Ano ang Ginatudlo sa Aton sang Biblia Parte sa Awtor Sini?

1. Ngaa nagapasalamat ka gid sa Biblia?

NAGAPASALAMAT gid kita kay Jehova nga Dios kay ginhatagan niya kita sang Biblia. Mabasa naton sa Biblia ang maalamon niya nga mga laygay nga makabulig sa aton kon may mga problema kita. Mabasa man naton sa Biblia nga may matahom kita nga paglaum sa palaabuton. Pero ang mas importante, ginatudlo sang Biblia ang madamo nga kinaiya ni Jehova. Nalipay gid kita kon ginapamalandungan naton ang matahom nga mga kinaiya sang aton Dios, kag nagapalig-on ini sa aton nga tinguhaan nga mangin suod niya nga abyan.—Sal. 25:14.

2. Ano ang pila ka paagi nga gingamit ni Jehova para magpakilala sa mga tawo?

² Gusto ni Jehova nga makilala sia sang mga tawo. Sang una, nagpakilala sia sa mga tawo paagi sa mga damgo kag mga palanan-awon, kag gingamit niya ang mga anghel para isugid ang iya mensahe sa iban. (Num. 12:6; Binu. 10:3, 4) Indi gid naton matun-an ini nga mga damgo kag mga palanan-awon, ukon ini nga mga mensahe halin sa mga anghel kon wala ini ginsulat. Amo ini ang rason kon ngaa ginsugo ni Jehova ang pila ka lalaki nga “isulat sa isa ka libro” ang gusto niya nga mabal-an naton. (Jer. 30:2) Bangod “himpit ang dalanon sang matuod nga Dios,” makasalig kita nga ang pagsulat sang mensahe isa gid ka maayo nga paagi para magkomunikar sa aton kag makabulig ini sa aton.—Sal. 18:30.

3. Paano ginsigurado ni Jehova nga makalab-ot ang Biblia sa aton tion subong? (Isaias 40:8)

³ Basaha ang Isaias 40:8. Sa sulod sang linibo ka tuig, nakabulig gid sa matutom nga mga lalaki kag babayi ang maalamon nga mga laygay sang Pulong sang Dios. Paano ini nangin posible? Indi bala nga madugay na nga ginsulat ang Biblia kag nadunot na ang ginsulatan sini? Gani, wala na kita sing makita nga orihinal nga sinulatan sang Biblia subong. Pero ginsigurado ni Jehova nga makahimo ang mga tawo sang mga kopya sang Biblia. Bisan pa indi perpekto ang mga manugkopya sang Biblia, naghalong gid sila sa ila pagkopya. Halimbawa, parte sa Hebreong Kasulatan, ang isa ka eksperto nagsiling: “Sa tanan nga libro nga ginsulat sang una, amo ini ang pinakasibu ang pagkopya.” Gani bisan pa madugay na nga ginsulat ang Biblia, nadunot na ang ginsulatan sini, kag indi perpekto nga mga tawo ang nagkopya sini, makasalig kita nga ang mabasa naton sa aton mga Biblia subong amo gid ang panghunahuna sang Awtor sini nga si Jehova.

4. Ano ang binagbinagon naton sa sini nga artikulo?

⁴ Ginahatagan kita ni Jehova sang “tagsa ka maayo nga dulot kag tagsa ka himpit nga regalo.” (Sant. 1:17) Ang Biblia amo ang isa sa pinakamaayo nga regalo ni Jehova sa aton. Kon ginhatagan kita sang regalo sang isa ka tawo, mabal-an naton sa iya regalo kon bala kilala gid niya kita kag kon bala kabalo sia sang aton kinahanglanon. Matuod man ini sa naghatag sang Biblia. Kon tun-an naton ini nga regalo, madamo kita sing matun-an parte kay Jehova. Matun-an naton nga kilala gid niya kita kag kabalo sia sang aton kinahanglanon. Sa sini nga artikulo, binagbinagon naton kon paano ginapakita sang Biblia ang tatlo ka kinaiya ni Jehova: ang iya kaalam, katarungan, kag gugma. Una naton nga binagbinagon kon paano ginapakita sang Biblia ang kaalam sang Dios.

GINAPAKITA SANG BIBLIA ANG KAALAM SANG DIOS

5. Ano ang isa ka pamatuod nga ginapakita sang Biblia ang kaalam sang Dios?

⁵ Kabalo si Jehova nga kinahanglan naton ang iya maalamon nga laygay. Gani ginregaluhan niya kita sang Biblia kay madamo kita sang mabasa diri nga nagapakita sang iya kaalam. Nakabenepisyo gid ang mga tawo sa mga laygay sang Biblia kag napabag-o sini ang ila kabuhi. Sang ginsulat ni Moises ang una nga mga libro sang Biblia, ginsilingan niya ang katawhan sang Dios nga mga Israelinhon: “Indi ini wala sing pulos nga pulong para sa inyo, kundi nagakahulugan ini sang inyo kabuhi.” (Deut. 32:47) Ginapakita sini nga kon sundon sang mga tawo ang Kasulatan, mangin madinalag-on sila kag malipayon. (Sal. 1:2, 3) Bisan pa madugay na nga ginsulat ang Pulong sang Dios, makabulig ini gihapon sa mga tawo para mangin maayo ang ila kabuhi. Halimbawa, sa jw.org/hil, mabasa naton ang sobra 50 ka matuod nga eksperiensia sang mga tawo sa seksion nga “Ang Biblia Nagapabag-o sang Kabuhi.” Ang ila mga eksperiensia nagasugid kon paano nagbag-o ang ila kabuhi sang ginsunod nila ang mga laygay sang Biblia.—1 Tes. 2:13.

6. Ngaa masiling naton nga pinasahi gid ang Biblia kon ikumparar sa iban nga mga libro?

⁶ Pinasahi gid ang Pulong sang Dios kon ikumparar sa iban nga mga libro. Ngaa masiling naton ini? Bangod si Jehova nga Dios amo ang Awtor sini nga libro. Sia ang labing gamhanan, wala sia sing ginsuguran kag wala sing katapusan, kag sia ang pinakamaalam. May iban pa nga mga libro nga nagahatag man sang mga laygay ang madugay na nga ginsulat. Patay na ang awtor sang madamo sa sini nga mga libro. Sa masami, ang mga laygay sini indi na makabulig pagligad sang tion. Pero lain gid ang Biblia kay halin pa sang una asta subong nakabulig gid sa mga tawo ang mga prinsipio sini. Sa kada tion nga ginabasa naton ang Biblia kag ginapamalandungan naton ang aton natun-an, ginagamit sang Awtor sini ang iya gamhanan nga balaan nga espiritu para buligan kita nga iaplikar ang mga laygay sini. (Sal. 119:27; Mal. 3:16; Heb. 4:12) Ang Awtor sang Biblia padayon nga nagakabuhi kag gusto gid niya nga buligan kita. Indi bala nga nagapalig-on pa gid ini sa aton nga basahon pirme ang Biblia?

7. Paano nakabulig ang Biblia para mahiusa ang katawhan sang Dios sang una?

⁷ Ari ang isa pa ka pamatuod nga ginapakita sang Biblia ang kaalam sang Dios: Ginabuligan sini ang katawhan sang Dios nga maghiusa. Sang nagsulod ang mga Israelinhon sa Ginsaad nga Duta, nag-istar sila sa lainlain nga bahin sang pungsod. Ang iban nangin mangingisda, ang iban nagsagod sang mga baka, kag ang iban nangin mangunguma. Bangod layuanay sila, posible nga indi na nila pagkabalak-an ang kada isa. Pero ginsugo ni Jehova ang mga Israelinhon nga magtipon sa pila ka okasyon. Sa sini nga mga pagtilipon, nagapamati sila samtang ginabasa kag ginapaathag ang Pulong ni Jehova. (Deut. 31:10-13; Neh. 8:2, 8, 18) Imadyina ang kalipay sang matutom nga mga Israelinhon nga makita ang posible minilyon ka sumilimba ni Jehova sa Jerusalem nga naghalin pa sa lainlain nga bahin sang pungsod. Paagi sa bulig ni Jehova, padayon sila nga nahiusa. Sang ulihi, sang may ara na Cristianong kongregasyon, lainlain ang lenguahe sang mga kauturan. Ang iban sa ila kilala nga mga tawo, pero ang iban indi. May ara man mga manggaranon, kag may ara man mga pigado. Pero, nahiusa gid sila sa ila pagsimba sa matuod nga Dios kay ginapabaloran gid nila ang Kasulatan. Para sa bag-o nga mga tumuluo, mahangpan lang nila ang Pulong sang Dios kon magpabulig sila sa ila mga kauturan kag kon mag-upod sila sa ila mga pagtilipon.—Binu. 2:42; 8:30, 31.

8. Paano nakabulig ang Biblia para mahiusa ang katawhan sang Dios subong?

⁸ Padayon nga ginagamit sang aton maalam nga Dios ang Biblia para buligan ang iya katawhan nga mahiusa. Ginatudlo sang Biblia ang tanan nga kamatuoran parte kay Jehova nga dapat naton mabal-an. Nagatipon kita sing regular sa aton mga miting sa kongregasyon, mga asembleya, kag mga kombension. Sa sini nga mga pagtilipon, ginapamatian naton samtang ginabasa, ginapaathag, kag ginabinagbinag ang Kasulatan. Maathag nga ginagamit ni Jehova ang Biblia para buligan ang iya katawhan nga “magsimba sa iya sing nahiusa.”—Sof. 3:9.

9. Ano nga kinaiya ang dapat naton ipakita para mahangpan naton ang mensahe sang Biblia? (Lucas 10:21)

⁹ Ari ang isa pa ka pamatuod sang kaalam ni Jehova: Madamo sia sing ginpasulat sa Kasulatan nga mahangpan lamang sang mapainubuson nga mga tawo. (Basaha ang Lucas 10:21.) Mabasa sang mga tawo ang Biblia bisan diin man sila nagaistar. Ang isa ka eksperto sa Biblia nagsiling nga “mas madamo nga tawo ang nagabasa sang Biblia kon ikumparar sa iban nga mga libro, kag ginabasa man nila ini sing maayo.” Pero ang mapainubuson lamang nga mga tawo ang nakahangop sang mga ginasiling sang Biblia kag nagaaplikar sang mga ginatudlo sini.—2 Cor. 3:15, 16.

10. Ano ang isa pa gid ka pamatuod nga ginapakita sang Biblia ang kaalam ni Jehova?

¹⁰ Ari ang isa pa gid ka pamatuod nga ginapakita sang Biblia ang kaalam ni Jehova: Magluwas nga ginagamit ni Jehova ang Kasulatan para tudluan ang tanan niya nga katawhan, ginagamit man niya ini para tudluan kag paumpawan ang kada isa sa aton. Sa kada tion nga ginabasa naton ang Pulong ni Jehova, mabatyagan naton nga interesado gid sia sa kada isa sa aton. (Isa. 30:21) Mahimo nga pila ka beses mo na nga naeksperiensiahan nga sang may problema ka, nagbasa ka sang Biblia kag may nabasahan ka nga teksto nga daw ginsulat gid para sa imo. Pero, ginsulat ang Biblia para sa minilyon ka tawo. Gani, paano nangin posible nga nagaunod ini sang impormasyon nga bagay gid sa imo sitwasyon? Nangin posible lamang ini bangod ang Awtor sang Biblia amo ang pinakamaalam sa uniberso.—2 Tim. 3:16, 17.

GINAPAKITA SANG BIBLIA ANG KATARUNGAN SANG DIOS

11. Paano ginpakita sang Dios nga wala sia sing ginapasulabi sang ginpasulat niya ang Biblia?

¹¹ Si Jehova isa man ka matarong nga Dios. (Deut. 32:4) Ang isa nga matarong wala sing ginapasulabi, kag amo sini si Jehova. (Binu. 10:34, 35; Roma 2:11) Wala gid sia sing ginapasulabi kay ginpasulat niya ang Biblia sa lenguahe nga mahangpan sang madamo nga tawo sadto. Ang kalabanan sa una nga 39 ka libro sang Biblia ginsulat sa Hebreo, nga amo ang lenguahe nga nahangpan sang katawhan sang Dios sadto. Pero sang unang siglo, ang kalabanan nga tawo nagahambal sing Griego. Gani, ang kalabanan sa katapusan nga 27 ka libro sang Biblia ginsulat sa Griego. Wala nagsiling si Jehova nga dapat isa lang ka lenguahe ang gamiton sa pagsulat sang iya Pulong. Subong, lainlain ang lenguahe sang halos walo ka bilyon ka tawo. Gani, paano nangin posible nga madamo nga tawo ang nakakilala kay Jehova?

12. Paano nagakatuman ang Daniel 12:4 sa sining katapusan nga mga adlaw?

¹² Paagi kay manalagna Daniel, nagpromisa si Jehova nga sa tion sang katapusan, “ang matuod nga ihibalo” nga makita sa Biblia “magabugana.” Buot silingon, madamo nga tawo ang makahangop sini. (Basaha ang Daniel 12:4.) Paagi sa pag-translate, pag-publish, kag pagpanagtag sang Biblia kag sang mga publikasyon nga nabase sa Biblia, nahangpan sang madamo nga tawo ang mensahe sini. Ang Biblia amo ang pinakamadamo nga na-translate kag napanagtag nga libro sa bilog nga kalibutan. Kon kaisa, grabe kamahal sang mga Biblia nga ginahimo sang mga kompanya nga nagabaligya sini. Pero na-translate na sang katawhan ni Jehova ang bug-os nga Biblia ukon ang bahin sini sa sobra 240 ka lenguahe, kag puede ini matigayon sang mga tawo nga wala sing bayad. Bangod sini, matun-an sang mga tawo sa tanan nga pungsod ang “maayong balita sang Ginharian” antes mag-abot ang katapusan. (Mat. 24:14) Matarong gid ang aton Dios, kag ginagamit niya ang iya Pulong para buligan ang madamo nga tawo nga makilala sia. Pamatuod ini nga palangga gid niya kita tanan.

GINAPAKITA SANG BIBLIA ANG GUGMA SANG DIOS

13. Paano ginapakita sang Biblia ang gugma ni Jehova? (Juan 21:25)

¹³ Ginapakita sang Biblia nga ang gugma amo ang pinakadalayawon nga kinaiya ni Jehova. (1 Juan 4:8) Maathag ini sa mga ginpasulat ni Jehova sa Biblia kag sa mga wala niya ginpasulat sa sini. Ginpasulat niya sa Biblia ang mga impormasyon nga makabulig sa aton para mangin suod kita sa iya, para mangin malipayon kita, kag para makabaton kita sing kabuhi nga wala sing katapusan. Pero bangod sang gugma ni Jehova sa aton, wala na niya ginpasulat sa Biblia ang mga impormasyon nga indi man naton kinahanglan sa pag-alagad sa iya.—Basaha ang Juan 21:25.

14. Paano pa ginapakita sang Biblia ang gugma sang Dios sa aton?

¹⁴ May ginhimo pa si Jehova nga nagapakita sang iya gugma sa aton. Ginpasulat niya ang Biblia sa paagi nga nagapadungog sa aton. Sa Biblia, wala sia naghatag sang madamo nga kasuguan para kontrolon ang tanan naton nga ginahimo. Sa baylo, ginpasulat niya ang mga eksperiensia sang matuod nga mga tawo, ang dalayawon nga mga tagna, kag ang praktikal nga mga laygay para buligan kita nga makahimo sang maayo nga mga desisyon. Bangod sini, nabuligan kita sang Pulong sang Dios nga higugmaon sia kag tumanon sia sing tinagipusuon.

15. (a) Paano ginapakita sang Biblia nga nagaulikid gid si Jehova sa aton? (b) Sa piktyur, sin-o nga mga karakter sa Biblia ang ginapamalandungan sang bata nga babayi, sang pamatan-on nga brother, kag sang tigulang nga sister? (Gen. 39:1, 10-12; 2 Hari 5:1-3; Luc. 2:25-38)

¹⁵ Ginapakita sang Biblia nga nagaulikid gid si Jehova sa aton. Paano? Madamo kita sing mabasa sa iya Pulong parte sa mga ginabatyag sang mga tawo. Mahangpan naton ang mga ginabatyag sang mga karakter sa Biblia bangod tawo man sila “nga may balatyagon kaangay sa aton.” (Sant. 5:17) Kag kon tun-an naton kon paano niya ginpakig-angutan ang mga tawo, mangin kumbinsido pa gid kita nga “si Jehova mapinalanggaon gid kag maluluy-on.”—Sant. 5:11.

16. Ano ang matun-an naton parte kay Jehova kon basahon naton sa Biblia ang parte sa mga tawo nga nakahimo sang sala? (Isaias 55:7)

¹⁶ May isa pa ka paagi nga ginapakita sang Biblia ang gugma ni Jehova sa aton. Ginapasalig kita sang Kasulatan nga indi kita pagbayaan sang aton Dios kon makasala kita. Sulitsulit nga nakasala ang mga Israelinhon kay Jehova. Pero sang naghinulsol sila sa ila ginhimo, ginpatawad niya sila. (Basaha ang Isaias 55:7.) Kabalo man ang mga Cristiano sang una nga palangga gid sila sang Dios. Gintuytuyan si apostol Pablo nga laygayan ang iya mga kauturan nga ‘patawaron kag palig-unon’ ang isa ka tawo nga nakahimo sang serioso nga sala nga naghinulsol na. (2 Cor. 2:6, 7; 1 Cor. 5:1-5) Makapaumpaw gid mahibaluan nga wala dayon ginasikway ni Jehova ang iya mga alagad kon makasala sila. Sa baylo, mapinalanggaon niya sila nga ginabuligan, ginatadlong niya sila, kag gusto niya nga mangin abyan niya sila liwat. Amo man sini ang ginapasalig ni Jehova sa tanan nga nagahinulsol sa ila mga sala.—Sant. 4:8-10.

PABALORI ANG PULONG SANG DIOS NGA ISA KA “MAAYO NGA DULOT”

17. Ngaa isa gid ka dalayawon nga regalo ang Biblia?

¹⁷ Ginhatagan kita ni Jehova sang isa ka matahom nga regalo. Ngaa dalayawon gid ang iya Pulong? Natun-an naton nga ginapakita sang Biblia ang kaalam sang Dios, ang iya katarungan, kag ang iya gugma. Ginapamatud-an sini nga libro nga gusto ni Jehova nga makilala naton sia. Gusto niya nga mangin abyan niya kita.

18. Paano naton mapakita nga nagapasalamat kita sa “maayo nga dulot” ni Jehova sa aton nga amo ang Biblia?

¹⁸ Dapat gid naton pabaloran ang Pulong sang Dios kay isa ini ka “maayo nga dulot.” (Sant. 1:17) Gani padayon naton nga ipakita nga nagapasalamat kita sa sini nga regalo. Mahimo naton ini kon ginabasa naton ang Biblia kag ginapamalandungan naton ang aton natun-an. Makasalig kita nga kon himuon naton ini, pakamaayuhon gid kita sang Awtor sini kag “makita [naton] ang ihibalo tuhoy sa Dios.”—Hulu. 2:5.