Mga Pamangkot Gikan sa mga Bumalasa
Sang ginsulat ni David ang Salmo 61:8, nagsiling sia nga dayawon niya ang ngalan sang Dios sa “wala sing katubtuban.” Ginhunahuna bala niya nga indi sia mapatay?
Wala. Pero wala sing sala sa ginsiling ni David.
Binagbinaga ang ginsulat niya sa sini nga bersikulo kag sa iban pa nga mga bersikulo nga pareho sa sini: “Magaamba ako sing mga pagdayaw sa imo ngalan sa wala sing katubtuban samtang ginatuman ko ang akon mga panaad sa adlaw-adlaw.” “Dayawon ko ikaw, O Jehova nga akon Dios, sa bug-os ko nga tagipusuon, kag himayaon ko ang imo ngalan sa wala sing katubtuban.” “Dayawon ko ang imo ngalan sa wala sing katubtuban.”—Sal. 61:8; 86:12; 145:1, 2.
Sang ginsulat ni David ini nga mga bersikulo, wala niya ginhunahuna nga indi sia mapatay. Kabalo sia nga nagsiling si Jehova nga mapatay ang mga tawo bangod sang ila sala. Kag kabalo man si David nga makasasala sia. (Gen. 3:3, 17-19; Sal. 51:4, 5) Kabalo sia nga napatay bisan ang matutom nga mga alagad sang Dios pareho kanday Abraham, Isaac, kag Jacob. Kag kabalo si David nga mapatay man sia sa ulihi. (Sal. 37:25; 39:4) Pero ang ginsulat niya sa Salmo 61:8 nagapakita nga gusto gid niya nga dayawon ang Dios sa wala sing katubtuban, ukon samtang buhi sia.—2 Sam. 7:12.
Ang pila sa mga ginsulat ni David parte mismo sa iya kabuhi kag mga eksperiensia, pareho sang mabasa naton sa superskripsion sang Salmo 18, 51, kag 52. Sa Salmo 23, ginlaragway ni David si Jehova bilang isa ka manugbantay nga nagahatag sang giya, paumpaw, kag pangamlig. Amo man sini nga klase sang manugbantay si David. Kag gusto niya nga alagaron ang Dios ‘sa bug-os niya nga kabuhi.’—Sal. 23:6.
Dumduma man nga si Jehova ang nagtuytoy kay David sa pagsulat. Nalakip sa iya mga ginsulat ang mga tagna parte sa matabo sa palaabuton. Halimbawa, sa Salmo 110, ginsulat ni David nga magaabot ang tion nga ang iya Ginuo ‘magapungko sa tuo sang Dios’ sa langit kag makabaton sang daku nga gahom. Ngaa? Para maggahom sa tunga sang mga kaaway sang Dios kag para ‘hukman ang mga pungsod’ sa duta. Si David ang isa sa mga katigulangan ni Jesus nga amo ang Mesias. Magagahom sa langit ang Mesias kag mangin “saserdote [sia] sa wala sing katubtuban.” (Sal. 110:1-6) Nagsiling si Jesus nga parte sa iya ang tagna sa Salmo 110 kag matuman ini sa palaabuton.—Mat. 22:41-45.
Gintuytuyan si David sa pagsulat parte sa iya tion kag parte sa tion sa palaabuton. Sa sina nga tion, banhawon sia kag madayaw na niya si Jehova sing wala sing katubtuban. Gani ginalaragway sang Salmo 37:10, 11, 29 ang kahimtangan sa Israel sang una kag ang mangin kahimtangan sa bilog nga kalibutan sa palaabuton kon tumanon na sang Dios ang iya mga promisa.—Tan-awa ang parapo 8 sang artikulo nga “Mangin Kaupod Ko Ikaw sa Paraiso” sa sini nga isyu.
Gani ano ang buot silingon sang Salmo 61:8 kag sang iban pa nga mga bersikulo nga pareho sa sini? Ginapakita sini nga gusto ni David nga himayaon si Jehova sa Israel sang una sa bilog niya nga kabuhi. Kag ginapakita sini kon ano ang himuon ni David sa palaabuton kon banhawon na sia ni Jehova.