Madumduman Mo Bala?

Nabasa mo na bala sing maayo ang bag-o nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Ano ang mga benepisyo kon hatagan naton sang tion ang pagpakig-istorya kay Jehova, pagpamati sa iya, kag pagpamalandong parte sa iya?

Makahimo kita sang mas maayo nga mga desisyon, magauswag pa gid ang aton ikasarang sa pagtudlo sa iban, magabakod pa gid ang aton pagtuo, kag mas palanggaon pa gid naton si Jehova.—w22.01, p. 30-31.

Ngaa dapat kita magsalig kay Jehova kag sa mga nagapanguna sa iya organisasyon kag sa kongregasyon?

Subong na ang tion nga dapat kita magsalig sa paagi sang Dios, kag indi naton pagduhaduhaan ang mga instruksion kag mga desisyon sang mga gulang. Sa tion sang dakung kapipit-an, mangin handa kita nga tumanon ang mga instruksion bisan pa daw mabudlay ini intiendihon ukon tumanon.—w22.02, p. 4-6.

Ano ang buot silingon sang anghel sang nagsiling sia kay Zacarias nga may “tunton sa kamot ni [Gobernador] Zorobabel”? (Zac. 4:8-10)

Ini nga palanan-awon nagpasalig sa katawhan sang Dios nga mahuman gid ang pagkay-o sang templo. Manamian gid ang Dios sa sini kay suno gid ini sa gusto niya.—w22.03, p. 16-17.

Paano kita mangin maayo nga ‘halimbawa sa aton paghambal’? (1 Tim. 4:12)

Dapat mainayuhon kita kag matinahuron kon nagabantala kita, magkanta kita sing tinagipusuon, magkomento kita sing regular sa mga miting, kag maghambal kita sing matuod kag makapalig-on sa iban. Likawan naton ang masakit nga hambal.—w22.04, p. 6-9.

Ginsambit sa Daniel kapitulo 7 ang parte sa apat ka sapat (mga ginharian). Pero sa Bugna 13:1, 2, ginsambit ini nga mga sapat para ilaragway ang isa lang ka sapat. Ngaa?

Ang sapat sa Bugna 13 wala nagasimbulo sa isa lang ka gobierno, pareho sang Roma. Sa baylo, nagasimbulo ini sa tanan nga gobierno nga nagagahom sa mga tawo.—w22.05, p. 9.

Paano naton mapakita nga nagasalig kita sa hustisya sang Dios?

Kon may nag-insulto sa aton, nagsakit sang aton balatyagon, ukon nakasala sa aton, tinguhaan naton nga dulaon ang aton kaakig kag itugyan naton kay Jehova ang natabo sa aton. Dulaon niya ang tanan nga malain nga epekto sang sala.—w22.06, p. 10-11.

Ano ang dapat dumdumon sang isa ka brother kon sia ang magapangamuyo sa miting?

Indi dapat paggamiton ang pangamuyo para laygayan ang mga kauturan ukon ihambal ang mga pahibalo. Indi dapat ‘madamo sing ginasiling’ ang nagapangamuyo nga brother, ilabi na gid sa umpisa sang miting. (Mat. 6:7)—w22.07, p. 24-25.

Ano ang buot silingon nga “hukman” ang mga banhawon nga “naghimo sang malaut”? (Juan 5:29)

Indi sila pagpakamalauton base sa ila ginhimo sang una. Sa baylo, obserbahan ang ila pamatasan kag ginahimo pagkatapos sila mabanhaw. Hukman sila base sa sini.—w22.09, p. 18.

Ano ang ginpalig-on ni J. F. Rutherford sa isa ka kombension sang Septiembre 1922?

Sa kombension sa Cedar Point, Ohio, U.S.A., nagsiling sia: “Ang Hari nagagahom na! Dapat ninyo ini ipahibalo sa tanan. Gani ibantala, ibantala, ibantala, ang Hari kag ang iya Ginharian.”—w22.10, p. 3-5.

Base sa Isaias kapitulo 30, ano ang tatlo ka paagi nga ginabuligan kita sang Dios nga makabatas?

Ginapakita sini nga kapitulo nga (1) ginapamatian kag ginasabat niya ang aton mga pangamuyo, (2) ginagiyahan niya kita, kag (3) ginapakamaayo niya kita subong kag pakamaayuhon niya kita sa palaabuton.—w22.11, p. 9.

Ngaa masiling naton nga natuman na sang una ang Salmo 37:10, 11, 29 kag matuman pa gid ini sa palaabuton?

Husto gid ang paglaragway ni David sa kahimtangan sang Israel sang ginpakamaayo sila, pareho sang panahon ni Hari Solomon. Ginapatuhuyan ni Jesus ang paraiso sa palaabuton sang ginkutlo niya ang bersikulo 11. (Mat. 5:5; Luc. 23:43)—w22.12, p. 8-10, 14.