwe bilang mga bisita. Indi ko gid malipatan ang nabatyagan ko sadto nga adlaw. Kumbinsido ako nga ginagiyahan kami ni Jehova.

NAGAALAGAD SA MALAWI BISAN ARA SA ZIMBABWE

Sang ara kami sa branch office sa Zimbabwe, gin-asayn ako sa Service Department, kag ginaasikaso namon ang hilikuton sa Malawi kag Mozambique. Grabe ang paghingabot sa mga kauturan sa Malawi. Nalakip sa akon obra ang pag-translate sang mga report halin sa mga manugtatap sang sirkito sa Malawi. Isa ka bes, kinahanglan ko tapuson ang isa ka report, gani nag-obra gihapon ako bisan gab-i na katama. Nakahibi ako sang nabasa ko ang parte sa grabe nga paghingabot sa mga kauturan.a Pero, napalig-on gid ako sa ila katutom, pagtuo, kag pagbatas.—2 Cor. 6:4, 5.

Ginhimo namon ang amon bug-os nga masarangan para mapadalhan sang mga publikasyon ang mga kauturan nga nabilin sa Malawi kag pati man ang mga nagpalagyo sa Mozambique. Ginsaylo sa Zimbabwe ang translation team sang Chichewa, nga amo ang lenguahe sang kalabanan nga tawo sa Malawi. Ginpatindugan sila sang isa ka brother didto sang mga balay kag opisina sa iya malapad nga uma. Ginpadayon nila didto ang ila importante nga hilikuton nga amo ang pag-translate sang mga publikasyon nga nabase sa Biblia.

Kada tuig, ginapakadto namon sa Zimbabwe ang mga manugtatap sang sirkito sa Malawi para mag-attend sang Chichewa nga distrito nga kombension. Dayon ginahatagan namon sila sang mga outline sang mga bahin sa kombension. Pagbalik nila sa Malawi, gingamit nila ini nga mga outline sa ila mga pamulongpulong para palig-unon ang mga kauturan. Isa ka bes, sang nagkadto sila sa Zimbabwe, naghiwat kami sang Kingdom Ministry School para palig-unon ining maisog nga mga manugtatap sang sirkito.

Sang Pebrero 1975, ginbisitahan ko ang mga kauturan nga taga-Malawi nga nagpalagyo sa mga refugee camp sa Mozambique. Ginatuman gid sini nga mga kauturan ang bag-o nga mga instruksion halin sa organisasyon ni Jehova, lakip ang instruksion nga dapat may hubon sang mga gulang ang isa ka kongregasyon. Madamo nga hilikuton ang ginhimo sining bag-o nga mga gulang, lakip ang paghatag sang mga public talk, pagbinagbinag sang teksto kada adlaw kag sang Ang Lalantawan, kag naghiwat pa gani sila sang mga asembleya. Gin-organisar man nila ang mga refugee camp nga daw pareho sa kombension. May departamento sila para sa pagpaninlo, sa pagpanagtag sang pagkaon, kag sa pagbantay. Paagi sa bulig ni Jehova, madamo gid ang nahimo sining matutom nga mga kauturan. Napalig-on gid ako pagkatapos ko sila mabisitahan.

Sang mga 1979, ang branch office sa Zambia amo na ang nagtatap sang mga hilikuton sa Malawi. Pero pirme ko gihapon ginahunahuna kag ginapangamuyo ang mga kauturan sa Malawi, kag ginahimo man ini sang madamo pa nga kauturan. Bilang miembro sang Branch Committee sa Zimbabwe, may mga tion nga maistorya ko ang mga representante halin sa world headquarters upod ang nagapanguna nga mga brother sa Malawi, South Africa, kag Zambia. Sa sini nga mga tion, nalakip pirme sa amon ginabinagbinag ang pamangkot nga, “Ano pa ang mahimo naton para mabuligan ang mga kauturan sa Malawi?”

Sang ulihi, indi na tama ka grabe ang paghingabot. Amat-amat nga nagbalik sa Malawi ang mga kauturan nga nagpalagyo, kag wala na masyado ginahingabot ang mga kauturan nga nagpabilin. Gintugutan na sang kaingod nga mga pungsod nga magbantala kag magtipon ang mga Saksi ni Jehova kag wala na sila gin-ban. Sang 1991, amo man sini ang ginhimo sang Mozambique. Pero nagapalibog kami, ‘San-o ayhan ini himuon sang Malawi?’

NAGBALIK KAMI SA MALAWI

Sang ulihi, may pila ka pagbag-o sa gobierno sa Malawi. Kag sang 1993, wala na gin-ban sang gobierno ang mga Saksi ni Jehova. May naistorya ako sang ulihi nga isa ka misyonero kag ginpamangkot niya ako, “San-o ka mabalik sa Malawi?” Sadto nga tion, 59 anyos na ako, gani ginsilingan ko sia, “Indi na ’ko magbalik, tigulang na ’ko.” Pero sina mismo nga adlaw, nakabaton kami sing mensahe halin sa Nagadumala nga Hubon kag gin-agda kami nga magbalik sa Malawi.

Nabudlayan gid kami magdesisyon kay nanamian kami sa amon asaynment sa Zimbabwe. Nalipay gid kami sa Zimbabwe kag madamo kami sing nangin suod nga abyan. Kaayo gid sang Nagadumala nga Hubon sa amon kay ginsilingan nila kami nga depende sa amon kon bala batunon namon ang asaynment ukon indi. Gani mas mahapos tani sa amon kon magpabilin kami sa Zimbabwe. Pero ginpamalandungan ko ang ginhimo nanday Abraham kag Sara sang tigulang na sila. Ginbiyaan nila ang ila matawhay nga kabuhi kag ginsunod ang sugo ni Jehova sa ila.—Gen. 12:1-5.

Gani nagdesisyon kami nga sundon ang direksion sang organisasyon ni Jehova. Nagbalik kami sa Malawi sang Pebrero 1, 1995, kag amo man ini ang petsa sang una kami nga nag-abot sa Malawi, 28 ka tuig ang nagligad. Nag-alagad ako bilang miembro sang Branch Committee upod sa duha pa ka brother, kag nangin masako gid kami sa pag-organisar liwat sang mga hilikuton sang mga Saksi ni Jehova.

GINPAKAMAAYO NI JEHOVA ANG HILIKUTON

Ginpakamaayo gid ni Jehova ang hilikuton kag madasig ini nga nag-uswag. Sang 1993 mga 30,000 lang ang manugbantala, pero gulpi lang ini nga nagdamo kay sang 1998 sobra na 42,000 ang manugbantala.b Bangod sa sini nga pag-uswag madamo gid sang dapat himuon amo nga gin-aprobahan sang Nagadumala nga Hubon nga magtukod sang bag-o nga branch office. Nakabakal kami sing 12 ka ektarya nga lote sa Lilongwe, kag gin-asayn ako sa construction committee.

Sang Mayo 2001, gindedikar ang bag-o nga pasilidad, kag si Brother Guy Pierce sang Nagadumala nga Hubon amo ang nagpamulongpulong. Sobra 2,000 ka Saksi nga nagaistar sa Malawi ang nagtambong, kag ang kalabanan sa ila sobra na 40 ka tuig nga nabawtismuhan. Grabe gid nga paghingabot ang naagyan sining matutom nga mga kauturan sa sulod sang madamo nga tinuig sang gin-ban ang aton hilikuton. Pigado ini nga mga kauturan, pero mabakod gid ang ila pagtuo kag ang ila kaangtanan kay Jehova. Nalipay gid sila sang nag-tour sila sa ila bag-o nga Bethel. Samtang ginalibot nila ang Bethel, ginakanta nila ang mga ambahanon sang Ginharian suno sa tono kag paagi sang pagkanta sang mga taga-Africa. Bangod sini, masiling ko nga amo ini ang pinakamakatalandog nga okasyon nga naeksperiensiahan ko. Napamatud-an ko nga ginapakamaayo gid ni Jehova ang mga matutom nga nagabatas sang mga kabudlayan.

Sang natapos na ang pagtukod sang branch, nakabaton ako sing mga asaynment nga magpamulongpulong para sa dedikasyon sang mga Kingdom Hall, kag nalipay gid ako sa sini. Nakabenepisyo gid ang mga kongregasyon sa Malawi sa kahimusan sang organisasyon nga patindugan gilayon sang mga Kingdom Hall ang pigado nga mga lugar. Sang una, human sa eucalyptus ang ginatipunan sang pila ka kongregasyon. Kugon ang atop sini kag may malaba ini nga mga pulungkuan. Subong nalipay gid ang mga kauturan nga maghimo sing mga tisa sa ginhimo nila nga mga hurnuhan kag gamiton ini para magtukod sang matahom nga mga tilipunan. Pero mas gusto gihapon sang mga kauturan nga maggamit sing malaba nga mga pulungkuan kay para sa ila bisan pa puno na ini, makaigo pa gihapon ang isa ka tawo.

Nalipay man ako kay nakita ko nga ginabuligan ni Jehova ang mga tawo nga mangin hamtong nga mga Cristiano. Nagdayaw gid ako sa pamatan-on nga mga utod sa Africa kay handa gid sila pirme magbulig. Kadasig lang sa ila makatuon sang mga ikasarang paagi sa pagtudlo sa ila sang organisasyon ni Jehova kag paagi sa paghanas sa ila. Bangod sini, nahimo nila ang dugang pa nga mga responsibilidad sa Bethel kag sa kongregasyon. May gintangdo man nga bag-o nga mga manugtatap sang sirkito, kag madamo sa ila mga mag-asawa. Paagi sa ila, nagbakod pa gid ang mga kongregasyon. Grabe gid ang pressure nga naeksperiensiahan sining mga mag-asawa kay ginapaabot sang kalabanan nga tawo kag sang ila mga paryente nga magbata sila. Pero bisan pa sini, ginpili nila nga indi anay magbata kag mag-alagad sing bug-os kay Jehova.

NALIPAY GID AKO SA AKON MGA DESISYON

May mga problema na ako sa akon panglawas. Gani pagligad sang 52 ka tuig ko nga pag-alagad sa Africa, gin-aprobahan sang Nagadumala nga Hubon ang desisyon sang Branch Committee nga isaylo kami sa Britain. Nanamian gid kami sa amon asaynment, gani nasubuan gid kami sang nagbag-o ang amon asaynment. Pero, ginaatipan gid kami sing maayo sang pamilya Bethel sa Britain samtang nagatigulang na kami.

Ang pagpagiya kay Jehova amo gid ang pinakamaayo ko nga desisyon nga ginhimo. Indi gid amo sini ang akon kabuhi kon nagsalig ako sa akon kaugalingon. Kabalo gid si Jehova kon ano ang dapat ko himuon para ‘matadlong ko ang akon mga banas.’ (Hulu. 3:5, 6) Sang pamatan-on ako, nalipay gid ako sa pagtrabaho sa daku nga kompanya. Pero, mas labaw pa sa sini ang akon nabatyagan nga kalipay sa organisasyon ni Jehova. Para sa akon, ang pag-alagad kay Jehova amo ang nagahatag sa akon sang pinakamalipayon nga kabuhi asta subong.